Luke 4 - Ma Zhiklè

Madzagi a peda Yèsu a wai

¹ A Yèsu, nʼndha a Mèzhèɓ Zhiklè nkezlaʼa, a mshkè a deɓa te woyam Jourdain. A Mèzhèɓ Zhiklè a ndaʼa a hèshèkèɗ, mʼmèn 40, a bi madzagai a mpeda a wai.

² Te ndev nasa a nʼnda skwa ɓai. Te deɓaʼa, a mi a nkedaʼa.

³ A bi madzagai a ngaɗa na: Aman ka, ka kra Zhiklè, gaɗa na kwa haha a ngwode va na a movar!

⁴ A Yèsu a mʼmbeɗa na a ma: Ta Windo te ɗèlèwèr Zhiklè: Ndo a nzi a nshèffè a géɗ movar genè ka ɓai.

⁵ A bi madzagai a ndaʼa a géɗèʼa, a nʼngra na kokwar bihi herkeda tèlèba, njiɗè mpcokdai.

⁶ A bi madzagai a ngaɗa na: Wuɗi-bi haha tèlèba, a nʼnjèl nengaʼa, i da va ka. Ta te ri ga, a i va na a ndo man i woyaʼa.

⁷ Aman ka kèlèhi a deɓ sak ga, a ka tsi ri a iyè, nengaʼa tèlèba a ngaya.

⁸ A Yèsu a mʼmbeɗa na a ma: Ta Windo te ɗèlèwèr Zhiklè: Sèi ka kèlèhi a deɓ sak Bi Zhiklè ngaya genè, a ka gi mizlinè nengaʼa genè.

⁹ A bi madzagai a nʼnda Yèsu a kokwar Jérusalem, a ndaʼa a gèɗ gi Zhiklè, a ngaɗa na: Aman ka, ka kra Zhiklè, kalde va ngaya a hai a géɗèʼa haha.

¹⁰ Aman ta Windo te ɗèlèwèr Zhiklè: Zhiklè a da gaɗa ta golahi nengaʼa, aman ta ɓer ka,

¹¹ a ta ndaw ka, aman kwa a da tsama ka sak azɓai.

¹² A Yèsu a mʼmbeɗa na a ma: Ɗèlèwèr Zhiklè a gaɗa: Ka jkeda Bi Zhiklè ngaya ɓai!

¹³ Aman bi madzagai a mpeda Yèsu a wi klèng ma, a njèkaha kètè.

Yèsu a hinè mizlinè nengaʼa te Galilée

¹⁴ A Yèsu a mʼmen na a deɓa a kokwar Galilée, a wuɗi Mèzhèɓ Zhiklè nkezlaʼa. A labar ma nengaʼa a mdo a ma ma a kokwar kokwar tèlèba.

¹⁵ A Yèsu a nsenda ta te gi njèngè ma Zhiklè, tèlèba ta slébèrdèʼa.

Ta kwola Yèsu te Nazareth

¹⁶ A Yèsu a mshkè a kokwar Nazareth, a sam man a gra a pa, a ndo a gi njèngè ma Zhiklè a pats nshèk va, ara man a gia pèc pècèk, a nslambaɗa, aman a jèngè ma Zhiklè.

¹⁷ A ta va na ɗèlèwèr Esaie. Mwin ɗèlèwèr, a nʼngots samaʼa man ta Windo:

¹⁸ Mèzhèɓ Bai a géɗ ga; nengaʼa a faɗayè mbar a gèɗ, man i njè ta ma mbelaʼa a ndohi ntawassaʼa. A nzlindekayè (man i bid ta ndohi man ndav ta a kuɗai,) a i njè ta ndohi dangai, ta pra ma,

¹⁹ a ndohi mandazlai, aman a ta rka dai, a ndohi man ta lèyè, matakwan tengaʼa klèng ma, a i njè mvi-Bi man amba.

²⁰ Aman a mpizlè ɗèlèwèr ma, a mva na a deɓa a ri ndo mizlinè, a nʼnzahai. A ndohi tèlèba te gi njèngè ma Zhiklè ta pa na dai.

²¹ A Yèsu a hüno man a ngaɗa ta: Ma man kin tsena a zlembaɗ kinè, a patsna nrufa tèlèba ma.

²² A ndohi tèlèba ta goɗ ngèɗè a nda nengaʼa, a ta rzl ta a géɗ ma man amba man a shkè auda fe ma nengaʼa. A ta gaɗa: Nengaʼa kra Joseph ka ɓi ɗè?

²³ A nengaʼa a ngaɗa ta: Kin da gaɗayè a ngèlègèɗ-ma haha: Ndo madzaf, mbela va ngaya a ri ngaya! A kin da gaɗayè: Skwi tèlèba man nga tsena, ka gu te kokwar Capernaum, gu a haha ba, te kokwar bab ngaya!

