Matthew 1 - Ma Zhiklè

Verzi Yèsu Kristi

¹ Ɗèlèwèr nzlembaɗ ndohi te verzi Yèsu Kristi, kra David, kra Abraham.

² Abraham bab Isaac; Isaac bab Jacob; Jacob bab Juda a kramamhi nengaʼa.

³ Juda bab Pharès a Zara, man Thamar a ya na Juda. Pharès bab Esrom; Esrom bab Aram.

⁴ Aram bab Aminadab; Aminadab bab Naasson; Naasson bab Salmon;

⁵ Salmon bab Boaz, man Rahab a ya na; Boaz bab Obed man Ruth a ya na;

⁶ Obed bab Isai; Isai bab bi David. Bi David, bab Salomon, man ngwoz Urie a ya na.

⁷ Salomon bab Roboam; Roboam bab Abia; Abia bab Asa;

⁸ Asa bab Josaphat; Josaphat bab Joram; Joram bab Ozias;

⁹ Ozias bab Joatham; Joatham bab Achaz; Achaz bab Ezéchias;

¹⁰ Ezéchias bab Manasse; Manassé bab Amon; Amon bab Josias;

¹¹ Josias bab Jéchonias a kramamhi nengaʼa, a vi man ta hel ta a kokwar Babylone.

¹² Te deɓaʼa aman ta hel ta a kokwar Babylone ma, Jéchonias bab Salathiel; Salathiel bab Zorobabel;

¹³ Zorobabel bab Abiud; Abiud bab Eliakim; Eliakim bab Azor;

¹⁴ Azor bab Sadok; Sadok bab Achim; Achim bab Ehud;

¹⁵ Ehud bab Eléazar; Eléazar bab Matthan; Matthan bab Jacob;

¹⁶ Jacob bab Joseph; nengaʼa baki Marie, man a yu Yèsu, man ta baha na Kristi.

¹⁷ Gar haha te Abraham, ha David, verzi ndohi 14. Te David, ha vi man ta hel ta a kokwar Babylone, verzi ndohi 14. Te mvi man ta hel ta a kokwar Babylone ma, ha Kristi, verzi ndohi 14.

Nyi Yèsu Kristi

¹⁸ Nyi Yèsu Kristi a ngu ar haha: Marie, mam na, medemi Joseph, a nʼngots kra a Mèzhèɓ Zhiklè nkezlaʼa, baki a mʼmana a vna di ɓai.

¹⁹ Joseph, baki na, ndo nzuraʼa, a woy a mpa na hori a di a Marie ɓai, a nhuro a woy a njèkeda a metsai

²⁰ Aman a hur skwi haha arsa, gol Bi Zhiklè a ngudoko na va a dai te nshunè, a ngaɗa na: Joseph, kra David, ka gu zlau ɓai! Co Marie, a ngwoz ngaya, aman kra ntʼhwaɗ na, Mèzhèɓ Zhiklè nkezlaʼa a mva na.

²¹ A da yi kra nguraʼa, a ka da va na nzlembaɗ nengaʼa Yèsu, aman nengaʼa a da mbel ta ndohi nengaʼa te mali tengaʼa.

²² Skwi haha a ngau, ara ma Zhiklè, man a goɗ te ma ndo nhadka ma:

²³ Na haha bidali a ngècè kra, a da yi kra nguraʼa a ta da va na nzlembaɗ nengaʼa Emmanuel, ara ngèdè: Zhiklè a nda nga.

²⁴ A Joseph a mpidèkwe na, a ngu ara man gol Bi Zhiklè a gaɗa na, a mco ngwoz na a gai,

²⁵ aman a mʼmana a vna ɓai, ha a nya kra ma, a mva na nzlembaɗ nengaʼa Yèsu.