Luke 8 - Ma Zhiklè

Ngwozi ngiɗè ta dè a verzi Yèsu

¹ Te deɓ nasa Yèsu a nsawala te kokwar mbiaʼa, te kokwar nkèshèa tè-lèba, a njè ta ma Zhiklè, a ma mbelaʼa man a kokwar Bi Zhiklè, a tengahi 12 a nda nengaʼa.

² A ngwozi ngiɗè, man a mbel ta te ri mezheɓhi ambaɓihiaʼa, te ri matakwan: Marie Magdala, te va nengaʼa madzagihi tsaraɗ to do auda;

³ a Jeanne, ngwoz Chuza, bigol Hérode, a Suzanne, a ngwozi ngiɗè kumba, ta takaha ta a skwi ta.

Ngèlègèɗ-ma ndo nwush tser skwai

⁴ Aman ndohi rèdèdèa ta ɓica va, a ta shkè te kokwar mbiaʼa a sam na, nengaʼa a hüno man a ngaɗa ta a ngèlègèɗ-ma:

⁵ Ndo nwush tser skwai a mdo auda, aman a wushè tser skwi na. Aman a wusheda pa, faɗkata a nwusha a civèɗ, a ta mbatsaha a sak, a ɗiakihi tʼhwaɗ giɗfèk ta ndeda ma.

⁶ Ngidè faɗkata a nwusha a verzi pra, nftsa, a ngwor na, te man iyam az a pa ɓai.

⁷ Ngidè faɗkata a nwusha a ndev vatakihai, a vatakihai, ta grè a vna, a ta pizlèda pa.

⁸ Ngidè faɗkata a nwusha a sam mbelaʼa, nftsa, a nyu wuda, a gi 100, 100. Aman a ngoɗ ma haha, a mboho: Ndo man zlembaɗ na zhè, da tsenaʼa!

Verzi ngèlègèɗ-ma

⁹ A golahi nengaʼa ta dzhoɗo: Ngèlègèd-ma haha, verzi na mè?

¹⁰ A Yèsu a ngaɗa: Skwi nʼnghedaʼa te kokwar Bi Zhiklè kin ngotso, aman kin suna. Aman tengahi ngiɗè ta ngots a ngèlègèɗ-ma, aman ta wèrèʼa, ta rka ɓai; ta tsenaʼa, ta sun ɓai.

Yèsu a ngreda verzi ngèlègèɗ-ma a géɗ ndo mwush tser skwai

¹¹ Ngèlègèd-ma haha aranta: Tser skwai, ma Zhiklè.

¹² Ndohi a civèɗ, tengahi man ta tsenaʼa, te deɓaʼa bi madzagai a shkè, a cèma ta ma te ndav ta, aman da co a ndav ɓai, da mbel ta ɓai.

¹³ Aman tengahi a verzi pra, tengaʼa man ta tsenaʼa, a ta cè ma a mwuffe, aman ta tsa zluzlor bai. Ta co a ndav nʼnzi kètè. A pats man ta pe ta a wai, ta minè a deɓa.

¹⁴ Aman nengaʼa man a nwusha a ndev vatakihai, tengaʼa man ta tsenaʼa, ta dè ta, a ta hér skwi mèshèlè a nwèl va tʼherkeda, a mpizlè na ma a pa, a grè, aman a yi wuda azɓai.

¹⁵ Aman nengaʼa a sam mbelaʼa, tengaʼa man ta ɓer ma man ta tsenaʼa, a ndav amba a nzuraʼa, ta yi wuda, a ta nzi dai.

Skwi nhél sam tʼhwaɗ kokwai

¹⁶ Ndo man a nfeda vogwa a pitirla ma, a tuzloma na kokwi a gèɗ azɓai, a fi a hwaɗ sam mʼmènè azɓai, aman a fi a géɗ sam nfi pitirla. Aman ndohi ta shkè a gai, ta rka vogwa pitirla.

¹⁷ Aman skwi nʼnghedaʼa azɓai, man a di a shinè auda azɓai. Skwi man ta pizlèa azɓai, man a dè gidè auda azɓai.

¹⁸ Va-gu maya maya ara man kin tsenaʼa! Aman a ndo man a ngots skwai, ta da va na a vaʼa. A ndo man a ngatsa skwa ɓai, ta da cèma na skwi ba man a huro, a nʼngotso.

