Luke 6 - Ma Zhiklè

Golahi Yèsu ta pèslè dau a pats-nshèk-va

¹ Te deɓ nasa nʼngu ar haha: A pats nshèk va, Yèsu a mbeza a ndev gi dau, a golahi nengaʼa ta hüno a ta pèsl dau a ta shürtèʼa, a ta peɗiaʼa.

² A ndohi pharisie ngiɗè ta gaɗa ta: Kin gi skwi ambaɓiaʼa a pats nshèk va èhèmè?

³ A Yèsu a mʼmbeɗa ta a ma: Kin jènga ɓi ɗè, skwi man David a ngau, aman mi a nkedaʼa, a tengahi man ta zhè a sam na?

⁴ A ndo a gi Zhiklè, a nʼndau movar nkezlaʼa, a mva ta tengaʼa ba man ta zhè a sam na, movar man sèi ndohi mvi skwi a Zhiklè ta ndiaʼa genè?

⁵ A ngaɗa ta: Kra-ndo, bai, a géɗ pats nshèk va ba.

Ndo man ri na ngwora

⁶ Te deɓ nasa, a pats nshèk va ngiɗè, Yèsu a mdo a gi njèngè ma Zhiklè, a nsenda ta ndohai. Ndo staɗ a zhè te pa, ri mandi nengaʼa ngwora.

⁷ A malamhai, a ndohi pharisie, ta kotè Yèsu, aman ta rkaʼa: A da mbelaʼa a pats nshèk va dè? Ta woya aman ta ngècè skwai a ta pinèʼa.

⁸ Aman Yèsu a sun skwi man ta hérèa, a ngaɗa na ndo man ri nengaʼa ngwora: Slambaɗa, zlatsa a ndev ndohai! A nengaʼa a nslambaɗa, a nzlatsa a pa.

⁹ A Yèsu a ngaɗa ta: I woya man i dzhaɗ kinè: Mʼmbela nangwa; aman ta gi skwi man amba a pats nshèk va dè, dè skwi man ambaɓi dè? Aman ta mbél nshèffè dè, dè aman ta gédèshè dè?

¹⁰ Aman a pi di a ndohi tèlèba, a ngaɗa na ndo matsa: Pelaha ri ngaya! A nengaʼa a ngu arsa, a ri nengaʼa ntila ma.

¹¹ A ndohi ta gu ndav, a ta goɗ a va ta: Nga da ga na Yèsu kè?

Yèsu a par ta ndohi 12

¹² Te deɓ nasa a mdo a géɗ za, aman a tsi rai.

¹³ A vaɗ tèlèba a nʼnza, a ntsi ri a Zhiklè hzlatsagai. Aman sam nciɗa ma, a mbaha ta golahi nengaʼa, a mpar ta 12, man a gaɗa, ta ndohi sak ga.

¹⁴ Simon, man a baha na Pierre; a André, kramam na; a Jacques a Jean, a Philippe a Barthélemy,

¹⁵ a Matthieu, a Thomas, a Jacques, kra Alphée; Simon man ta baha na zélote:

¹⁶ a Jude, kra Jacques; a Judas Iscariot, nengaʼa man a nga na ri a gèɗ Yèsu.

Yèsu a njè ta ndohi rèdèdèa

¹⁷ Aman ta shkèhi te za ma, a nʼnza a nda tengaʼa a dala. Golahi nengaʼa kumba, a ndohi rèdèdèa te kokwar Judée tèlèba, te Jérusalem, te woyam Tyr a Sidon, a ta shkè, aman ta cinè ma nengaʼa, a ta mbél ta te ri matakwan tengaʼa.

¹⁸ A ndohi man mèzhèɓhi ambaɓihiaʼa a ga ta, ta mbel ta tèlèba.

¹⁹ A ndohi rèdèdèʼa tèlèba ta woy civèɗ, aman ta lama na. A wuɗi a mdo auda te va na, a mʼmbel ta tèlèba.

Mpshè ma a wobau

²⁰ A Yèsu a mpu di a golahi nengaʼa, a ngaɗa: Mwuffe a sam kinè, ndohi ntawassaʼa; aman kokwar Bi Zhiklè a kinè!

²¹ Mwuffè a sam kinè, man mi a keɗ kinè antanta; aman a di kin da ngézhè. Mwuffè a sam kinè, man kin kuɗi antanta; aman a di kin da ngwèshè.

²² Mwuffe a sam kinè, aman ndohi ta ga kinè shèwa, a ta kwol kinè, a ta phomde kinè, a ta derde nzlembaɗ kinè, a géɗ kra-ndo.

²³ A pats nasa va-wuffa, va-nzevau, aman skwi ntul kinè a gi a mbiaʼa te zhiklè. Aman lèmèlèmè babhi tengaʼa ta gu a sam ndohi nhadka ma.

²⁴ Aman Woba kinè, ndohi mèshèlè; aman kin ngots skwi ntul kinè klèng ma.

²⁵ Woba kinè, aman kin wèl va antanta; aman a di mi a da keɗ kinè. Woba kinè, aman kin ngwèshè antanta; aman a di ndav kinè a mbeɗ na, a kin kuɗai.

²⁶ Wobau, aman ndohi tèlèba ta gèɗ ma man amba a géɗ kinè; aman lèmèlèmè babhi tengaʼa ta gau a sam ndohi nhadka ma ncèkèlma.

Mwoy mayamhai

²⁷ Aman kinè, man kin tsena ma ga, i gaɗa kinè: Va-woy ndohi mayamhi kinè a ndav kinè!

