Marc 14 - Ma Zhiklè

Ndohi mbibihiaʼa ta vhe ma a géɗ a Yèsu

¹ Njèkè mʼmèn cèw, ga ngolala Pâque a movar man skwi nshégè-rè a te di ɓai. A ndohi mvi skwi Zhiklè mbibihiaʼa, a malamhai ta woy maya, aman ta gshè Yèsu a maya ncèkèlma, aman ta keɗaʼa.

² Aman ta gada: Te ngolala ka ɓai, man ɓai ndohi ta da rubai.

Ngwoz a faɗa na mbar a gèɗ Yèsu te Béthanie

³ Yèsu a zhè te Béthanie, te gi Simon, ndo hutsoɗ. Aman a ndu skwai, ngwoz ngiɗè a mshkè a gai, a koloba ɓurdi te rai, a ɓurdi mbelaʼa, nshum nengaʼa a vata. A mpaslama na ma a koloba, a mbaɗa na burdi a gèɗ Yèsu.

⁴ Tengahi ngiɗè ta gu ndav, ta ɓüco ma, a ta goɗ a va ta: Ɓurdi haha ngedas na, amba dè?

⁵ Dara man ta preda ma a Suli 300.000, a ta va ta ndohi ntawassaʼa. A ta gu ndav a géɗ ngwozaʼa.

⁶ Aman Yèsu a ngaɗa ta: Va-jèkeda ngwoz haha! Kin pra na zlau a va èhèmè? A ngu skwi man amba a sam ga.

⁷ Ndohi ntawassaʼa ta zhè a sam kinè pèc pècèk. Aman kin woy a kin ga ta skwi man amba, kin slaha. Aman iyè, i nzi a sam kinè pèc pècèk azɓai.

⁸ Nengaʼa a vau skwi man a slaha a viaʼa. A mfaɗay mbar a va, ga i metsi ga.

⁹ A vava i gada kinè, tʼherkeda tèlèba man ta da njè ma mbelaʼa, ta da gèɗè skwi man ngwoz haha a gau, a ta da hérèʼa.

Judas a woya a ga na ri a gèɗ a Yèsu

¹⁰ Judas Iscariot, staɗ te va 12, a ndo a sam ndohi mvi skwi Zhiklè mbibihiaʼa, aman a ga na ri a gèɗ a Yèsu.

¹¹ Aman ta tsenaʼa, ndav ta langlangaʼa, a ta gaɗa na: Nga da va ka sulai. A Judas a woy maya, aman a ga na ri a gèɗ a Yèsu.

Yèsu a ndi skwi nʼndi Pâque a nda golahi nengaʼa

¹² Pats man ta ndi movar man skwi nshégèrè a te di ɓai, nshèlèkuraʼa, aman ta zli tambak Pâque, golahi Yèsu ta gada na: Ka woya aman nga tila ka skwi nʼndi Pâque a ka ndiaʼa tema?

¹³ A nengaʼa a nzlündo cèw te va golahi nengaʼa, a ngaɗa ta: Vo-do a kokwar mbiaʼa, a kin da zli gèɗ a ndo ngiɗè, a duzlak a gèɗ. Va-dzodzora!

¹⁴ A sam man a dè a pa, kin gada na babgiaʼa: Ndo njèngè ma a gada: Gi mbrok ga tema, aman nga ndi skwi nʼndi Pâque a nda golahi ga?

¹⁵ A nengaʼa a da ngreda kinè gi mbiaʼa a géɗèʼa, kolongwi te pa, tèlèba ntila amba. A samaʼa i woya man kin tila nga skwi nʼndi Pâque.

¹⁶ A golahi Yèsu to do, a ta ndikè a kokwar, a ta ngots skwi tèlèba, ara man Yèsu a gada ta. A ta tila skwi nʼndi Pâque.

¹⁷ A dakwaɗ, Yèsu a mshkè a nda tengahia 12.

¹⁸ Aman ta nzahai a ta ndi skwi nʼndai, Yèsu a ngaɗa: I gada kinè a vava, staɗ te ndev kinè, man nga ndi skwi a vna, a da gay ri a gèɗ.

¹⁹ A ta hüno a ta kuɗi te ndav, a ta gada na staɗ staɗ: I dè?

²⁰ Yèsu a ngaɗa ta: Staɗ te ndev 12, nengaʼa man nga tèr ri a gandaf a vna.

²¹ Krando a dè na, ara man ta Windo te ɗèlèwèr Zhiklè a géɗ nengaʼa. Aman wobau a géɗ ndo man a ga na ri a gèɗ kra-ndo. Daraʼa man ta yoko ɓai.

Nhinè ndi skwi nkezlaʼa

²² Aman ta ndi skwi nʼndai, Yèsu a nco movar, te deɓ man a mpshè na ma, a ntsakaʼa, a mva ta, a ngaɗa:

²³ Vo-co, na haha va ga. Te deɓaʼa a nco kokwai, te deɓ nshid gèɗ, a mva ta, a ta su tèlèba te pa.

