Marc 7 - Ma Zhiklè

Ma ndohi nhalaʼa

¹ Ndohi pharisie a malamhai ngiɗè ta shkè te Jérusalem, a ta ɓicko va a sam Yèsu.

² A ta rka golahi nengaʼa cèw-kata, man ta ndau skwi nʼndai a ri nli-zhèa (a ri mpanɓiaʼa).

³ Aman ndohi pharisie a ndohi Juif tèlèba, ta dzodzor babababhi ta: ta da ndi skwi, sèi ta pènè ri ten gaʼa mbelembela di kla.

⁴ Aman ta shkè a luma, ta ndi skwi azɓai, sèi ta pana ri mbelembela dai. A ta gi skwi tsaɗ tsaɗ a ndiv ɓai, ara man babababhi ta ta gaɗa: ara man ta pèn kokwai, a shiɗef, a tassa züdo.

⁵ A ndohi pharisie a malamhai ta dzhoɗo: Golahi ngaya ta jèjèr ma bababhi ta azɓi èhèmè? A ta ndi skwi nʼndi a ri mpanɓiaʼa èhèmè?

⁶ Yèsu a mʼmbeɗa ta a ma: Kinè ndohi nʼngwèdè ndo! Esaie a nhodko ma zuraʼa a géɗ kinè, ara man a Windo te ɗèlèwèr Zhiklè: Ndohi haha ta slebardyè a ma; aman ndav tengaʼa dra a sam ga.

⁷ Ta slebardyè ambalai, aman ta senda ta ma ndo a ndohi ngiɗè.

⁸ Kin jè-keda ma Zhiklè, a kin jèjèr ma babababhi kinè!

⁹ A ngaɗa ta a vaʼa: Kin kwola ma nkwèr Zhiklè, a kin jèjèr ma bababhi kinè.

¹⁰ Moise a gaɗa: Slubordo bab ngaya a mam ngaya! Ndo man a tsi derngasl a bab na mam na, a kèlè a kita mʼmetsai.

¹¹ Aman kinè, kin gada: Ndo man a gaɗa na bab na a mam na: Skwi man i gaɗa i takaha ka a vna, i va na Zhiklè,

¹² a takaha bab na a mam na te deɓaʼa asaɓai.

¹³ Aranta kin fu ma kita Zhiklè a ma ambalai, a géɗ ma bababhi kinè. A kin gi skwi tsaɗ tsaɗ kumba ar haha.

Skwi niizhè ndo

¹⁴ Te deɓaʼa, aman a mbaha ta ndohi rèdèdèʼa a sam na zaʼa, a ngaɗa ta: Va-tsena ma ga, kin tèlèba, a kin suna!

¹⁵ Skwi man a dala, man a beza a hwaɗ a ma ndo, a lizhè ndo azɓai, ko staɗ ba. Skwi man a shkè auda te ndav ndo, nasa man a lizhè ndo.

¹⁶ (Ndo man zlembaɗ na a zhè, da tsenaʼa!)

¹⁷ Aman a ndo na gai, a njèkeda ndohi rèdèdèa, golahi, nengaʼa ta dzhoɗo a géɗ ngèlègèɗ-ma sa.

¹⁸ A Yèsu a ngaɗa ta: Ko kinè ba, kin sun ɓi ɗè? Kin tsena ɓi dè? Skwi man a dala, man a beza a hwaɗ a ma ndo, a slaha man a lizhèʼa azɓai.

¹⁹ Aman nengaʼa a dè a ndav azɓai, a deda hwaɗ genè, te deɓaʼa a dè auda a zai, klèng.

²⁰ A ngaɗa ta a vaʼa: Skwi man a shkè auda te ma ndo, nasa a lizhè ndo.

²¹ Aman te nengaʼa, te ndav ndohai, skwi ambaɓiaʼa man a héréʼa, a shkè auda: ngwoz a nguraʼa ta gi baki a dala, ta gi metsar, ta kéɗ ndo,

²² ta gi mphömè, ta tétékè skwi ndo ngiɗè, ta gi shèwa, ta ngwèdè ndo, ta bizhè zlawa, ta gi srak, ta tsi derngasl, ta fi va, ta rzla.

²³ Skwihi ambaɓihiaʼa ar haha tèlèba ta shkè auda te ndav ndo, a ta lizhè ndo.

Ncè-a-ndav ngwoz Syro-phénicie

²⁴ Yèsu a njèkeda samaʼa, a mdo na a kokwar Tyr. A mdo a gi ngiɗè, a woya ndo a sun ɓai. Aman a slaha a nʼnghede va na ɓai.

²⁵ A nasa nasa ngwoz ngiɗè, man a ntsena labar ma Yèsu, a mshkè, a nkalahi a deɓ sak nengaʼa. Mèzhèɓ ambaɓiaʼa a ga na dem nengaʼa.

²⁶ Ngwozaʼa grècque na tsaɗ, te kokwar Syro-phénicie. A mtsu riaʼa, aman a jèr madzagi auda te dem nengaʼa.

²⁷ A Yèsu a ngaɗa na: Skwi nʼndi da ngeza ta wudahi nshèlèkuraʼa dai. Ambaɓai aman ndo a cè movar wudahai, a wusheda na kdadihai.

²⁸ Halau a bai, ngwoz a mʼmbeɗa na a ma: Aman kdadihai man tʼhwaɗ table ta ndi boborɗiaʼa man a wudahai.

²⁹ Te deɓaʼa Yèsu a ngaɗa na: A géɗ ma haha, do, madzagi kala auda te dem ngaya ma!

³⁰ Aman nengaʼa a mshkè a deɓa a ngwai, a nʼngots demaʼa, mʼmana tʼhai a sam mʼmènè. Madzagi a ga na asaɓai.

Yèsu a mbel ndaɓazlam

³¹ A Yèsu a njèkeda kokwar Tyr, a mdo a ma woyam mbiaʼa te Galilée, a mbeza a ndev Sidon, a mdo a kokwar Décapole.

³² A ta cko ndaɓazlam, man a slaha a ngèɗè ɓai, sèi a wuɗi a va, a ta tsu riaʼa, aman a nfa na ri a gèɗ.

³³ A Yèsu a nckoɗauda te ndev ndohi rèdèdèa, a ndaʼa daf kata, a mfa na ri a zlembaɗ, a ntor ri a nèʼèn, a nʼnatsa na slèslèɓ na a pa.

³⁴ A mpu di a zhiklè, a nsakat na, a ngaɗa: Ephphatha! Ara ngèɗè: Winèʼa!

³⁵ Tsam tsam zlembaɗ nengaʼa a mwin na, nèʼèn nengaʼa a mpre na, a ngoɗ ngèɗè tsarayaʼa.

³⁶ A Yèsu a mfa ta ma a gèɗ, aman da ngreda na ndo ɓai. Aman ko a mfa ta ma a gèɗ, ta nju maʼa tèlèba, holholaʼa.

³⁷ A ta rzl ta a vata, a ta gada: Nengaʼa a gi skwi tèlè, tèlè amba a vata. A gi aman ndaɓazlam ba a tsenaʼa, ndo ɓagga ba a gèɗè.