Marc 8 - Ma Zhiklè

Ndohi 4.000 ta ngècè skwi nʼndai

¹ A pats nasa ndohi rèdèdèʼa ta ɓica va zaʼa, a ta ngatsa skwi nʼndi ɓai. A Yèsu a mbaha ta golahi nengaʼa, a ngaɗa ta:

² Ndohi rèdèdèa haha ta siyè te va. Aman mʼmèn makar ta zhè a sam ga, skwi nʼndi ta azɓai.

³ Aman i zlinde ta a ngwai, ta nda skwi ɓai, ta da tiɗ ta a mi a civèɗ, aman matrhiaʼa ta shkè dra.

⁴ A golahi nengaʼa ta gaɗa na: Nga gi mè a nga ngècè movar tʼhèshèkèɗ haha, aman ndohi ta ngizhè?

⁵ A Yèsu a ndzhad ta: Movar te ri kinè ngama? Tsaraɗ, ta gada na.

⁶ Te deɓaʼa a ngaɗa ta ndohi rèdèdèa, aman ta nzahai a herkeda. A mhul movar tsaraɗ, a nshüd gèɗ, a ntsakaʼa, a mva ta golahi nengaʼa, aman ta va ta a ndohai.

⁷ A ta ngots wud klèfi cèwkata a vaʼa. A Yèsu a mpshè na ma, a ngaɗa ta golahi nengaʼa, aman ta kezla ta a ndohai.

⁸ Ta ndau, a ta ngezaʼa, a ta hul njèkèɗiaʼa, gadagar tsaraɗ, nʼndhaʼa.

⁹ Ndohi tèlèba man ta ndau, 4.000. Te deɓaʼa Yèsu a njèke ta.

¹⁰ Tsam tsam Yèsu a to do a wurom a golahi nengaʼa, a to do a ma kokwar Dalmanutha.

Ndohi ta woy skwi malwuɗai

¹¹ A ndohi pharisie ta shkè, a ta verslè a nda Yèsu; aman ta jkedaʼa, a ta dzhoɗo, aman a ngreda ta skwi malwuɗi te zhiklè te géɗèʼa.

¹² Yèsu a nsakat na te ndav, a ngaɗa: Ndohi haha ta jhèɗè skwi malwuɗi èhèmè? I gaɗa kinè a vava, ta ngècè skwi malwuɗi azɓai.

¹³ Te deɓaʼa a njèke ta, a ndo a deɓa a wurom, aman a dè a wud woyam.

Skwi nshégèrè a sam ndohi pharisie a Hérode

¹⁴ A mpca ta a gèɗ a golahi nengaʼa, aman ta cè movar a rai. Njèkè movar tengaʼa te wurom stadgenè.

¹⁵ A Yèsu a mfa ta ma a gèɗ: Va-gu maya a sam skwi nshégèrè ndohi pharisie, a Hérode ba.

¹⁶ A golahi ta goɗ a va ta: Nasa a goɗ a gèɗ man movar nga azɓai. A Yèsu a suna, a ngaɗa ta:

¹⁷ Kin gèɗè a va kinè a géɗ man kin ngatsa movar ɓi èhèmè? Kin sun di ɓi dè? Ndav kinè ngwora dè?

¹⁸ Di kinè a zhè, kin rka ɓi dè? Zlembaɗ kinè a zhè, kin tsena ɓi dè? Kin hérè azɓi dè?

¹⁹ Aman i tsaka movar zlam a ndohi 5.000, kin hul njèkèɗiaʼa gadagar nʼndhaʼa, ngama? 12, ta gada na.

²⁰ A movar tsaraɗ a ndohi 4.000, kin hul njè-kèɗiaʼa, gadagar nʼndhaʼa, ngama? 7, ta gada na.

²¹ A nengaʼa a ngaɗa ta: Kin tsena di ɓi èhèmè?

Yèsu a mbela mandazlai te Bethsaida

²² A to do ta a Bethsaida; te pa ta ckoɗi ndo mandazlai a sam Yèsu, a ta dzhoɗo, aman a lama na.

²³ A Yèsu a ngso ri ndo mandazlai, a ndaʼa a der kokwar. Te deɓaʼa a nʼnga na slèslèɓ a dai, a mfa na ri a gèɗ, a ndzhoɗo: Ka rka skwi dè?

²⁴ A ndo mandazlai a mbirzh dai, a ngaɗa: I rka ndo zhèw zhèwaʼa, ara wofhi man ta dè.

²⁵ A Yèsu a mfa na ri a di zaʼa. Aman ndo mandazlai a mpu dai, mʼmbela, a nrka skwi tsaraya ma.

²⁶ Te deɓaʼa Yèsu a nzlinda a ngwai, a ngaɗa na: Ko do kokwar ɓai!

Pierre a gèɗè a géɗ Yèsu

²⁷ A Yèsu a to do ta a golahi nengaʼa a kokwar Césarée a Philippe. A civèɗ a ndzhad ta: Ndohi ta gada, i wa?

²⁸ Ta mbeɗa na a ma: Jean Baptiste; ndohi ngiɗè Elie; ndohi ngiɗè, ndo nhadka ma ngiɗè.

²⁹ A ndzhad ta: Kinè, kin gada, i wa? A Pierre a mʼmbeɗa na a ma: Ka, ka Kristi!

³⁰ A Yèsu a mfa ta ma a gèɗ, aman ta gèɗè ma haha a ndo ngiɗè azɓai.

Yèsu a hodko mʼmetsi nengaʼa

³¹ Te deɓaʼa a hüno man a senda ta, ara man kra-ndo a da si matakwan a vata, ara man ndohi nhalaʼa a ndohi mvi skwi a Zhiklè mbibihiaʼa a malamhai ta da kwolaʼa, a ta da keɗaʼa, aman te deɓ mʼmèn makar a da slambaɗkaɗauda zaʼa.

³² A nwuzhko ma haha auda tèlèba. A Pierre a ngskoɗa deɓa, a woya a ngra na maya.

³³ Aman Yèsu a nʼngwoda ta ma a va, a mpa ta di a golahi nengaʼa, a nʼnga na ndzoan a Pierre, a ngaɗa: Do ngaya a deɓa a sam ga, Sadan! Ka hera skwi Zhiklè ɓai, ka hér skwi ndohai.

³⁴ Te deɓaʼa a mbaha ta ndohi rèdè-dèʼa, a golahi nengaʼa, a ngaɗa ta: Aman ndo a woya a ndzadzarkayè, da hur a géɗ nshèffè na ɓai, da zuɓ wof ngézlèl na, da dzadzarkayè!

³⁵ Aman ndo man a woya a mbel nshèffè na a ri na, a da zeda nshèffè na. A ndo man a zeda nshèffè na a géɗ ga, a géɗ ma mbelaʼa, a da mbelaʼa.

³⁶ Ndo man a ngots herkeda tèlèba, aman nshèffè nengaʼa a zi na, a nʼngots te pa mè?

³⁷ Ndo a vi te di nshèffè nengaʼa mè?

³⁸ Aman ko wawa man a gi hori ga, a hori ma ga a sam ndohi mphömè a ndohi malihi haha, kra-ndo ba a da gi hori nengaʼa, a pats man a shkè te nʼnjèl Bab na, a nda golahi Bi Zhiklè nkezlaʼa.