Luke 3 - Ma Zhiklè

Njè-ma Jean Baptiste

¹ Aman Tibère, bi mbiaʼa, a ngu bi mvi 15 ma, Ponce Pilate, ngomna te kokwar Judée, Hérode bi te kokwar Galilée, a Philippe, kramam na, ɓi te kokwar Iturée tʼherkeda Trachonite, a Lysanias bi te kokwar Abilène.

² Te ndev nasa Anne a Caiphe, ndohi mvi skwi a Zhiklè mbibihiaʼa. A Zhiklè a ngaɗa na Jean, kra Zacharie, tʼhèshèkèɗ.

³ A Jean a mdo a sam tèlèba a ma woyam Jourdain, a nju ma baptême, aman ndohi ta ngwèdè ndav ta, a mali tengaʼa a mprè,

⁴ ara man ta Windo te ɗèlèwèr ma Esaie, ndo nhadka ma, man a gaɗa: Ngèɗè ndo ngiɗè man a bèhè tʼhèshèkèɗ: Va-tila civèɗ Bi Zhiklè, va-ga civèɗ nengaʼa saraʼa!

⁵ Nkulgodokihai tèlèba ta da ɗaɗal ta, za a ngègèɗhi tèlèba ta da mbeɗkaɗ ta a hai, a skwi ndzaraʼa a gi a civèɗ saraʼa, a kurzlazli kwahai ta da ndedahai,

⁶ a ndohi tèlèba ta da rka skwi mʼmbel ndo Zhiklè.

⁷ A nengaʼa a ngaɗa ta ndohi rèdèdèa, man ta dè a sam na, aman a ga ta baptême: Kin wud tsebarhai! Nʼngreda kinè wa, aman kin slaha a kin hi kinè a ndav Zhiklè man a di a shkè?

⁸ Va-ngreda auda zuraʼa, ara man kin ngwoda ndav kinè. Kin hur ɓai a kin gaɗa, Abraham bab nga. Aman i gaɗa kinè, Zhiklè a slaha a nyoko na wudahi a Abraham te kwahi haha.

⁹ Antanta, dzana a nʼnza te verzi wof. Wof staɗ staɗ tèlèba man a yi wuda zuraʼa azɓai, ta ngélèʼa, a ta kalda a vogwa.

¹⁰ A ndohi rèdèdèa ta dzhoɗo, a ta gaɗa na: Nga da gi mè kè?

¹¹ A nengaʼa a mʼmbeɗa ta a ma: Ndo man a ngots maslaka cèw, da va na ndo man maslaka na azɓai. Ndo man a ngots skwi nʼndai, da gu lèmèlèmè arsa.

¹² A ndohi ncèkèlè skwai ta shkè, aman a nga ta baptême.

¹³ A ta gaɗa na: Ndo njèngè ma, nga gi ke? A nengaʼa a ngaɗa ta: Kin dzhoɗo skwi ngiɗè a vaʼa ɓai, sèi skwi man ma kita a gaɗa kine.

¹⁴ A sojèhi ba ta shkè, a ta jhèɗèʼa: Nga, nga gi kè? A nengaʼa a ngaɗa ta: Kin pra na zlau a va a ndo ɓai, kin ngwoda ta ma a gèɗ a ndohi ɓai, Suli mizlinè kinè da dèʼa kinè!

¹⁵ Aman ndohi ta zhoro, a ta hur a géɗ Jean: Wa ngiɗè ba Kristi ɗè?

¹⁶ A Jean a mʼmbeɗa ta a ma a ndohi tèlèba: Iyè, i ga kinè baptême a iyam. Aman ndo ngiɗè a di a shkè, man a fena wuɗi ga, nengaʼa a da ga kinè baptême a Mèzhèɓ Zhiklè nkezlaʼa, a vogwa. I gi huyokokoʼa, i slaha a i gshè kotokoroh nengaʼa a ri ɓai.

¹⁷ Kokwi te ri na, aman a pèvè dau a hedak nengaʼa tèlèba. Dau a da ɓicè a wov nengaʼa, topok dau, a fa na vogwa man a mbècè azɓai.

¹⁸ Aman Jean a mfa ta ma tsaɗ tsaɗ a gèɗ, a njè ta ma mbelaʼa a ndohai.

¹⁹ A nʼngra na mali a Hérode, bai, a géɗ Hérodias, ngwoz kramam na. A sam skwi ambaɓiaʼa tèlèba man Hérode a gau,

²⁰ a ngu mali a vaʼa, aman a mfeda Jean a gi dangai.

Baptême Yèsu

²¹ Te deɓaʼa nʼnga ar haha: Aman Jean a ga ta baptême a ndohi tèlèba, a nʼnga na baptême a Yèsu. Aman Yèsu a ntsu rai, a giɗfèk a mwin na.

²² Mèzhèɓ Zhiklè nkezlaʼa a mshkèhai a géɗ nengaʼa, ara nkuɗhom. A ta tsena ngèɗè staɗ te zhiklè te géɗèʼa, man a gaɗa: Ka kra ga man i woy ka a ndav ga. Ndav ga a wuffè kumba a géɗ ngaya.

Verzi Yèsu

²³ Mvi Yèsu 30, man a hin mizlinè nengaʼa. A sam di ndohai, kra Joseph, kra Héli,

²⁴ nengaʼa a Matthat, a Lévi, a Melchi, a Jannai, a Joseph,

²⁵ nengaʼa a Mattathias, a Amos, a Nahum, a Esli, a Naggai,

²⁶ nengaʼa a Maath, a Mattathias, a Sémei, a Josech, a Joda,

²⁷ nengaʼa a Joanan, a Rhésa, a Zorobabel, a Salathiel, a Néri,

²⁸ nengaʼa a Melchi, a Addi, a Kosam, a Elmadam, a Er,

²⁹ nengaʼa a Jé-sus, a Eliézer, a Jorim, a Matthat, a Lévi,

³⁰ nengaʼa a Siméon, a Juda, a Joseph, a Jonam, a Eliakim,

³¹ nengaʼa a Méléa, a Menna, a Mattatha, a Nathan, a David,

³² nengaʼa a Isaie, a Jobed, a Booz, a Salmon, a Naason,

³³ nengaʼa a Aminadab, a Admin, a Ami, a Esrom, a Pharès, a Juda,

³⁴ nengaʼa a Jacob, a Isaac, a Abraham, a Thara, a Nachor,

³⁵ nengaʼa a Seruch, a Ragau, a Phalek, a Eber, a Sala,

³⁶ nengaʼa a Kainam, a Arphaxad, a Sem, a Noé, a Lamech,

³⁷ nengaʼa a Mathusala, a Enoch, a Jared, a Maléléel, a Kainan,

³⁸ nengaʼa a Enos, a Seth, a Adam, nengaʼa man Zhiklè a ngau.