Mal. 1 - Ma Zhiklè

¹ Ma a géɗ Israel, man Ndo nzi pèc pècèk a bezda na a ma Malachie.

Zhiklè a woy Jacob

² Te va nasa i woy kinè, Ndo nzi pèc pècèk a gaɗa. A kin jhèɗèʼa: Ka woy nga te mè? Esau kramam Jacob ka ɓi ɗè? Ndo nzi pèc pècèk a gaɗa. Ko ar haha i woy Jacob,

³ a i gi shèwa a Esau. A géɗ nengaʼa i ndeda za nengaʼa a hèshèkèɗ, a i va ta nʼndi gi nengaʼa a kdadi dak.

⁴ Aman agassa Edom a gaɗa: Nga gedassa ma ba, aman nga da ɗizlè gi man mʼmbeɗ na a pa zaʼa, Zhiklè bi mbiaʼa a gaɗa: Ta da ɗizlè a pa zaʼa, a iyè, i da mbeɗdaussa zaʼa. Ta da baha na kokwar ndohi ambaɓihiaʼa, ndohi kokwar man Ndo nzi pèc pècèk a gi ndav a géɗ tengaʼa a mèdèp.

⁵ Di kinè a da rkaʼa, a kin da gaɗa: Ndo nzi pèc pècèk mbiaʼa, ko te deɓ kuma kokwar Israel.

Skwi ambabia a man ta va na Zhiklè

⁶ Kra a slébèrdè bab na. Ɓèlè a gi zlau babgi na. Aman i bab kinè, kin slebardyè a mè? Aman i bi kinè, kin gi zlau ga te mè? Zhiklè bi mbiaʼa a gaɗa kinè, kinè ndohi mvi skwi a Zhiklè man kin derɗè nzlembaɗ ga. A kin jhèɗèʼa: Nga durɗo nzlembaɗ ngaya te mè?

⁷ Te man kin cko movar nlizhèʼa a sam mvi skwi a Zhiklè, a kin gaɗa: nga lizhè a mè? A kin huro sam mvi skwi a: Ndo nzi pèc pècèk, nga fa na gèɗ azɓai.

⁸ Aman kin cko skwi ngezladai a kin vayè, mali ka ɓi ɗè? Aman kin ckoy skwi man sak mpasla, man nhezaka, mali ka ɓi ɗè? Dara ka va na ngomna ngaya! A da wuffè a géɗ ngaya ɗè, a fe ka a ndo na nzura ɗè? Zhiklè bi mbiaʼa a gaɗa.

⁹ Aman vo-ɗöl te pa, kinè man kin va na skwi a Zhiklè arsa; ndav nengaʼa a mènèhai a kin sia te va-ɗè? Kin gau aranta a ri kinè; a slaha a fi ndo staɗ te ndev kinè a ndo na zura ɗè?

¹⁰ Dara kin pizlè ntamagi Zhiklè, a kin vècè vog-wa a sam mvi skwi a Zhiklè ambali azɓai. I wuffè a géɗ kinè azɓai, Zhiklè ndohi var a gaɗa. A skwi man kin vokoy te ri kinè, nʼngay ɓai.

¹¹ A hünkoɗi a sam man pats a vangka te pa, a ndè a sam man pats a kèlè a pa, nzlembaɗ ga mbiaʼa a sam ndohi herkeda. A sam tèlèba ta ndarayè skwi shèɗèɗèʼa a nzlembaɗ ga. Aman nzlembaɗ ga mbiaʼa a sam ndohi herkeda, Zhiklè bi mbiaʼa a gaɗa.

¹² Aman kinè, kin derɗaʼa, te man kin huro: Nga cko movar nlizhèa a sam mvi skwi a Zhiklè; nga lizhèa a mè? A kin gaɗa: Nga fa na gèɗ a sam mvi skwi Ndo nzi pèc pècèk azɓai.

¹³ A kin gaɗa: Ayah! A keɗa nga va a hai! A kin derɗyè, Zhiklè bi mbiaʼa a gaɗa. Kin cko skwi man kin hul a metsar, skwi man sak mpasla, skwi nhezakaʼa a kin vayè, a i cè te ri kinè a pombi ɗè? Zhiklè bi mbiaʼa a gaɗa.

¹⁴ Ndo nʼngwèdè ndo da phom na; mazawal te va skwi nengaʼa, man a gaɗa a va na Ndo nzi pèc pècèk; a vokoy skwi nhezakaʼa èhèmè? Iyè, i bi mbiaʼa, Zhiklè bi mbiaʼa a gaɗa. Nzlembaɗ ga mbiaʼa a sam ndohi herkeda.