Marc 1 - Ma Zhiklè

Njè-ma Jean Baptiste (Mt. 3,1-12; Luc 3,1-9; 15-17; Jean 1,19-28)

¹ Nhin ma mbelaʼa te Yèsu Kristi, kra Zhiklè,

² ara man Esaie, ndo nhadka ma, a Windo te ɗèlèwèr nengaʼa: Na haha, i zlindè bigol ga a ma ngaya, man a da til civèɗ ngaya.

³ Nengaʼa ngèɗè ndo ngiɗè, man a bèhè tʼhèshèkèɗ: Va-tila civèɗ Bi Zhiklè, va-ga civèɗ nengaʼa saraʼa!

⁴ Jean a mshkè, a ngu baptême tʼhèshèkèɗ, a nju ma baptême, aman ndohi ta ngwode ndav ta, a mali tengaʼa a mpraʼa.

⁵ A kokwar Judée tèlèba, a ndohi kokwar Jérusalem tèlèba, to do a sam nengaʼa, a Jean a nʼnga ta baptême te woyam Jourdain, a ta ngrede mali ta.

⁶ Maslaka Jean, ta tsu a gwots zlugumai, a mʼmana na gèd a hai a hutèd.

⁷ A nʼnda dzarai a vongwom. A nʼnju ma Zhiklè, a ngaɗa: Nengaʼa man a shkè te deɓ ga, wuɗi nengaʼa a fena wuɗi ga; i gi huyokokoʼa i slaha a i gshè kotokoroh nengaʼa a ri ɓai.

⁸ Iyè, i ga kinè baptême a iyam; aman nengaʼa a da ga kinè baptême te Mèzhèɓ Zhiklè nkezlaʼa.

Baptême Yèsu

⁹ A pats nasa, Yèsu a mshkè te Nazareth, te kokwar Galilée, a Jean a nʼnga na baptême te woyam Jourdain.

¹⁰ Mshkè na auda te iyam, na haha giɗfèk a mwina, a Mèzhèɓ Zhiklè a shkèhai a gèɗ nengaʼa ara nkuɗhom.

¹¹ A ta tsena ngèɗè staɗ te zhiklè te géɗèʼa: Ka kra ga, man i woy ka a ndav ga. Ndav ga a wuffè kumba a gèɗ ngaya.

Sadan a peda Yèsu a wai

¹² A nasa nasa Mèzhèɓ Zhiklè a erɗe Yèsu a hèshèkèd.

¹³ Te pa a ngau mʼmèn 40, a Sadan a mpeda a wai. Yèsu a nʼnza te ndev skwi hèshèkèd, a golahi Zhiklè ta takaha.

Yèsu a hinè mizlinè nengaʼa te Galilée

¹⁴ Te deɓa man ta gseda Jean a dangi ma, Yèsu a mdo Galilée, a njè ta ma mbelaʼa te Bi Zhiklè,

¹⁵ a ngaɗa ta: Tiɗè sama ma, kokwar Bi Zhiklè ndul ndul. Va-ngwoda ndav kinè, vo-co ma mbelaʼa a ndav!

Yèsu a baha ta ndohi mpèr klèf faɗ

¹⁶ Aman a mdo a ma iyam mbiaʼa te Galilée, a nrka Simon a André, kramam Simon, ta kèldè lata a iyam; aman tengaʼa ndohi mpèr klèf.

¹⁷ A Yèsu a ngaɗa ta: Va-dzadzarkayè, a i ndeda kinè a ndohi mpèr ndo.

¹⁸ A nasa nasa ta jèkeda latahi ta, a ta dzodzora.

¹⁹ Aman a mdo a ma kètè, a nrka Jacques, kra Zébédée, a Jean, kramam na. Ta te wurom, ta til latahai.

²⁰ Tsam tsam a mbaha ta. A ta jèkeda Zébédée, bab tengaʼa, a wurom a nda ndohi mizlinè, a ta dzodzor Yèsu.

Ndo man mèzhèɓ ambaɓiaʼa a ga na

²¹ To do Capernaum, a pats nshèk va. A nasa nasa Yèsu a ndo a gi njèngè ma Zhiklè, a nsenda ta.

²² A ta rzl ta a gèɗ njè-ma nengaʼa, te man nengaʼa a nsenda ta ara ndo man a ngots wuɗi-bai, ara malamhi ka ɓai.