Mam a kramamhi Yèsu

¹⁹ A mam nengaʼa, a kramamhi nengaʼa, ta shkè a sam na. A géɗ ndohi rèdèdèa ta slaha ta ndikè a sam na ɓai.

²⁰ A ta menda na Yèsu, a ta gaɗa na: Mam ngaya, a kramamhi ngaya, ta zlatsa tʼuda, a ta woy a ta rka ka.

²¹ A nengaʼa a mʼmbeɗa ta a ma: Mam ga, a kramamhi ga, tengahai, man ta tsena ma Zhiklè, a ta giaʼa.

Woyam mbiaʼa a nzi géɓitèʼa a géɗ ma Yèsu

²² A pats ngiɗè, Yèsu a mdo a wurom a nda golahi nengaʼa, a ngaɗa ta: Ngo-dokoya a wud woyam ahngata! A to do.

²³ Aman to do a géɗ iyam, Yèsu a nzhun na. A kozlar mbiaʼa a nslambaɗa, a iyam a woya a ndhè wurom, a woya a zede ta.

²⁴ Aman ta herda na va a Yèsu, a ta pidèkwuda, a ta gaɗa: Bi nga, Bi nga, nga zi nga! Aman nengaʼa a nslambaɗa, a nguva kozlar a iyam man a gu tsuvoâoh-tsuvodohaʼa, a ta jèkeda, a ta nza géɓitèʼa. A nengaʼa a ngaɗa ta: Ncè-andav kinè tema?

²⁵ A ta rzl ta, a ta huro, a ta goâ a va ta: Nengaʼa wa, aman ko kozlar, ko iyam mbiaʼa ta fi gèɗ a ma nengaʼa?

Yèsu a dzama mèzhèɓ ambaɓiaʼa auda te kokwar Gérasa

²⁶ A ta ndikè a herkeda Gérasa, zuraʼa a kokwar Galilée.

²⁷ Aman a mshkè auda te wurom, ndo ngiɗè te kokwar a mshkè, aman ta zli gèɗ a vna. Nʼnzi a zhè madzagi a ga na. A fi maslaka a va azɓai, a nzi a ngwi azɓai, sèi a gi dzavihai.

²⁸ Aman a rka Yèsu, a ntsu lalau, a nkalahi a deɓ sak nengaʼa, a ngoɗ ngèɗè a wuɗai: Nga gakaɗa a ka mè, Yèsu, ka kra Zhikiè te géɗèʼa? I tsi ri a ka, ka gay matakwan ɓai!

²⁹ Aman Yèsu a ngaɗa na mèzhèɓ ambaɓiaʼa, aman a dè auda te ndo sa. Aman pèc pècèk a gshèʼa, a ta dzawaʼa, a ta manaʼa a teɓa züdo, a züdo te sak, a ta ɓerèʼa. A ngeslda teɓa züdo aussa, a madzagai a ndzarda a hèshèkèd.

³⁰ A Yèsu a ndzhoɗo: Nzlembaɗ ngay wa? A nengaʼa a ngaɗa: Nzlembaɗ ga ‘rèdèdèa’; aman madzagihi kumba te va ndo sa.

³¹ A ta tsu riaʼa: Ka da gaɗa nga, aman nga dè a vèvèɗ pèltemtemaʼa ɓai!

³² Aman rèwè wodalahi ta zhè, ta ndi mandai a der za. A ta tsu riaʼa, aman a pre ta a va wodalahi sa. A Yèsu a mpre ta.

³³ A madzagihai to do auda te ndo sa, a to do a va wodalahai, a rèwè wodalahai ta wush ta a woyam, a ta bazl ta te woyam.

³⁴ Aman ndohi mɓer ta, ta rka skwi man a gau, ta hu ta, a ta zlèzlèmè ma haha, ta zlèzlèmè ma haha te kokwar mbiaʼa, te kokwar nkèshèa tèlèba.

³⁵ A ndohi to do, a ta rka skwi man a gau. A ta shkè a sam Yèsu, a ta rka ndo man madzagi a ga na adatsuta, nʼnzaʼa, a sam sak Yèsu, a maslaka a va, a maya te gèɗ, a zlau a ndza ta.

