Mal. 2 - Ma Zhiklè

Njè-ma ambaɓia a

¹ Anai kinè ndohi mvi skwi a Zhiklè, i fa kinè ma a gèɗ aranta:

² Aman kin fi zlembaɗ azɓai, a kin fi gèɗ a kin njèl nzlembaɗ ga azɓai, i pra kinè ma man a phomde kinè a gèɗ, a i ngwode mpshè ma kinè a ma mphomdaʼa. Halau, i da phomde kinè, te man kin fi gèɗèʼa azɓai.

³ Na haha, i ngelama kinè rai, i da gucè kinè zi skwi man kin ndarayè a dai; skwi ngolala man kin vokoyè, i rka ara zai.

⁴ A kin da shinè, iyè man i hur a géɗ kinè, a i zlinda skwi arsa a sam kinè, a géɗ nderzlè-ma nga a Lévi, Zhiklè bi mbiaʼa a gaɗa.

⁵ Nderzlè-ma nga aranta: Iyè, i va na nshèffè a skwi mʼmbel ndo; a nengaʼa a manda gèɗ a hai a slébèrdè nzlembaɗ ga.

⁶ Ma kita nzuraʼa te ma na, ncèkèlma a te ma nengaʼa ɓai. Nengaʼa a mdo a sam di ga a gumai a nzuraʼa, a nhelka ta ndohi kumba auda te mali ta.

⁷ Ndo mvi skwi a Zhiklè a sun ma maya; a ndohi ta hèsh maya kita auda te ma na, te man nengaʼa ndo sak Zhiklè bi mbiaʼa.

⁸ Aman kinè, kin bez kinè azlawa, a kin gu aman ndohi kumba ta tawaɗaha ma kita Zhiklè. Kin pra nderzlè-ma a Lévi, Zhiklè bi mbiaʼa a gaɗa.

⁹ A géɗ nengaʼa i ga kinè a skwi man a ndara ta ndohi herkeda tèlèba, ara koskosi ndo ambalai, te man kin gsa civèɗ ga ɓai, a kin ɗöl kita nɗèlè.

Ncè ngwoz, nkwèl ngwoz

¹⁰ Nga tèlèba, bab nga staɗgenè ka ɓi ɗè? Nʼnge nga Zhiklè staɗgenè ka ɓi ɗè? A nga, nga ngwoda va nga, ngiɗè a ngiɗè, a nga derɗa nderzlè-ma bababhi nga èhè-mè?

¹¹ Juda a ngu rai, skwi man a ndara ta ndohai a gu te Israel, te Jérusalem. Aman ndohi Juda ta derɗe sam Ndo nzi pèc pècèk nkezlaʼa, man nengaʼa a woyaʼa; a woy zhiklè ncèkèlma, ara ndo man a tsima dam nte deɓa.

¹² Ndo nzi pèc pècèk da ngeldaussa te verzi ndohi Jacob, ko wawa man a gi arsa, ko ndo mvi skwi a Zhiklè!

¹³ Na haha skwi macecèwaʼa man kin giaʼa: A sam mvi skwi a Zhiklè, kin bada kuɗa a pa, a lalau a wobau; a Zhiklè a pi di a skwi man kin va na azɓai, a cè skwi te ri kinè a pombi azɓai.

¹⁴ Kin jhèɗèʼa: èhèmè? A géɗ man Ndo nzi pèc pècèk a gu malwuɗai, aman ka kwola ngwoz gol ngaya, a ka ngwoda, nengaʼa man ndo ngaya, a ngwoz man ka derzla ma a vna.

¹⁵ Nengaʼa man a ngu ndo, a va na zluèɗ va a mèzhèɓ, staɗgenè ka ɓi ɗè? Zhiklè a jhèɗè mè? Verzi ndohi man ta woy Zhiklè. Gar haha ka ngwoda ngwoz gol ngaya ɓai!

¹⁶ Nkwèl ngwoz, nkwèl bakai, ambahay ɓai, Zhiklè bi mbiaʼa a geɗa: Gar haha va-gu maya a géɗ ndav kinè. Kin gedassa nlèɓèslè kinè ɓai!

Ndo nzi pèc pècèk a shkè

¹⁷ Kin ngeza Ndo nzi pèc pècèk a tsaval kinè, a kin jhèɗè: Nga ngezaʼa a mè? Aman kin huro: Ko ndo man a gi malai, ambaha Ndo nzi pèc pècèk genè — a wuffè a géɗ nengaʼa genè — man ɓai, Zhiklè a ga na kita azɓai èhèmè?