Marc 4 - Ma Zhiklè

Ngèlègèɗ ma a géɗ ndo nwush tser skwai

¹ Yèsu a hüno man a senda ta zaʼa a ma iyam mbiaʼa. Ndohi rèdèdèʼa ta ɓücko va a sam na. Yèsu a mdo a wurom a géɗ iyam. Ndohi rèdèdèʼa ta zhè a dzah woyam.

² A nsenda ta skwi kumba a ngèlègèɗ ma, a ngaɗa ta te njè-ma na:

³ Va-tsenaʼa! Ndo nwush tser skwai a mdo auda, man a wushè tser skwai.

⁴ A gu aman a nwushe na, tser faɗkata a wusha a zolom civèɗ, a ɗiakihi ta shkè a ta ndeda ma.

⁵ Ngidè faɗkata a nwusha a verzi pra, man herkeda az a pa a vata ɓai. Tsam tsam nftsa, aman herkeda az a vata ɓai.

⁶ Aman pats a dzai, a halala, a ngworaʼa, te man a ntsa zluzlor ɓai.

⁷ Ngidè faɗkata a nwusha a ndev vatakihai. Vatakihai ta grè, a ta pizlèda pa, a yi wuda azɓai.

⁸ Ngidè faɗkata a nwusha a sam mbelaʼa, a nyu wuda. A ntsu rai, a grè, a yi wuda, ngiɗè a gi 30, ngiɗè 60, ngiɗè 100 te verzi skwi staɗ.

⁹ Te deɓaʼa a ngaɗa ta: Ndo man nzlembaɗ na zhè, da tsenaʼa!

Verzi ngèlègèɗ-ma

¹⁰ Aman Yèsu na gèɗ na ma, tengahi man ta tèuda a pa, a tengahia 12, ta dzhoɗo a géɗ ngèlègèɗ-ma.

¹¹ A Yèsu a ngaɗa ta: Skwi man nʼngheda te kokwar-Bi Zhiklè a kinè. Aman a tengaʼa man ta tʼuda, ma a gi a ngèlègèɗ-ma,

¹² a ta rka di ba, amari ta sun ɓai; a ta tsena a zlembaɗ ba, aman ta sun ɓai, a ta woy a ta menkada deɓa a malihi tengaʼa mpre ɓai.

Yèsu a ngreda ngèlègèɗ-ma ndo nwush tser skwai

¹³ A ngaɗa ta: Kin tsena ngèlègèɗ-ma haha ɓi ɗè? Kin da cinè njèkèɗi ngèlègèɗ mahi a maya mè?

¹⁴ Ndo nwush tser skwai a wushe ma Zhiklè.

¹⁵ Tengahi ngiɗè, ta ara zolom civèɗ, man a wusheda ma Zhiklè a pa. A ta tsena ma, aman tsam tsam Sadan a shkè, a helama ta maʼa man nwusha a ndav ta.

¹⁶ Tengahia ngiɗè ta ara verzi pra. Aman ta tsena ma, tsam tsam ta co a mwuffe.

¹⁷ Aman ta ngatsa zluzlor te ndav ta ɓai, wuɗi ta azɓai. Aman matakwan a shkè, a ta paraha ta a géɗ ma Zhiklè, a slafadama ta sak.

¹⁸ Tengahia ngiɗè ta ara nte ndev vatakihai. Nasa tengahi man ta tsena ma,

¹⁹ aman ta hér gèɗ. Ntétékè skwi mèshèlè, a skwi kumba, a pe ta a wai tsaɗ tsaɗ, a pizlè na ma a pa, a ta yi wuda azɓai.

²⁰ Tengahi ngiɗè ta ara sam mbelaʼa. Nasa tengaʼa man ta tsena ma, ta co, a ta yi wuda, a gi 30, 60, a 100 te verzi skwi staɗ.

Skwi nhel sam tʼhwaɗ sam mʼmènè

²¹ A ngaɗa ta a vaʼa: Ndo a fi vogwa a pitirla, aman a feda a hwaɗ gadagar, man ɓai a hwaɗ sam mʼmènè dè? Aman a fi a géɗèʼa kà ɓi dè?