³⁶ A ndohi man ta zhè a pa nshèlèkuraʼa, a ta rka skwi tèlè, ta ngreda ta tengahia ngiɗè, ara ndo man madzagi a ga na adatsuta mʼmbela.

³⁷ A ndohi tèlèba ta tsu riaʼa, aman a jèkeda kokwar Gérasa, zlau a ndza ta a vata. A Yèsu a mdo a wurom, a mʼmen na a deɓa.

³⁸ A ndo man madzagai a ga na adatsuta, a ntsu riaʼa, a woya man ta nzi a vna. A Yèsu a nzlündo a deɓa, a ngaɗa:

³⁹ Do a deɓa a ngwi ngaya, a ka gaɗa ta skwi man Zhikiè a ngu a sam ngaya! A nengaʼa a ndo na, a nʼngreda ta ndohi kokwar tèlèba, skwi man Yèsu a gu a sam na.

Dem Jairus, a ngwoz man a lama na maslaka Yèsu

⁴⁰ Te deɓ nasa, aman Yèsu a mshkè a deɓa, ndohi man ta zhoro, ta haka na ma.

⁴¹ Na haha, ndo ngiɗè, nzlembaɗ na Jairus (bi ngiɗè te gi njèngè ma Zhikiè) a mshkè, a nkalahi a deɓ sak Yèsu, a ntsu riaʼa, aman a dè a gi nengaʼa.

⁴² Dem nengaʼa staɗgenè, mvi na 12, a woy mʼmetsai. Aman a ndo, ndohi rèdèdèa ta ndédècèʼa.

⁴³ A ngwoz ngiɗè, hwaɗ a va, a gi, mvi 12, a nʼndeva skwi nengaʼa tèlèba ma a sam ndohi madzaf tsaɗ tsaɗ; aman nʼnga dara ɓai.

⁴⁴ A nengaʼa a mshkè te deɓa, a nlama na ma maslaka nengaʼa. A nasa nasa Pombaz a nshe na.

⁴⁵ A Yèsu a ngaɗa: Nlamay wa? Aman tèlèba ta gaɗa: Aʼai, i ka ɓai! A Pierre a ngaɗa: Bai, ndohi rèdèdèa ta ndeɗats ka, a ka gaɗa: Nlamay wa?

⁴⁶ A Yèsu a ngaɗa: Ndo ngiɗè nlamayè, i suna, wuɗi kètè kala auda te va ga.

⁴⁷ Aman ngwoz a rka, a slaha a nʼnghede va na ɓai, a mshkè, a gudzai, a nkalahai a deɓ sak nengaʼa, a nʼngreda a sam di ndohi tèlèba, skwi man a lama na a géɗèʼa, ara man mʼmbela langa.

⁴⁸ A Yèsu a ngaɗa na: Dem ga, ncè-a-ndav ngaya a mʼmbel ka ma. Do a gumai!

⁴⁹ Njiɗè ngèɗ te ma, ndo staɗ te gi bi gi njèngè ma Zhikiè a mshkè, a ngaɗa na: Dem ngaya a mʼmets na ma. Ka gadka na matakwan a ndo njèngè ma ambali ɓai!

⁵⁰ Aman Yèsu a ntsenaʼa, a ngaɗa na: Ka gu zlau ɓai, co a ndav ngaya genè! Dem ngaya a di a mbél na.

⁵¹ Aman a mshkè a gai, a mva na civèɗ a ndo man ta dè a vna ɓai, sèi a Pierre, a Jean, a Jacques, a bab a mam dem matsa.

⁵² Tèlèba ta kuɗiaʼa. A Yèsu a ngaɗa: Kin kuɗ ɓai, nengaʼa mʼmetsa ɓai, aman a nzhunè.

⁵³ A ta ngwossaha, aman ta suna, mʼmetsa ma.

⁵⁴ Aman a dzar ta tèlèba auda ma, a ngso ri nengaʼa, a mboho, a ngaɗa na: Dam, slambaɗa!

⁵⁵ A mèzhèɓ nengaʼa a mshkè a deɓa, a nasa nasa a nslambaɗa. A Yèsu a ngaɗa ta, amari ta va na skwi nʼndai.

⁵⁶ A bab a mam demaʼa ta rzl ta holholaʼa. A Yèsu a mfa ta ma a gèɗ, aman ta ngrédè skwi man a gau a ndo azɓai.