Marc 2 - Ma Zhiklè

Yèsu a mbel ndo vedal te matakwan nengaʼa

¹ Te deɓ mʼmèn kètè, Yèsu a mdo a deɓa a kokwar Capernaum, a ta tsena man nengaʼa te ngwai.

² Ta kumba ta ɓica va, dala a slra ɓai, ko a ntamagai. A nengaʼa a njè ta ma Zhiklè.

³ Tengahi ngiɗè ta shkè a sam na, a ta zuɓkoɗi ndo vedal a sam na. Ndohi faɗ a nzuɓkoɗai.

⁴ Aman ta slaha ta ndikè a sam nengaʼa ɓai, ndo kumba. A ta pelassa gèɗ gai, man Yèsu te pa. A ta co sam mʼmènè, man ndo vedal a pa, a ta bezda a pa a géɗ gai.

⁵ Yèsu, man a rka, ta co a ndav ta, a ngaɗa na ndo vedal: Kra ga, malihi ngaya ta pra ma!

⁶ Malamhai matskata ta nza a pa, a ta huro.

⁷ Ndo haha a goɗ ar haha èhèmè? A derɗe Zhiklè. Nslaha a mprè mali ndohi wa, Sei Zhiklè staɗgenè kla.

⁸ A nasa nasa Yèsu a sun te Mèzhèɓ na, skwi man ta hur te ndav ta, a ngaɗa ta:

⁹ Kin hur skwi kata èhèmè? Mwuɗi a te pa ɓi nangwa: Ngèɗè a ndo vedal: Mali ngaya mpra ma ɗè, ɗè slambaɗa, co sam mʼmènè ngaya, a ko do, ɗè?

¹⁰ A géɗ mana kin shinèa, wuɗi kra-ndo a zhè, aman a prè malai a géɗ herkeda, a ngaɗa na ndo vedal:

¹¹ I gaɗa ka: slambaɗa, co sam mʼmènè ngaya, a ko do ngwai!

¹² A nasa nasa a nslambaɗa, a nco sam mʼmènè na, a ndo auda a sam di ndo tèlèba. Gar haha ta tèlèba ta rzl ta, a ta slubordo Zhiklè, a ta gaɗa: Nga rka skwi ar haha di ɓai.

Yèsu a baha na Lévi

¹³ Yèsu a mdo a ma, a ma iyam mbiaʼa. Ndohi rèdèdèʼa tèlèba ta shkè a sam na, a nengaʼa a nsenda ta.

¹⁴ Aman a dè, a nrka Lévi, kra Alphée, nʼnza a ma gi duak, a ngaɗa na: Dzadzarkayè! A Lévi a nslambaɗa, a ndzodzora.

¹⁵ A Yèsu a nʼnza a gi Lévi, aman a ndi skwi nʼndai. Ndohi ncèkèlè skwai, a ndohi malihai a vata ta nza a nda Yèsu a golahi nengaʼa, te man ndohi kumba ta dzodzora.

¹⁶ Malamhai a ndohi pharisie, man ta rka, a ndi skwi nʼndai a nda ndohi malihai a ndohi ncèkèlè skwai, ta gaɗa ta golahi Yèsu: Nengaʼa a ndi skwi nʼndai a nda ndohi duakhai a ndohi malihai èhè-mè?

¹⁷ Aman Yèsu a ntsenaʼa, a ngaɗa ta: Ndohi man skwa a dza ta azɓai, ta dè a sam ndo madzaf azɓai, aman ndohi matakwan a ndè. I shkè aman i bèhè ndohi nzuraʼa ka ɓai; i shkè, a i bèhè ndohi malihai.

Njhèdè-ma a géɗ njèkè skwi nʼndai

¹⁸ A pats ngiɗè, golahi Jean a golahi malamhai ta jèkeda skwi nʼndai. A ta shkè, a ta gada na Yèsu: Golahi Jean a golahi malamhai ta jèkeda skwi nʼndai; aman golahi ngaya te jèkeda skwi nʼndi azɓi èhèmè?

¹⁹ Yèsu a ngaɗa ta: Mandalahi ntsima ta slaha ta jèkè skwi nʼndi dè, man ta a nda ntsim ta dai? A pats man ta a nda ntsim ta dai, ta slaha ta jèkeda skwi nʼndi ɓai.

²⁰ Aman pats a di a shkè, a ta da ceda ntsim tengaʼa a ma, a mandalahi nengaʼa ta da jèkeda skwi nʼndai a pats sa.

²¹ Ndo a tsi maslaka mɓuaʼa a maslaka mʼmovaʼa azɓai. Man ɓai maslaka mʼmovaʼa a zlaraha ma na, a kurècè holholaʼa.

²² Ndo a ɓéjè zom ɓeslɓiaʼa a duzlakhi man hwaɗaʼa nʼndaʼa, azɓai. Man ɓai zom ɓeslɓiaʼa a tuw ta duzlakhai, a zom ɓeslɓiaʼa a duzlakhi ta gedas ta. Aman sèi ta béjè zom ɓeslɓiaʼa a duzlakhi man hwaɗaʼa nʼnde ɓai.

Golahi Yèsu ta pèslè dau a pats nshèk va

²³ Nʼnga ar haha: a pats nshèk va, Yèsu a mbeza a ndev gi dau. A golahi nengaʼa ta hüno a ta pèsl dau.

²⁴ A ndohi pharisie ta gada na Yèsu: Ehèmè ta gi skwi ambaɓiaʼa a pats nshèk va?

²⁵ A Yèsu a ngaɗa ta: Kin jènga ɓi dè, skwi man David a gau, aman a woy skwi nʼndai, mi a nkedaʼa, a tengahi man ta zhè a sam na.

²⁶ A mdo a gi Zhiklè, te va man Abiathar bi-ndohi mvi skwi a Zhiklè. A nʼndau movar nkezlaʼa te gi Zhiklè, movar man sèi ndohi mvi skwi a Zhiklè ta ndiaʼa genè. A mva ta tengaʼa ba, man ta zhè a sam na.

²⁷ Te deɓaʼa a ngaɗa ta: Ta gu pats nshèk va a géɗ ndohai, ndo a géɗ pats nshèk va ka ɓai.

²⁸ Gar haha, krando, bai a géɗ pats nshèk va ba.