²⁴ Aman nengaʼa a ngaɗa ta: A vava, i gaɗa kinè, ndo nhadka ma ambaha ta te kokwar bab na ɓai.

²⁵ A vava, i gaɗa kinè: Te va man Elie a zhè, ngwozi mazihi kumba ta zhè te kokwar Israel, te va man giɗfèk a mpizl na mvi makar a ki mokwa, a mi mbiaʼa a ngu a géɗ herkeda tèlèba.

²⁶ A Zhiklè a nzlündo Elie a sam ngiɗè ɓai, sèi a sam ngwoz mazai te Sarepta, te Sidon.

²⁷ Ndohi hutsoɗ ba kumba ta zhè te kokwar Israel, te va man Elisée a zhè. A ndo ngiɗè a nsuɗ na ɓai, sèi Naaman, ndo Syrie.

²⁸ A ndohi tèlèba te gi njèngè ma Zhiklè, man ta tsena ma haha, ta gu ndav a vata.

²⁹ A ta slambaɗa, a ta dzarɗauda te kokwar, a ta daʼa a géɗ za, man ta ramda kokwar a géɗèa, a ta woy a ta zukdahai.

³⁰ Aman nengaʼa a mbeza a ndev tengaʼa tèlèba, a mdo na.

Ndo man mèzhèɓ ambaɓiaʼa a ga na

³¹ A Yèsu a nsulomahai a Capernaum, kokwar ngiɗè te Galilée, a nsenda ta ndohi a pats nshèk va.

³² A ta rzl ta a vata a géɗ njè-ma nengaʼa. Aman ma nengaʼa a nʼngots wuɗi-bai.

³³ Ndo ngiɗè a zhè te gi njèngè ma Zhiklè, madzagi a ga na. Nengaʼa a ntsu lalau, a ngaɗa:

³⁴ Nga gakaɗa a ka mè, Yèsu te Nazareth? Ka shkè a ngedas nga dè? I sun ngakaɗ ngaya: Ka ndo man Zhiklè a nkezlaʼa!

³⁵ A Yèsu a nguva, a ngaɗa: Nze tètè, do auda te ndo sa! Aman madzagai a nkalde ndo matsa a ndev ndohai, a ndo auda te va nengaʼa; na te va ɓai.

³⁶ A ndohi tèlèba ta rzl ta, a ta goɗ a va ta: Ma haha ma mè? A fa ta ma a gèɗ a mèzhèɓhi ambaɓihiaʼa a wuɗai, a ta dè auda te va ndohai.

³⁷ A labar ma nengaʼa a ndo a ma ma a kokwar a kokwar a tsagi Capernaum tèlèba.

Yèsu a mʼmbela skwar Pierre te matakwan

³⁸ A Yèsu a nslambaɗa te gi njèngè ma Zhiklè, a ndo a gi Simon. Skwar Simon mbelakaɓai, vogwa kumba a va. A ta baha na Yèsu a géɗ nengaʼa.

³⁹ A Yèsu a nguɓda deɓ a hai a géɗ nengaʼa, a nguva vogwa man a va, a vogwa a ndal na. Tsam tsam ngwoz a nslambaɗa, a ntakaha ta. (Mt. 8, 16-17; Marc 1, 32-34)

A dakwaɗ a mʼmbel ta ndohi matakwan kumba

⁴⁰ A dakwaɗ, ta hulkoɗi ndohi matakwan a ndohi man skwa a dza ta tèlèba a Sara na. A nengaʼa a mfa ta ri a gèɗ, a mʼmbel ta.

⁴¹ Madzagihi ngiɗè to do auda te ndev ndohai, a ta tsu lalau, a ta gaɗa: Ka kra Zhiklè! A nengaʼa a nguv ta, a mva ta civèɗ aman ta gèɗè ɓai. Aman ta suna, nengaʼa Kristi.

Yèsu a shèwèldè ma Zhiklè

⁴² Aman sam nciɗa ta ma, a ndo a sam ngiɗè a géɗ na. A ndohi rèdèdèa ta woyaʼa, a ta shke a sam na, a ta zlatska na ma, a ta woya man a njèke ta ɓai.

⁴³ Aman Yèsu a ngaɗa ta: Sèi i dè a kokwar mbiaʼa ngiɗè ba, aman i njè ta ma mbelaʼa man a kokwar Bi Zhiklè. Aman Zhiklè a nzlindekayè a géɗ nengaʼa.

⁴⁴ A Yèsu a njè ta ma te gi njèngè ma Zhiklè te Judée.