²⁴ A ngaɗa ta: Na haha Pombaz ga, Pombaz nderzlè-ma, man mbadahai a géɗ ndohi kumba.

²⁵ A vava i gaɗa kine, anai i si barassa te deɓ anta asaɓai, ha pats man i da siaʼa mɓuaʼa a nda kinè te kokwar Bi Zhiklè.

²⁶ Te deɓaʼa man ta sla dimèsh Psaume ma, to do ta a za oliviers.

Pierre a da cèkèlma a géɗ Yèsu (Mt. 26,31-35; Luc 22,31-34; Jean 13,36-38)

²⁷ Yèsu a ngaɗa ta: A vaɗ haha kin da je-kyè a pa tèlèba. Aman ta Windo te ɗèlèwèr Zhiklè: I keɗa ndo mɓér skwai, a tambakihi a ta ngezl ta.

²⁸ Aman i slambaɗkaɗauda te mʼmetsi ma, i dè a ma kinè a kokwar Galilée.

²⁹ A Pierre a ngaɗa na: Aman ta jèke ka a pa tèlèba, iyè, i jèkè ka a pa azɓai.

³⁰ A Yèsu a ngaɗa na: I gaɗa ka a vava, a patsna, a vaɗ haha, ga ngarah a tsi daʼai cèw, ka da cèkèlma a géɗ ga sak makar.

³¹ Aman Pierre a tsi gèjau genè. Ko man i metsi ga a va ka, i cèkèlma a géɗ ngaya azɓai. Tèlèba ta goɗa arsa.

Ntsi ri Yèsu te Gethsémané

³² Te deɓaʼa to do a sam man ta baha na Gethsémané, a Yèsu a ngaɗa ta golahi nengaʼa: Va-nzahai, i da tsi rai.

³³ A nco Pierre, Jacques a Jean, a hüno man a gudzai, a hér zlau te gèɗ,

³⁴ a ngaɗa ta: Nlèyè a keɗyè a hi a vèvèɗ. Va-nza haha, va-nza a dai!

³⁵ Te deɓaʼa a nco sak a ma kètè, a nkalda va na a hai, a ntsu rai. Aman a slaha, sam patsaʼa do do auda a sam na.

³⁶ A ngaɗa: Abba, Bab ga, ka slaha skwi tèlèba, co kokwi haha auda a sam ga; aman ara man i woya ka ɓai, aman ara man ka, ka woyaʼa.

³⁷ A Yèsu a mshkè a sam golahi nengaʼa, a nʼngats ta, ta nzhuna, a ngaɗa na Pierre: Simon, ka nzhuna!

³⁸ Ka slaha ka nzi a dai a nda iyè kèshkata azɓi dè! Va-nza a dai, va-tsu rai, skwa da pe kinè a wi ɓai! Mèzhèɓ a woya a ngi amba, aman wuɗi ndo azɓai.

³⁹ A mdo na zaʼa, a ntsu ri arsa genè.

⁴⁰ A mshkè a deɓa zaʼa, a nʼngats ta, ta nzhuna. Ta zhingètè, nzhunè a di tengaʼa. A ta sun ma man ta menda na ɓai.

⁴¹ A Yèsu a mshkè a deɓa mamakaraʼa, a ngaɗa ta: Antanta va-nzhun ma! Va-sok va! Dèʼa! Tiɗè sama ma! Na haha, ta va na kra-ndo a ri a ndohi malihai.

⁴² Va-slambaɗa, ngo-dokoya, na haha nengaʼa man a gay ri a gèɗ a herdeka nga va.

Ta gshè Yèsu

⁴³ A nasa nasa, aman a gèɗè dai, Judas a mshkè, staɗ te va 12, a ndohi rèdèdèʼa a nda nengaʼa, a tsakwal, a gèɗ gada. Ndohi mvi skwi a Zhiklè mbibihiaʼa a malamhai a ndohi nhalaʼa a nzlindeka ta.

⁴⁴ Ndo nʼnga na ri a gèɗ Yèsu a nʼngreda ta ar haha: Ndo man i kelawa na ri a daʼai, nengaʼa! Va-gsa mbelembela, a kin daʼa!

⁴⁵ Mshkè na, a nherda na va a Yèsu, a ngaɗa: Rabbi, a nkelawa na ri a daʼai.

⁴⁶ Te deɓaʼa ta faha ri a Yèsu, a ta gso.

⁴⁷ Staɗ te ndev tengaʼa man ta zhè a samaʼa, a mpho kafahi gwèsh, a ntsahama na zlembaɗ a ɓèl bi ndohi mvi skwi a Zhiklè.

⁴⁸ A Yèsu a ngaɗa ta: Kin shkè a sam ga, ara man kin shkè a sam ndo metsar, a tsakwal, a géɗ gada te rai, aman a kin gsyè dè?