²² Aman skwi nʼngheda ɓai, man a di a shinè auda azɓai; skwi man ta pizlèa azɓai, man a da gidè auda azɓai.

²³ Aman ndo man zlembaɗ na zhè, da tsenaʼa!

²⁴ A ngaɗa ta a vaʼa: Va-gu maya a géɗ skwi man kin tsenaʼa. Ta liva kinè a skwi man kin livè a vna, a ta pa kinè a vaʼa.

²⁵ Aman ta va na skwi a ndo man a ngots skwai. A nengaʼa man a ngatsa skwi ɓai, ta cèma na skwi man a ngotso ba.

Ngèlègèɗ-ma a géɗ tser skwi man a grè

²⁶ A ngaɗa ta: Kokwar-Bi Zhiklè lèmèlè me ara ndo ngiɗè man a wusheda tser skwi a herkeda.

²⁷ Ko man a nzhuna, ko man a nza a dai, ko a vaɗ ko a pats, tser skwi a fcè, a grè, a senaha azɓai.

²⁸ Herkeda a ri na a ftkoɗauda nshèlèkuraʼa vahaʼa, te deɓaʼa nshishwidèʼa, te deɓaʼa dau a di ma.

²⁹ A pats man dau nsla, ta tsiaʼa a gwodza, te man tiɗè sam ntsi skwi ma.

Ngèlègèɗ-ma a géɗ tser gevda

³⁰ A ngaɗa ta a vaʼa: Nga lèmdè kokwar Bi Zhiklè a mè?

³¹ Nga da ngredè auda a ngèlègèɗ-ma mè? Nengaʼa ara tser gevda, man ta wushahai a herkeda, nkèshèa nengaʼa a tser skwi tèlè man ta zhè tʼherkeda.

³² Aman a wushahi ma, a ftskaɗauda, a grè, a nfena vahhi ngiɗè, a tsi ri a vata, man ɗiakihi tʼhwaɗ giɗfèk ta slaha a ta gi gi ta a mèzhèɓ nengaʼa.

Njè-ma Yèsu a ngèlègèɗ-ma

³³ A Yèsu a njè ta ma Zhiklè a ngèlègèɗ mahi ar haha, ara man ta slaha a ta cinèʼa.

³⁴ A ngaɗa ta sèi a ngèlègèɗ-ma genè. A nslebda ta golahi nengaʼa te deɓaʼa a géɗ ta.

Woyam mbiaʼa a nzi géɓitèʼa a géɗ ma Yèsu

³⁵ A dakwaɗ, man pats nkala ma, Yèsu a ngaɗa ta: Ngo-dokoya a wud woyam!

³⁶ A Yèsu a njèke ta ndohi rèdèdèʼa, a to do a nda golahi nengaʼa a wurom, man nte pa.

³⁷ Wuromhi ngiɗè ta zhè a samaʼa. A kozlar mbiaʼa a nslambaɗa, a iyam a ngu tsuvoɗoh-tsuvoɗohaʼa, a bèdè a wurom, a wurom a woya a ndhè.

³⁸ A Yèsu a nzhuna te gerzi wurom, a géɗ skwi nfi gèɗ. A ta pidèkwuda, a ta gada na: Ndo njèngè ma, ka fa na gèɗ azɓi dè, aman nga zi nga?

³⁹ A Yèsu a nslambaɗa, a nguv kozlar, a ngaɗa na woyam mbiaʼa: Nze tètè, jèkeda! A kozlar a njè-keda, a nʼnza géɓitèʼa.

⁴⁰ Te deɓaʼa a ngaɗa ta: Kin ga zlau mè? Kin ca a ndav kinè ɓi dè?

⁴¹ Zlau mbiaʼa a ngs ta, a ta goɗ a va ta: Ndo haha wa, aman ko kozlar, ko iyam mbiaʼa, ta fi gèɗ a ma nengaʼa?