²⁸ Va-ga ta skwi man amba a ndohi man ta ga kinè shèwa! Ndohi man ta phomde kinè, va-pshè ta ma! Vatsu rai a géɗ ndohi man ta derde kinè.

²⁹ Man ndo a tsama ka bazlazlam, ngwoda na civèɗ ngiɗè! Ndo man a cèma ka dawar ngaya, va na ntʼhwaɗaʼa a vaʼa!

³⁰ Ndo man a jhèdè skwi a sam ngaya, va na! Ndo man a ngezlama ka skwi ngaya, jèka na!

³¹ A skwi man kin woya ndohi ta ga kinè, va-ga ta tengaʼa lèmèlèmè.

³² Aman kin woy ndohi man ta woy kinè genè, kin fen ta ndohi ngiɗè a mè? Ko ndohi malihai ta woy tengahiaʼa man ta woy ta.

³³ Aman kin menda ta skwi man amba a deɓa a ndohi man ta ga kinè skwi man amba, kin fen ta ndohi ngiɗè a mè? Ko ndohi malihai ta gia arsa.

³⁴ Aman kin va ta skwai a nslembelom a ndohi man kin hur kin da ngècè skwi kinè a deɓa, kin fen ta ndohi ngiɗè a mè? Ko ndohi malihai ta vi skwai a nslembelom a ndohi malihai, a ta woy a ta ngècè skwi ta a deɓa.

³⁵ Aman va-woy ndohi mayamhi kinè, va-gu skwi man amba, vava ta skwi a nslembelom a ndohi man kin hur ɓai, nga ngècè mbiaʼa a deɓa. A skwi ntul kinè a gi a mbiaʼa te zhiklè, a ta da baha kinè wudahi Zhiklè te géɗèʼa. Ndohi man ta shid gèɗ azɓai, a ndohi ambaɓihiaʼa ta si Zhiklè te va genè.

³⁶ Anai, ndo da se kinè te va, lèmèlèmè ara ndohi ta si Zhiklè, Bab kinè, te va.

Mbèzlè malai a géɗ ndo ngiɗè

³⁷ Kin bazla na mali a gèɗ a ndo ngiɗè ɓai, a Zhiklè a da bazla kinè mali a gèɗ kinè azɓai. Kin pa na mali a gèɗ ndo ngiɗè ɓai, aman Zhiklè a da pa kinè mali a gèɗ azɓai. Va-pra ta mali a ndohai, a ta da pre kinè.

³⁸ Va-vau skwai, a ta da va kinè skwai. A ta liva kinè amba, a ta erɗaʼa, a ta gidèʼa, aman a zhüvahi a ri kinè. Aman a skwi man kin livè a vna, ta da livè a kinè ba.

³⁹ A ngaɗa ta a nglèlègèɗ-ma: Ndo mandazlai a slaha a nfidè ma mandazli ngiɗè ɗè? Cèw ba ta wush ta hi a vèvèɗ azɓi ɗè?

⁴⁰ Ndo man a slebi skwai, a fena ndo nsleba na azɓai. Aman ndo staɗ staɗ tèlèba, man nslebau ma, a ndi lèmèlèmè ara ndo nsleba na.

⁴¹ Ka rka kuza te di kramam ngaya, a ka rka godozlom wof te di ngaya azɓi èhèmè?

⁴² Ehèmè ka woy a ka gaɗa na kramam ngaya: Kramam ga, kazladai, i woya man i cko ka kuza auda te di ngaya! Aman na haha ka rka godozlom wof te di ngaya ɓai! Ka ndo nʼngwèdè ndo, sèi ka cko godozlom wof auda te di ngaya nshè-lèkuraʼa. Te deɓaʼa ka rka tsarayaʼa, aman ka cko kuza auda te di kramam ngaya.

Nyi wof a ngreda wofaʼa

⁴³ Wof man amba a yi wuda nengaʼa ambaɓiaʼa azɓai. A wof man ambaɓai a yi wud man amba azɓai.

⁴⁴ Aman ta sun wof staɗ staɗ tèlèba te nyi na. Ta ngècè vatak te wof kslor azɓai, a ta ndi kslor te wandar azɓai.

⁴⁵ Ndo man amba a cko skwi man amba auda te ndav nengaʼa man amba. A ndo man ambaɓai a cko skwi man ambaɓai auda te ndav nengaʼa man ambaɓai. Skwi man a nʼndha te ndav, a gaɗkaɗauda te ma.

Verzi gi cèw

⁴⁶ Kin bahayè Bai, Bai èhèmè, a kin gi skwi man i gaɗa kinè, azɓai?

⁴⁷ Ndo staɗ staɗ tèlèba man a shkè a sam ga, a tsena ma ga, a giaʼa, i war i ngreda kinè a skwi man i lèmdè a vna.

⁴⁸ Nengaʼa lèmèlèmè ara ndo man a rèm gai, a ri vèvèɗ, a pi verzi gi nengaʼa a géɗ pra. A iyam mbiaʼa a hai, a tsi gai, a slaha man a mbeɗè azɓai, te man verzi nengaʼa nra amba.

⁴⁹ Aman ndo man a tsenaʼa, a gi arsa azɓai, nengaʼa lèmèlèmè ara ndo man a ramda gi nengaʼa a géɗ wyak, verzia azɓai. A iyam mbiaʼa a hai, a tsi gai, tsam tsam mʼmbeɗa, ngedas sa tèlè.