Marc 6 - Ma Zhiklè

Ta kwola Yèsu te Nazareth

¹ A Yèsu a mdo na auda te pa, a mdo a kokwar bab na. A golahi nengaʼa ta dzodzora.

² A pats nshèk va, a mdo, a hüno a nsenda ta te gi njèngè ma Zhiklè. Ndohi kumba man ta tsenaʼa, ta rzl ta, a ta gada: A nʼngotsko ma haha tema? Maya haha a nʼngotsko tema? A gi nrkedi ar haha èhèmè?

³ Nengaʼa ndo mbèzl wof, kra Marie, kramam Jacques a Joses a Jude a Simon ka bi dè? Demamhi nengaʼa ta a sam nga ka bi dè? A skwi haha a nslafaɗama ta sak.

⁴ A Yèsu a ngaɗa ta: Ta slébèrdè ndo nhadka ma, aman te kokwar bab na ka ɓai. A sam gwoli na, te gi nengaʼa tèlèba, ta slébèrdèʼa azɓai.

⁵ A nga nrkedi ɓai te pa, sèi a mfa ta ri a gèɗ ndohi matakwan kètè, a mʼmbel ta.

⁶ A Yèsu a nrzl na, a géɗ man ta ca a ndav ɓai. A ndo a kokwar, a kokwar, tʼhwaɗ kokwar, tʼhwaɗ kokwar, a nsenda ta ndohai.

Mizlinè Zhiklè ndohi 12

⁷ Te deɓaʼa a mbaha ta golahi na 12, a hüno a nzlinde ta, cèw, cèw, a mva ta wuɗai a gèɗ mèzhèɓhi ambaɓihiaʼa.

⁸ A mfa ta ma a gèɗ, aman ta hil skwa a ri a nshèwèlè azɓai, sèi gada staɗ. Da ceda movar a ri ɓai, gozhèm ka ɓai, Suli ka ɓai,

⁹ maslaka cèw a va ka ɓai, aman va-peda kotokoroh a sak.

¹⁰ A ngaɗa ta: Gi staɗ staɗ man kin dè a pa, va-nza a pa, ha pats man kin dè kinè zaʼa.

¹¹ Aman a sam ngiɗè ndohi ta ce kinè azɓai, aman ta tsena ma kinè ɓai, vo-do kinè, va-tassa lokotor a sak kinè! Aman skwi haha a gi a skwi malwuɗai a sam tengaʼa.

¹² A to do, a ta njè ta ma Zhiklè, aman ndohi ta ngwèdè ndav ta.

¹³ Ta dzor madzagihi kumba, a ta faɗa ta mbar a gèɗ a ndohi matakwan kumba, a ta mbel ta.

Mʼmetsi Jean Baptiste

¹⁴ Bi Hérode a ntsena labar ma Yèsu aman nzlembaɗ nengaʼa kala a géɗè a gèɗ, a ngaɗa: Jean Baptiste a nslambaɗkaɗna te va ndohi mʼmetsaʼa, a géɗ nengaʼa a gi nrkedi arsa.

¹⁵ Ndohi ngiɗè ta gada: Nasa Elie. Ndohi ngiɗè ta gada: Nasa ndo nhadka ma ngiɗè.

¹⁶ Aman Hérode a ntsenaʼa, a ngaɗa: Nasa Jean, man i ngelama na gèɗ. Nasa nengaʼa man a slambaɗkaɗauda.

¹⁷ Aman Hérode, nengaʼa man a ngso Jean, a ndzawaʼa a mfeda a gi dangai, a géɗ Hérodias, ngwoz Philippe, kramam ha, man Hérode a mco.

¹⁸ Aman Jean a ngaɗa na: Ambaɓai, aman ka co ngwoz kramam ngaya.

¹⁹ A Hérodias a ngu ndav a géɗ Jean, a woya man a nkedaʼa. Aman a slaha ɓai.

²⁰ Hérode a gi zlau Jean, a suna, Jean ndo nzuraʼa, ndo nkezlaʼa. A Hérode a ɓerèʼa. Aman a ntsena ma nengaʼa, a sun skwi man a gia ɓai, ma Jean ambaha a vata.

²¹ A pats ngiɗè, aman Hérode a hur nyi nengaʼa, a ngu skwi nʼndi ngolala a ndohi nengaʼa mbibihiaʼa, a bihi ndohi var, a ndohi mbibihiaʼa te Galilée.

²² A dem Hérodias a mdo na gai, a ngu wai, ambaha Hérode a ndohi ngolala nengaʼa. A bai a ngaɗa na dam: Dzhoɗo te ri ga skwi tèlèba man ka woyaʼa, a i da va ka!

²³ A ngoɗ a vaʼa a mbèɗè: Skwi tèlèba man ka dzhoɗo, i da va ka, ko rèta kokwar-bi ga.

²⁴ Mshkè na auda, dam a ngaɗa na mam na: I jhèɗè mè? Mam na a ngaɗa na: Gèd Jean Baptiste!

²⁵ A demaʼa a nvosso va a gai a sam bai, a ndzhoâo arsa: I woy a ka vay gèɗ Jean Baptiste a kèlèhèr antanta.

²⁶ A ndav bai mʼmbeɗ na. Aman a géɗ ma mʼmbèɗè nengaʼa, a gèɗ ndohi ngolala, a slaha man a ngèɗè ɓai: I vi azɓai.

²⁷ A nasa nasa a nzlündo sojè nengaʼa staɗ, aman da ckoɗi gèɗ Jean Baptiste.

