Luke 23 - Ma Zhiklè

Yèsu a sam Pilate

¹ A nhèyè ndo tèlèba ta slambaɗa, a ta daʼa a sam Pilate.

² A ta hüno, a ta pinèʼa, a ta gaɗa: Nga ngotso, aman a pe ta ndohi nga a wai, a ngaɗa ta: Kin pa na budu a bi ɓai. A goɗo a ri na: I Kristi, Bai.

³ A Pilate a ndzhoɗo: Ka bi ndohi Juif dè? A nengaʼa a mʼmbeɗa na a ma: Ara ngèɗè ngaya.

⁴ A Pilate a ngaɗa ta ndohi mvi skwi a Zhiklè mbibihiaʼa, a ndohi rèdèdèa: I ngatsa mali mʼmetsai a sam ndo haha ɓai. Aman tengaʼa ta gèɗè genè:

⁵ A poko ta gèɗ auda a ndohi tèlèba, a senda ta te kokwar Judée tèlèba, a hinè te Galilée, ha mshkè haha.

Yèsu a sam Hérode

⁶ Aman Pilate a ntsena ma Galilée, a ndzhoɗo: Kos ka ndo Galilée dè?

⁷ Aman a ntsena, nengaʼa a shkè te kokwar bi Hérode, a nzlündo a sam Hérode. Hérode a zhè te kokwar Jérusalem a pats nasa.

⁸ Aman Hérode a rka Yèsu, a wuffè a vata, aman nʼnzi a zhè a woya a nrkaʼa. A ntsena ma tsaɗ tsaɗ a géɗ nengaʼa; a nhur te ndav na, i da rka nrkedi ngiɗè man a giaʼa.

⁹ A ndzhoɗo ma kumba. Aman nengaʼa a mʼmbeɗa na a ma ɓai.

¹⁰ A ndohi mvi skwi a Zhiklè mbibihiaʼa, a malamhai, ta zlatsa a pa, a ta pinèʼa holholaʼa.

¹¹ Aman Hérode a sojèhi nengaʼa ta durdo, a ta ngwossaha a ta va na maslaka mbelaʼa a va, a ta zlündo a deɓa a sam Pilate.

¹² A Pilate a Hérode ta hüno ngi mandala a pats nasa. Pats ngiɗè ta mba a va ɓai.

Ta ngela na kita mʼmetsai a gèɗ Yèsu

¹³ Aman Pilate a mbaha ta ndohi mvi skwi a Zhiklè mbibihiaʼa, a ndohi mbibihiaʼa, a ndohi tèlèba, a ngaɗa ta:

¹⁴ Kin cko ndo haha a sam ga, ara man a pe ta ndohi a wai. Na haha, i dzhoɗo, a i ngatsa mali mʼmetsi a sam ndo haha ɓai, a géɗ skwi man kin pinèʼa.

¹⁵ Ko Hérode lèmèlèmè, a mʼmendkoɗa deɓa, a nʼngatsa mali mʼmetsi ɓai.

¹⁶ I woya man i ndèhaʼa, te deɓaʼa i praʼa.

¹⁷ Aman pèc pècèk a sam ngolala ta dzhoɗo, aman a pra ta ndo staɗ.

¹⁸ A ndohi rèdèdèa tèlèba ta boho a sam staɗ, a ta gaɗa: Co a ka keɗaʼa! Pra nga Barabbas!

¹⁹ Nengaʼa te dangai a géɗ man a nkeda ndo a sam rubai te kokwar mbiaʼa.

²⁰ A Pilate a mbaha ta zaʼa, ara man a woya a mpra Yèsu.

²¹ Aman ta boho a wuɗai, a ta gaɗa: Gezlalaʼa, gezlalaʼa!

²² A nengaʼa a ngaɗa ta mamakaraʼa: A ge mali mè? I ngatsa mali mʼmetsi a sam na ɓai. I woya man i ndèhèʼa, te deɓaʼa i praʼa.

²³ Aman ta jèjèrèʼa a nhèzlèwè mbiaʼa, a ta dzhoɗo, aman a gezlalaʼa.

²⁴ A Pilate a nʼngela kita: da gu ara man ta dzhoɗo.

²⁵ A mpra ta nengaʼa man ta feda a gi dangai a géɗ nrubai, a géɗ nkeɗe ndo, nengaʼa man ta dzhoɗo. A mva na Yèsu a ri a ndohai, a ta gi a vna, ara ndav tengaʼa man a woyaʼa.

Ta gezlala Yèsu

²⁶ Aman ta dè, ta gso ndo ngiɗè, Simon te Cyrène, man a shkè te gi dau, a ta va na wof ngézlèl Yèsu a gèɗ, aman a nzuɓa na.

²⁷ A ndohi rèdèdèʼa kumba ta dzodzora, a ngwozai, man ta gu wobau, a ta kuɗau.

²⁸ A Yèsu a nʼngwoda ta rpa, a ngaɗa ta: Dalahi Jérusalem, kin kuɗau a géɗ ga ɓai, aman va-kudau a géɗ kinè, a géɗ wudahi kinè!

