Marc 9 - Ma Zhiklè

¹ A ngaɗa ta a vaʼa: A vava i gaɗa kinè: Ndohi man ta zlatsa a haha, matrhiaʼa ta da metsi di azɓai, sèi ta rka kokwar Bi Zhiklè man a da shkè dai a wuɗai.

Nʼngwèdè va Yèsu a géɗ za

² Te deɓ mʼmèn mokwa, Yèsu a to do a Pierre, Jacques a Jean. A Yèsu a nde ta a géɗ ta, a géɗ za mbiaʼa.

³ A nʼngwoda ta va a dai. Maslaka nengaʼa nʼnge na nslekaɗa kuɗkuɗèʼa, a si dai, skwi nslekaɗa arsa azɓai tʼherkeda.

⁴ A nda Elie a Moise ta gudoko ta va a dai, a ta goɗa a Yèsu.

⁵ A Pierre a hüno a ngaɗa na Yèsu: Rabbi, amba aman nga zhè a haha. Ngo-gokoy gihi makar, staɗ a ngaya, staɗ a Moise, staɗ a Elie.

⁶ Aman nengaʼa a sun skwi man a gèɗè ɓai, zlau a ndza ta a vata.

⁷ A vani staɗ a mshkè, a mva ta mèzhèɓ a géɗ. A ta tsena ngèɗè staɗ te va vanai: Nengaʼa kra ga man i woya a ndav ga. Va-tsun ma nengaʼa!

⁸ A nasa nasa golahi Yèsu ta ngul dai. Aman ta rka ndo ngiɗè ɓai, sèi Yèsu staɗ a sam ta genè.

⁹ Aman ta shkèhi te za, Yèsu a mfa ta ma a gèɗ, aman ta ngreda na skwi man ta rka a ndo ngiɗè ɓai, sèi te deɓaʼa, a pats man kra-ndo a slambaɗkaɗauda te va ndohi mʼmetsaʼa ma.

¹⁰ Ta hur ma haha, a ta dzhoɗo a va ta. Nslambaɗkaɗauda te va ndohi mʼmetsa ara mè?

¹¹ A ta dzhoɗo Yèsu: Malamhai ta gada, sèi Elie a shkè nshèlèkuraʼa dai, èhèmè?

¹² A Yèsu a mʼmbeɗa ta a ma: Elie a shkè nshèlèkuraʼa, a til skwi tèlèba. Te ɗèlèwèr Zhiklè ta windo a géɗ kra-ndo, ara man sèi a si matakwan, sèi ta rka ara ndo ambalai, èhèmè?

¹³ Aman i gada kinè: Elie a mshkè ma, a ta gu a sam na, ara ndav tengaʼa man a woyaʼa, ara man ta Windo te ɗèlèwèr Zhiklè a géɗ nengaʼa.

Yèsu a dzama mèzhèɓ ambaɓiaʼa auda te va kra

¹⁴ Aman ta shkè a deɓa a sam golahi ngiɗè, ta rka ndohi rèdèdèa a vata a sam ta. A malamhai ta versl ma a nda tengaʼa.

¹⁵ Aman ndohi rèdèdèa ta rka Yèsu, ta gu gurts kata, a ta hakaɗai, aman ta ga na mbalai.

¹⁶ Yèsu a ndzhad ta malamhai: Kin verslè mè a nda tengaʼa?

¹⁷ A ndo staɗ te va ndohi rèdèdèa a ngaɗa na: Ndo njèngè ma, i cko kra ga a sam ngaya. Mèzhèɓ ambaɓiaʼa a ga na, a ndèma na zlembaɗ, a gèɗè azɓai.

¹⁸ A sam tèlèba man a gshèʼa, a kaldahi a herkeda, maslokof te ma kra, a peɗi zlèʼèn, a sal na. I gaɗa ta golahi ngaya, aman ta jèm mèzhèɓ ambaɓiaʼa auda, aman ta slaha ɓai.

¹⁹ A Yèsu a mʼmbeɗa ta a ma: Kinè ndohi man kin cè a ndav kinè azɓai; i da nzi a sam kinè gen ɗè? I da takaha kinè gen dè? Va-ckoɗa a sam ga! A ta cko kra a sam nengaʼa.

²⁰ A nasa nasa, aman kra a rka Yèsu, mèzhèɓ a nʼnga na a vata, a kra a mɓerzl na, a nkalahi a herkeda, a ncédè va a maslokof te ma.

²¹ A Yèsu a ndzhoɗ babaʼa: Nʼnzi tèkè aman skwi a ga na ar haha?

²² A ga na te kra, a ngaɗa na. Pats ngiɗè, pats ngiɗè mèzhèɓ ambaɓiaʼa a kalda a vogwa, a kalda a iyam, a woya man a nkedaʼa. Takaha nga, man ka slaha! Nga da se ka te va!

²³ A Yèsu a ngaɗa na: Aman ka slaha…

²⁴ Ndo man a nco a ndav, a slaha tèlèba. Tsam tsam bab kra a mboho: I co! Man i co a ndav ɓai, takahayè!