²⁸ A nengaʼa a mdo a nʼngulkoɗi gèɗ Jean te gi dangai, a mfokoɗa a kèlèhèr, a mva na dem matsa, a nengaʼa a mva na mam na.

²⁹ A golahi Jean, aman ta tsenaʼa, ta shkè, a ta zuɓ nckondo nengaʼa, a ta raʼa.

Ndohi 5.000 ta ngècè skwi nʼndai

³⁰ A ndohi sak Yèsu, man ta ɓicko va a sam na, ta ngreda na ma tèlèba, skwi man ta gau, a ma man ta njè ta ndohai.

³¹ A Yèsu a ngaɗa ta: Vo-washkè, ngo-dokoya, aman nga nzi a gèɗ nga; vo-sok va kètè! Aman a haha ndohi ngiɗè ta shkè, ndohi ngiɗè ta shkè kumba, a ta ngatsa ri a nʼndi skwi ɓai.

³² A to do ta a wurom, a ta woy a ta nzi a gèɗ ta.

³³ Ndohi kumba a ta rka ta, aman ta dè ta, a ta sen ta. Te kokwar tèlèba ta hakaɗi mènè, a ta ha ta a ma, a sam man ta woy a ta dè a pa.

³⁴ Aman Yèsu a mshkè auda te wurom, a nrka ndohi rèdèdèʼa, ta sia te va, aman ta ara tambakihai, man ta ngatsa ndo mɓer ta ɓai. A hüno man a senda ta skwi kumba.

³⁵ Aman a pats dakwaɗ, golahi nengaʼa ta do a sam na, a ta gaɗa na: A haha hèshèkèɗ, pats nkala.

³⁶ Zlinde ta a deɓa, aman ta dè a kokwar, a ta shum skwi nʼndai.

³⁷ Yèsu a mʼmbeɗa ta a ma: Va-va ta skwi nʼndi te ri kinè! Aman ta gaɗa na: Nga dè a nga shum movar a Suli 2.000, a nga va ta skwi nʼndi ɗè?

³⁸ A nengaʼa a ngaɗa ta: Movar te ri kinè ngama? Vo-do a kin wora! A ta dzhoɗo, a ta menda na: Zlam, a klèf cèw.

³⁹ Te deɓaʼa a ngaɗa ta, aman ta ɗaha va, a ta nzahi a kuza.

⁴⁰ A ta nzahai, ta ɗaha va, ngiɗè 100, ngiɗè 50.

⁴¹ A Yèsu a nhul movar zlam a klèf cèw, a mpu di a Zhiklè, a mpshè na ma. Te deɓaʼa a ntsaka movar, a mva ta golahi nengaʼa, aman ta kezla ta tèlèba. A nkezla ta klèf cèw a ndohi tèlèba.

⁴² Tèlèba ta ndau, a ta ngezaʼa.

⁴³ A ta hul njèkèɗi movar a njèkèɗi klèf, gadagar 12, nʼndhaʼa.

⁴⁴ Ndohi man ta ndau movar, ngurhi 5.000.

Yèsu a dè a géɗ iyam mbiaʼa

⁴⁵ Tsam tsam te deɓa, Yèsu a mvas ta golahi nengaʼa a wurom, aman ta dè a ma nengaʼa, a wud woyam, a civèɗ Bethsaida. A nengaʼa a nzlinde ta ndohi rèdèdèa a deɓa.

⁴⁶ Aman a njèke ta, a mdo na za, aman a tsi rai.

⁴⁷ A dakwaɗ man pats nkala ma, wurom a zhè te ndev woyam mbiaʼa, a Yèsu te za a gèɗ na.

⁴⁸ A nrka aman ta wurr iyam a wuɗai, a kozlar a erɗeka ta a deɓa. Te man a prèk vaɗ a mdo a sam tengaʼa, a mdo a géɗ iyam, a woya a ngel ta a pa.

⁴⁹ Aman ta rkaʼa, a dè a gèɗ iyam, ta huro, ta rka mèzhèɓ skwi ngiɗè, a ta tsu lalau.

⁵⁰ Ta tèlèba ta rkaʼa, a ta gu zlau. Tsam tsam Yèsu a ngaɗa ta: Va-mana ndav kinè, iyè, kin gu zlau ɓai!

⁵¹ Te deɓaʼa a ndo a sam ta a wurom, a kozlar a njèkeda. Ta rzl ta, a ta huro a vata,

⁵² aman ta sun nrkedi movar matsa ɓai, ndav ta ngwora.

Yèsu a mbel ta ndohi matakwan te kokwar Génésareth

⁵³ Aman ta ndika a wud woyam mbiaʼa, ta shkè a kokwar Génésareth.

⁵⁴ Aman ta jèkeda wurom ma, ndohi ta sun Yèsu langa,

⁵⁵ A ta hakaɗai tʼhwaɗ kokwar tèlèba, a ta hüno a ta hulkoɗi ndohi matakwan a sam mʼmènè ta, a sam tèlèba man ta tsenaʼa, man na pa.

⁵⁶ Ko ahngwa ahngwa, man na pa, te kokwar nkèshèʼa, te kokwar mbiaʼa, te dak, ta hulkoɗi ndohi matakwan, a ta pe ta a luma, a ta tsu riaʼa, aman a va ta civèɗ, a ta lama na ko ma maslaka na gen ba. A ko wawa man a lama na, a mʼmbel na.