²⁹ Na haha, pats a di a shkè, aman ta gaɗa: Mwuffè a sam deli ngwozai, a sam ngwoz man kra az a ri ɓai, a sam ngwoz man ta tseda wa ɓai.

³⁰ Te deɓaʼa ta da gaɗa ta zahai: Va-wurzlka nga a gèɗ! A ta da gaɗa ta ngè-gèdhai: Va-mbeɗka nga a gèɗ!

³¹ Aman ta gi skwi haha a sam wof mɓayaʼa, ta da gi a sam wof ngworaʼa mè?

³² A ta da ndohi cèw ngiɗè a nda nengaʼa, ndohi nkèd ndo. Ta woy a ta bazl ta a nda nengaʼa.

³³ Aman ta shkè a sam man ta baha na ‘sam vatasl gèɗ’ ta gezlala a pa. A ndohi nkèd ndo, staɗ te ri mandai, ngiɗè te ri gula nengaʼa.

³⁴ A Yèsu a ngaɗa: Bab ga, pra ta mali ta, amari ta sun skwi man ta gia ɓai. A tengaʼa ta kezla maslaka nengaʼa, a ta gu jimèr a géɗèʼá.

³⁵ A ndohi ta zlatsa a pa a ta rkaʼa. A ndohi mbibihiaʼa ta ngwossaha, a ta gaɗa: A mʼmbel ta ndohi ngiɗè. Aman nengaʼa Kristi, ndo man Zhiklè a ngo-tskoɗauda da mbela va na a ri na!

³⁶ A sojèhi ba ta ngwossaha, a ta shke, a ta cko iyam mbertéktékaʼa, a ta gaɗa:

³⁷ Aman ka bi ndohi Juif, mbela va ngaya a ri ngaya!

³⁸ A ta Windo ma a géɗ nengaʼa: Nengaʼa bi ndohi Juif.

³⁹ Staɗ te va ndohi nked ndo, man ta gezlal ta, a dérɗèʼa, a ngaɗa: Ka Kristi ka bi dè? Mbela va ngaya a ri ngaya, a ka mbel nga ba!

⁴⁰ A ngiɗè a nʼnga na ndzoan, a mʼmbeɗa na a ma: Ka ba, ka gi zlau Zhiklè azbi dè? Ka ngots kita lèmèlèmè.

⁴¹ Nga, ta ga nga kita zuraʼa a géɗ skwi man nga gau. Aman nengaʼa a nʼnga mali bai.

⁴² A ngaɗa na Yèsu: Heryè, Bai, aman ka dè a kokwar Bi ngaya!

⁴³ A Yèsu a ngaɗa na: A vava, i gaɗa ka, a patsna ka da zhè a sam mbelaʼa a nda iyè.

Mʼmetsi Yèsu

⁴⁴ A géɗ pats, ruva a gai a géɗ herkeda tè-lèba, ha pats tsaf kata.

⁴⁵ A pats a nde na a zhiklè, a maslaka te gi Zhiklè a nkurats na te va.

⁴⁶ A Yèsu a mboho a wuɗai: Bab ga, i vi mèzhèɓ ga a ri ngaya! Aman a ngoɗ arsa, a mʼmets na.

⁴⁷ Aman bi sojè a rka skwi man a ga, a nslubordo Zhiklè, a ngaɗa: A vava, ndo haha ndo nzuraʼa.

⁴⁸ A ndohi rèdèdèʼa tèlèba man ta shkè a samaʼa, a mpi diaʼa, ta pi ri a gèɗ, a ta men ta a deɓa a ngwai.

⁴⁹ A mandalahi Yèsu, a ngwozi man ta dzodzora te Galilée, ta zlatsa dra, a ta pu dai.

Ta ra Yèsu

⁵⁰ Na haha, ndo ngiɗè, nzlembaɗ na Joseph, ndo ncemma, ndo man amba a nzuraʼa, a zhè a sam ncèmma tengaʼa; a skwi man ta gau, ambaha nengaʼa ɓai.

⁵¹ Nengaʼa te Arimathée, kokwar ndohi Juif ngiɗè. Nengaʼa ba a zhèr kokwar Bi Zhiklè.

⁵² A ndo a sam Pilate, aman a njhèdè va Yèsu.

⁵³ Aman a ckoɗahai ma, a mpaɗaʼa, a bata mbelaʼa, a mfeda a gi dzavi te za, a sam man ta fa ndo a pa di bai.

⁵⁴ A pats ntil Pâques, nciɗ samaʼa pats nshèk va.

⁵⁵ A ngwozi ngiɗè, man ta shkè te kokwar Galilée a nda Yèsu, ta dzodzor Joseph, a ta rka gi dzavai, man ta feda va Yèsu a pa.

⁵⁶ Aman ta shkè a deɓa, ta tül ɓurdi a mbar; a pats nshèk va ta sok va, ara man ma nkwèr Zhiklè a gaɗa.