²⁵ A Yèsu aman a rka ta ndohi rèdèdèa ta hakaɗai, a nguva mèzhèɓ ambaɓiaʼa, a ngaɗa na: Mèzhèɓ ambaɓiaʼa, i gada ka a ma staɗ do auda te kra, a ka minè a deɓa a va nengaʼa azɓai!

²⁶ A mdo na auda, a ntsu lalau, kra a mɓerzl na. Kra ara man mʼmetsa. Aman tengahi ngiɗè kumba ta gada: A mʼmetsa ma.

²⁷ Aman Yèsu a ngso ri nengaʼa, a kra a nslambaɗa, a nzlatsa.

²⁸ Aman Yèsu a ndo a gai, golahi nengaʼa ta dzhoɗo, ta a géɗ ta: Nga slaha nga dzama nengaʼa bi èhèmè?

²⁹ A Yèsu a ngaɗa ta: Skwi haha a slaha man a dè auda azɓai, sèi a ntsi rai (a njèkè skwi nʼndai).

Yèsu a hodko mʼmetsi nengaʼa zaʼa

³⁰ A ta jèkeda samaʼa, a ta beza a ndev Galilee. Yèsu a woya aman ndo ngiɗè a sun bai.

³¹ A nsenda ta golahi nengaʼa, a ngaɗa ta: A di ta gshè kra-ndo, a ta da fi a ri a ndohai, a ta da keɗaʼa. Man a mʼmets na ma, te deɓ mʼmèn makar, a da slambaɗkaɗauda.

³² Aman golahi Yèsu ta tsena ma haha ɓai. Ta gu zlau aman ta jhèɗèʼa.

Mbiaʼa man a fena ngiɗè, wa?

³³ A ta ndikè Capernaum. Aman a zhè te gai, Yèsu a ndzhad ta: Kin gaɗa a va kinè mè, a civèɗ?

³⁴ Aman ta nza tètè. Aman a civèɗ ta gu gèjau: Te va nga nfena ngiɗè wa?

³⁵ Te deɓaʼa a nʼnzahai, a mbaha ta 12, a ngaɗa ta: Ndo man a woya a gi a ndo nshèlèkuraʼa, nengaʼa da ga a nʼndikèma ndo, da gu ɓèl ndohi tèlèba.

³⁶ A mco kra nkèshèa, a nzlatseda a va tengaʼa, a nhumbètèʼa, a ngaɗa ta:

³⁷ Ko wawa man a cè te va wudahi ar haha, a géɗ nzlembaɗ ga, a ciyè. Ko wawa man a ciyè, a ciyè ka ɓai, aman a cè nengaʼa man a zlindekayè.

Ndo man mayam nga ka ɓai, mandal nga

³⁸ Jean a ngaɗa na: Ndo njèngè ma, nga rka ndo ngiɗè, aman a jèr madzagihai a nzlembaɗ ngaya, aman a dè a verzi nga azɓai. Nga gedassa skwi nengaʼa, a géɗ man a dzadzar nga azɓai.

³⁹ A Yèsu a ngaɗa ta: Kin gedassa na skwi nengaʼa ɓai! Ndo azɓai, man a gi nrkedi a nzlembaɗ ga, aman tsam tsam te deɓa a da gèɗè ma ambaɓiaʼa a géɗ ga.

⁴⁰ Ndo man ndo mayam nga ka ɓai, nengaʼa mandal nga.

⁴¹ Ko wawa man a bala kinè iyam a géɗ nzlembaɗ ga, a géɗ man kinè a Kristi, a vava i gada kinè, skwi ntul nengaʼa a zi azɓai.

Mali a pe nga a wai

⁴² Aman ko wawa man a slafadama na sak a kra nkèshèa ar haha, a géɗ man a nciyè a ndav, dara ta mana na vova a daʼai nengaʼa, a ta kalda a drav iyam.

⁴³ Man ri ngaya a kalde ka a malai, ngeldaussa! Dara ka dè a sam nshèffè ara ndo vedal, a géɗ man ka zi ngaya a vogwa kita mbiaʼa a ri cèw

⁴⁴ [a sam man meturɗai tengaʼa ta metsi azɓai, a sam vogwa man a mbècè azɓai a mèdèp].

⁴⁵ Man sak ngaya a kalde ka a malai, ngeldaussa! Dara ka dè a sam nshèffè ara ndo vedal, a géɗ man ta kalde ka a vogwa kita mbiaʼa a sak cèw

⁴⁶ [a sam man meturɗai tengaʼa ta metsi azɓai, a sam vogwa man a mbècè azɓai a mèdèp],

⁴⁷ Man di ngaya a kalde ka a malai, veɗotkoɗauda. Dara ka dè a kokwar Bi Zhiklè a di staɗ, a géɗ man ta kalde ka a vogwa kita mbiaʼa a di cèw,

⁴⁸ a sam man meturɗai tengaʼa ta metsi azɓai, a sam vogwa man a mbècè azɓai a mèdèp.

⁴⁹ Ndohi tèlèba ta wèslèʼa a vogwa.

⁵⁰ Boma skwi mbelaʼa. Man boma a vrè azɓai, kin vrèʼa a mè?

⁵¹ Sèi ndav kinè da jèn ara boma, a kin nzi a gumai, ngiɗè a ngiɗè, ngiɗè a ngiɗè.