²³ Te gi njèngè ma Zhiklè tengaʼa, a nkala na gèɗ a ndo man mèzhèɓ amba ɓiaʼa a ga na. Nengaʼa a ntsu lalau:

²⁴ Nga gakaɗa a ka mè, Yèsu te Nazareth? Ka shkè a ngédèsh nga ɗè? I sun ngakaɗ ngaya. Ka ndo man Zhiklè a nkezlaʼa!

²⁵ A Yèsu a nguva, a ngaɗa: Nze tètè, do auda te ndo sa!

²⁶ A mèzhèɓ ambaɓiaʼa a nʼndo na auda te ndo sa, a ntsu lalau, a ndo sa a mɓerzl na.

²⁷ A ndohi tèlèba ta rzl ta, a ta dzhoɗo a va ta: Naha mè? Njè-ma mɓuaʼa a wuɗi-bai! A gèɗè ma staɗgenè, a mèzhèɓhi ambaɓihia ba ta fi gèɗ a ma nengaʼa.

²⁸ Labar ma nengaʼa a ndo a ma ma te kokwar Galilée tèlèba a nasa nasa.

Yèsu a mbel skwar Pierre te matakwan

²⁹ Ta shkè auda te gi njèngè ma Zhiklè, a nda Yèsu a to do a Jacques a Jean, a gi Simon a André langa.

³⁰ Skwar Simon a mʼmana tʼhai, vogwa a va. Tsam tsam ta ngra na Yèsu.

³¹ A Yèsu a nherda na va, a ngso ri nengaʼa, a nslambaɗda, a vogwa a ndal na. Te deɓaʼa ngwoz a ntakaha ta.

A dakwaɗ, Yèsu a mbel ta ndohi matakwan kumba

³² A dakwaɗ man pats nkala ma, ta hulkoɗi ndohi matakwan, a ndohi tsaɗ tsaɗ man mèzhèɓ ambaɓiaʼa a ga ta a sam nengaʼa.

³³ Te kokwar tèlèba ta ɓicko va a ntamagiaʼa.

³⁴ A Yèsu a mbel ta ndohi matakwan kumba te skwi ndzi ta tsaɗ tsaɗ, a ndzorko mèzhèbhi ambaɓihiaʼa auda a vata, a mva ta civèɗ a mèzhèbhi ambaɓihiaʼa azɓai, aman ta gèɗè, a géɗ man ta sun nengaʼa.

Yèsu a shèwèldè ma Zhiklè

³⁵ A prèk vaɗ a nslambaɗa, a ndo a sam man ndo az a pa ɓai, aman a tsi ri a pa.

³⁶ A Simon a tengahi man to do a verzi na, a ta woyaʼa.

³⁷ Nʼngècè na, ta gada na: Tèlèba ta has ka.

³⁸ Nengaʼa a mʼmbeɗa ta a ma: Ngo-dokona a kokwarhi ngiɗè, aman te pa ba, i njè ta ma Zhiklè. I shkè a géɗ nengaʼa.

³⁹ A nengaʼa a njè te ma Zhiklè te gi njèngè ma Zhiklè tengaʼa, te kokwar Galilée tèlèba, a ndzar ta mèzhèbhi ambaɓihiaʼa auda.

Yèsu a suɗa ndo hutsoɗ

⁴⁰ A ndo hutsoɗ staɗ a mshkè a sam Yèsu, a nkalahi a deɓ sak nengaʼa, a ndzhoɗo: Man ka woyaʼa, ka slaha ka suɗyè.

⁴¹ A nengaʼa a nsau Yèsu te va. A ngeda rai, a nlama na, a ngaɗa na: I woyaʼa, suɗ ngaya!

⁴² A nasa nasa hutsoɗ a ndal na, a nsuɗ na.

⁴³ A Yèsu a nzlinda a deɓa langa, a mfa na ma a gèɗ:

⁴⁴ Gu maya, ka da gaɗa na ndo ngiɗè ɓai! Do, a ka ngreda na va ngaya a ndo mvi skwi a Zhiklè, a ka va na skwi ara man Moise a gada, a géɗ man ka suɗa ma. A skwi haha a gi a skwi malwuɗi a sam tengaʼa.

⁴⁵ Aman ndo matsa, ndè na auda, a hüno a njè ta maʼa a ndohi kumba; a ma haha a ndo a ma ma, aman Yèsu a slaha a ndè a kokwar a di ndo ɓai. A nʼnza a sam man ndo ngiɗè az te pa ɓai. A sam tèlèba ta shkè a sam na.