Luke 21 - Ma Zhiklè

Skwi man ngwoz mazai a va na Zhiklè

¹ A Yèsu a mpu dai, a nrka ta ndohi mèshèlè, ta pi skwi man ta va na Zhiklè a koti sulai.

² A nrka ngwoz mazai ntawassa ngiɗè, a mpeda sissi cèw a pa.

³ A Yèsu a ngaɗa: A vava, i gaɗa kinè, ngwoz mazi ntawassaʼa haha a mpau, a fena ndohi ngiɗè tèlèba.

⁴ Aman ndohi ngiɗè tèlèba ta va na Zhiklè njè-kèdiaʼa te skwi man a ngeza ta ma; aman nengaʼa a mpau skwi tèlèba man a ngotso a gèɗ skwi nʼndai.

Yèsu a hodko ma a géɗ ngédèshè gi Zhiklè

⁵ Aman ndohi ngiɗè te gi Zhiklè ta gaɗa: Gi Zhiklè ndertsatsa amba, ntila a kwa mbelaʼa. A Yèsu a ngaɗa:

⁶ Skwi man kin rka haha – pats a di a shkè, aman ko kwa staɗ a nzi a géɗ ngiɗè azɓai, a da mbeɗ na tèlèba.

Skwi ngreda nga skwi mwuɗitpa

⁷ A ta dzhoɗo; Ndo njèngè ma, skwi haha a da gi a ngèmè? Gada nga, nga da shinè te mè, aman a da gi ar haha?

⁸ A nengaʼa a ngaɗa: Va-gu maya, ndo da pèkètèd kinè ɓai! Aman ta kumba ta da shkè a nzlembaɗ ga, a ta gaɗa: I nengaʼa, a patsa a zhè ndul ndul. Kin dzodzor ma tengaʼa ɓai!

⁹ Aman kin tsena ma var, a nrubi var, kin gu zlau ɓai! Skwi ar haha sèi a gi nshèlèkuraʼa dai. Aman nʼndikè-ma skwi a shkè tsam tsam di azɓai.

¹⁰ Te deɓaʼa a ngaɗa ta: Ndohi herkeda ngiɗè ta da slèmbèɗè a ta gi var a ndohi herkeda ngiɗè; kokwar-bi ngiɗè a da slambaɗa na va a kokwar-bi ngiɗè;

¹¹ herkeda a da gudzi a sam tsaɗ tsaɗ, a mi a gi a herkeda, a matakwan ambaɓiaʼa tsaɗ tsaɗ. Zlau mbiaʼa, a skwihi nʼngreda skwi mbiaʼa ta shkè te zhiklè.

¹² Aman nshèlèkuraʼa ta da fi ri a kinè. Ta da paraha kinè, ta de kinè a gi njèngè ma Zhiklè, a gi dangai, ta de kinè a sam bihai, a sam ngomna, a géɗ nzlembaɗ ga.

¹³ A skwi haha a gi a skwi malwuɗi kinè.

¹⁴ Kin hur ɓai, ara man kin woy a kin tsoko gèɗ kinè auda.

¹⁵ Aman i da va kinè ma a maya, aman ndohi mayamhi kinè ta slaha ta mbeɗa kinè a ma ɓai, a ta shèl va a sam kinè azɓai.

¹⁶ Aman ko bab a mam kinè, a kramamhi kinè, a gwoli kinè, a mandalahi kinè, ta da gs kinè, a matrehiaʼa te ndev kinè ta da bazl ta.

¹⁷ Tèlèba ta da gi shèwa a kinè, a géɗ nzlembaɗ ga.

¹⁸ Aman ko gwots gèɗ kinè staɗ a zi azɓai.

¹⁹ Aman kin mana ndav kinè a kin dè a ma ma, kin da mbél nshèffè kinè.

²⁰ Aman kin rka Jérusalem, man ndohi var ta tèuda a pa, va-huro, skwi ngedassaʼa a zhè ndul ndul.

²¹ Te deɓaʼa ndohi man ta zhè te Judée, da hu a za, a ndohi te ndev kok war Jérusalem, da wuc ta, a ndohi te dak do do a kokwar ɓai.

²² Aman nasa pats ndzoan Zhiklè, skwi tèlèba a di a giaʼa, ara man ta windo te ɗèlèwèr Zhiklè.

²³ A pats nasa Woba ngwozi man ta a hwaɗ, a ngwozi man a wuda a rai. Matakwan mbiaʼa a da zhè te kokwar, a ndzoan Zhiklè mbiaʼa a géɗ ndohai.

²⁴ A ta bazl ta a tsakwal, a ta hel ta, ndzawda, a ndev ndohi herkeda tèlèba, a ndohi nte deɓa ta da gatseda Jérusalem a pa a sak, ha nʼndikèma wuɗi ndohi nte deɓa.

Mshke kra-ndo a deɓa

²⁵ Te va pats, a kia, a bantihai, skwi ngiɗè a rkè, a ndohi a géɗ herkeda ta da gi zlau, a ta sun man ta gia ɓai. Woyam mbiaʼa a da hubètè, a gi tskuduf-tskudufaʼa,

²⁶ a ndohi ta gi sawaʼa a zlau, a ta zhèr skwi man a di a shkè a géɗ herkeda; a wuɗihi nte zhiklè te gèɗéʼa ta wurɗko va.

²⁷ Te deɓaʼa ta rka kra-ndo man a shkè te va vanai, a wuɗai a nʼnjèlè mbiaʼa.

²⁸ Aman skwihi haha ta hinè a ta giaʼa, va-zlatseda va, va-ceda gèɗ a zhiklè, aman skwi mʼmbel kinè a herdeka kinè va.

Va-döl te wof tèngètè

²⁹ A ngaɗa ta a ngèlègèɗ-ma: Va-rka wof tèngètè, a wofhi tèlèba.

³⁰ Man kin rka vah tengaʼa ta dai, vi ndul ndul ma.

³¹ Lèmèlèmè kinè ba, aman kin rka skwi haha a shkè, va-suna, kokwar Bi Zhiklè a zhè ndul ndul.

³² I gaɗa kinè a vava, ndohi man a géɗ herkeda antanta, ta da metsi azɓai, sèi skwi haha a gi dai.

³³ Gidfèk a herkeda ta ndiv ta. Aman ma ga a ndivè azɓai.

Nʼnzì a dai

³⁴ Aman kinè, va-gu maya a géɗ va kinè, ndav kinè da ndha ɓai a ntétékè skwi nʼndai, a zom, a zlau a géɗ nshèffè kinè tʼherkeda, a pats nasa a shkè a géɗ kinè tsam tsam,

³⁵ nʼngaʼa a sam ndohi herkeda tèlèba ara ɓalai.

³⁶ Anai va-nza a dai, va-tsu ri pèc pècèk, aman kin zli va kinè auda a sam skwi haha tèlèba man a di a shkè, a kin slaha a kin zlècè a sam kra-ndo.

³⁷ A pats, Yèsu a nsenda ta te gi Zhiklè. A vaɗ a mdo auda, a mʼmana a géɗ za oliviers.

³⁸ A prèk, ndohi tèlèba ta shkè a gi Zhiklè, aman ta tsena ma nengaʼa.