⁴⁹ Pèc pècèk i nza a sam kinè, a i senda kinè te gi Zhiklè, aman kin gsiyè ɓai. Aman skwi a gi ara man dèlèwèr Zhiklè a gaɗa.

⁵⁰ Te deɓaʼa tèlèba ta jèkeda, a ta hu ta.

Gola man a hu na

⁵¹ Gola staɗ a ndzodzora, jampi a va genè. A ta gso.

⁵² Aman nengaʼa a mpra ta maslaka na a rai, a mhu na adai.

Yèsu a sam kita

⁵³ A ta da Yèsu a sam bi ndohi mvi skwi a Zhiklè, a sam man ndohi mvi skwi a Zhiklè mbibihiaʼa tèlèba ta ɓiceda va a pa, a ndohi nhalaʼa a malamhai.

⁵⁴ A Pierre a ndzodzor te deɓa dra, a nʼnzahai a nda ndohi mizlinè te gala bi ndohi mvi skwi a Zhiklè, aman a dzi vogwa.

⁵⁵ A ndohi mvi skwi a Zhiklè mbibihiaʼa, a ndohi kita tèlèba, ta hèsh malwuɗi a gèɗ Yèsu, aman ta slaha ta keɗaʼa. Aman ta ngatsa ɓai.

⁵⁶ Aman ndohi tsaɗ tsaɗ ta goɗ ma malwuɗi ncèkèlma a géɗ Yèsu, a malwuɗi tengaʼa nhumda ɓai.

⁵⁷ Tengahi ngiɗè ta slambaɗa, a ta tsokol ma a géɗ nengaʼa, a ta gaɗa:

⁵⁸ Nga tsena ara man a gaɗa: I woya man i mbeɗda gi Zhiklè haha aussa, man ri ndo a ngau, a i da rèm ngiɗè te mʼmèn makar, gi man ri ndo a ngu ka ɓai.

⁵⁹ Ko ar haha malwuɗi tengaʼa nhumda ɓai.

⁶⁰ Te deɓaʼa bi ndohi mvi skwi a Zhiklè a nslambaɗa te ndev nhèyè-ndo, a ndzhoɗo Yèsu: Ndohi haha ta gi ma a géɗ ngaya, ka mbedi a pa azɓi ɗè?

⁶¹ Aman Yèsu a nza tètè, a mʼmbeɗa ta a ma ɓai. Bi ndohi mvi skwi a Zhiklè a ndzhoɗo zaʼa: Ka Kristi, kra Zhiklè man ta slébèrdèʼa ɗè?

⁶² A Yèsu a ngaɗa na: I nengaʼa. A kin da rka kra-ndo, nʼnza te ri mandi Zhiklè, a di a shkè te zhiklè te va vanai.

⁶³ Te deɓaʼa bi ndohi mvi skwi a Zhiklè a nkuratseda maslaka nengaʼa aussa, a ngaɗa: Kos nga woy malwuɗi za ɗè?

⁶⁴ Kin tsenaʼa, a dérɗè Zhiklè. Kin hur kè? Tèlèba ta phomda a kita mʼmetsai.

⁶⁵ A tengahi ngiɗè ta njfa na slèslèɓ a dai, ta pizlèma na dai, a ta ɗutso, a ta gaɗa na: Ani haha, hodko ma! Nduts ka wa? A golahi ndohi mvi skwi a Zhiklè ta tsama na bazlazlam.

Pierre a cèkèlma a géɗ Yèsu

⁶⁶ Aman Pierre a zhè te gi nte godok te gala, dem mizlinè bi ndohi mvi skwi a Zhiklè staɗ a mshkè.

⁶⁷ Aman a rka Pierre, a dzi vogwa, a mpa na dai, a ngaɗa: Ka ba, kin nza a nda Yèsu te Nazareth!

⁶⁸ Pierre a ntsokol ma, a ngaɗa: I sun ɓai, i sun skwi man ka woya a ka gaɗayè a haha ɓai. Te deɓaʼa a mdo auda a dzaudzau.

⁶⁹ A dem massa, man a rkaʼa, a nhüno zaʼa, a ngaɗa ta ndohi a di vogwa tèlèba: Ndo haha staɗ te va golahi ndo sa!

⁷⁰ A Pierre a ntsokol ma zaʼa. Te deɓ kètè tengahi man ta zhè, ta gaɗa na Pierre zaʼa: Halau, ka te va ndohiaʼa; daʼai ngaya ara ndo Galilée.

⁷¹ A Pierre a hüno a ngèɗè, a mʼmbaɗa: I sun ndo man kin gèɗè haha ɓai!

⁷² A nasa nasa ngarah a ntsu daʼai macecèwaʼa. A ma Yèsu a nhaka na gèɗ a Pierre, man a ngaɗa na: Ga ngarah a tsi daʼai macecèwaʼa, ka cèkèlma a géɗ ga, sak makar a nhur a vata, a nkuɗau.