Marc 11 - Ma Zhiklè

Yèsu a dè a kokwar Jérusalem ara bai

¹ Aman ta ndikè ndul ndul a Jérusalem, Bethphagé a Béthanie, te man a za oliviers, Yèsu a nzlinde ta cèw te va golahi nengaʼa, a ngaɗa ta:

² Vo-do a kokwar a ma kinè. Aman kin da dè a pa, kin da rka gol kɗeh langa, mʼmanaʼa, ndo a nʼnza a deɓ nengaʼa di ɓai. Va-prokoɗai, a kin ckoɗai!

³ Man ndo ngiɗè a gada kinè: Kin gia kè? Kin gada na: Bai a woyaʼa. A nasa nasa a da jèka kinè langa.

⁴ A golahi Yèsu to do, a ta ngots kɗeh, mʼmanaʼa a dalmagai, a ma civèɗ, a ta prokoɗai.

⁵ Tengahi ngiɗè, man ta zlatsa a pa, ta gada ta: Kin prokodi gol kɗeh haha èhèmè?

⁶ A ta menda ta ara ngèɗè Yèsu. A ta jèkeda, aman ta dèʼa.

⁷ A ta da gol kɗeh a sam Yèsu, a ta va na maslaka ta a deɓa, a Yèsu, a nʼnza a pa.

⁸ Ndohi kumba ta wuzheda maslaka tengaʼa a civèɗ, a tengahi ngiɗè ta berzlko vah, a ta wusheda a civèɗ.

⁹ Matrhiaʼa to do a ma, matrhiaʼa ta dzodzor Yèsu, a ta boho a wuɗai: Va-nzalaʼa! Nga slébèrdè nengaʼa man a shkè haha, a nzlembaɗ Bi Zhiklè!

¹⁰ Nga slébèrdè kokwar-Bai man a shkè, kokwar-Bi David, Bab nga! Va-nzalaʼa te zhiklè te géɗèʼa!

¹¹ A Yèsu a mdo a kokwar Jérusalem, a gi Zhiklè. Aman a war skwi tèlèba ma, dakwaɗ nʼnga ma, a mdo Béthanie a nda tengahi 12.

Yèsu a phomde wof kslor

¹² Te mangoslèmaʼa, aman ta jèkeda Béthanie, mi a nkeda Yèsu.

¹³ Dra a nrka wof kslor a vaha a va, a ndo aman a wèr nyi nengaʼa. Aman a herda na va, a nrka sèi vah genè; tiɗè nyi nengaʼa di ka ɓai.

¹⁴ A hüno a ngaɗa na: Ani haha, ndo da ndu nyi ngaya ɓai a mèdèp! A golahi nengaʼa ta tsenaʼa.

Yèsu a til gi Zhiklè

¹⁵ A ta ndikè Jérusalem, a Yèsu a nʼndo a gi Zhiklè. A hüno a ndzam ta ndohi ga nai, tengaʼa man ta shum skwai, a tengaʼa man ta pre skwai, te gi Zhiklè. A nzukda table ndohi nhumbèɗè sulai, a sam nʼnzi ndohi man ta pre nkuɗhom,

¹⁶ a mva na civèɗ a ndo ɓai, aman ta bizhè a ndev gi Zhiklè a skwi a gèɗ.

¹⁷ A Yèsu a nsenda ta, a ngaɗa ta: Ta Windo te ɗèlèwèr Zhiklè ɓi ɗè, ta baha na gi ga, gi ntsi ri ndohi herkeda tèlèba. Aman kinè, kin ndeda a gi ndohi metsar.

¹⁸ A ndohi mvi skwi a Zhiklè mbibihiaʼa, a malamhai ta tsenaʼa, a ta woy maya, aman ta keɗaʼa. Aman ta gu zlau nengaʼa, te man ndohi rèdèdèʼa ta rzl ta a géɗ njè-ma nengaʼa.

¹⁹ A pats dakwaɗ, Yèsu a golahi nengaʼa ta jekeda kokwaraʼa.

Va-sundo a sam wof kslor!

²⁰ A prèk, aman ta beza a sam wof kslor, ta rkaʼa, ngwora, a zluzlora tèlèba.

²¹ A ngèɗè Yèsu man a goɗ adatsa, a nhaka na a gèɗ a Pierre, a ngaɗa na Yèsu: Na haha, Rabbi, wof kslor man ka phomda, ngwor na ma!

²² A Yèsu a mʼmbeɗa na a ma, a ngaɗa ta: Vo-co Bi Zhiklè a ndav kinè!

²³ A vava i gada kinè, aman ndo a gaɗa na za haha: Co va ngaya, a ka kalda a drav iyam, a pi gèɗ cèw azɓai, aman a nco a ndav ara man a gada, a rka, a da gi arsa.

²⁴ Na sata man i gada kinè, ko mèmè kin jhèɗèʼa tèlè a ntsi ri kinè, vo-co a ndav ara man kin ngotso, a da gi arsa, a sam kinè.

²⁵ Aman kin zlatsahai, a kin tsi rai, a ma a zhè te ndev kinè a ndo ngiɗè, va-pra na mali na, a Bab kinè ba, man a zhè te zhiklè te géɗèʼa, a prè mali kinè lèmèlèmè.

²⁶ [Aman kin prè mali ndo ngiɗè azɓai, Bab kinè ba, man a zhè te zhiklè te géɗèʼa, a da prè mali kinè azɓai, lèmèlèmè arsa].

Ta jhèɗè wuɗi-bi Yèsu

²⁷ A ta men ta a deɓa a kokwar Jérusalem. Aman Yèsu a mdo nshèwèlè a gi Zhiklè, ndohi mvi skwi a Zhiklè mbibihiaʼa, a malamhai, a ndohi nhalaʼa ta shkè a sam na, a ta gaɗa na:

²⁸ Ka gi skwi haha, a wuɗi ngè, a mva ka wuɗi wa, aman ka gi skwi ar haha?

²⁹ A Yèsu a ngaɗa ta: I dzhaɗ kinè ma ngiɗè staɗ, va-mbeɗkay a pa! Te deɓaʼa i da gada kinè, a wuɗi ngè man i gi skwi haha.

³⁰ Jean a ngu baptê-me a wuɗi ngè: a Zhiklè te géɗèʼa dè, dè a ndo dè? Va-mbeɗkay a pa!

³¹ Aman ta goɗ te ndav ta: Aman nga gada na: a Zhiklè, nengaʼa a da gada nga: Kin co a ndav kinè ɓai èhèmè?

³² Aman nga gada na: a ndo… ta gi zlau ndohi rèdèdèa, te man tèlèba ta hur a vava, Jean ndo nhadka ma.

³³ A ta mbeɗa na ma a Yèsu: Nga sun ɓai. A Yèsu a ngaɗa ta: Gar haha i ba, i ngreda kinè azɓai, a wuɗi ngè man i gi skwi haha.