Luke 20 - Ma Zhiklè

Ta jhèɗè wuɗi-bi Yèsu

¹ Te deɓ nasa, aman a senda ta ndohi te gi Zhiklè, a njè ta ma mbelaʼa, ndohi mvi skwi a Zhiklè mbibihiaʼa, a malamhai, a tsuvom ndohai, ta shkè, a ta gaɗa na:

² Ngra nga, ka gi skwi haha a wuɗi ngè? A mva ka wuɗi haha wa?

³ A nengaʼa a mʼmbeɗa ta a ma: Ko i ba, i woya man i dzhaɗ kinè: Va-mendayè!

⁴ Baptême Jean a shkè te zhiklè te gèɗèʼa ɗè, ɗè te ndo ɗè?

⁵ Aman tengaʼa ta goɗ a va ta: Aman nga gaɗa: te zhiklè, nengaʼa a da gaɗa nga: Kin co ma nengaʼa a ndav kinè ɓi èhèmè?

⁶ Aman nga gaɗa: te ndo — ndohi tèlèba ta da kal nga a kwa, aman tèlèba ta huro, Jean ndo nhadka ma.

⁷ A ta mbeɗa na a ma: Nga sun ɓai.

⁸ A Yèsu a ngaɗa ta: I ba i ngreda kinè azɓai, a wuɗi ngè man i gi skwi haha.

Ngèlègèɗ-ma a géɗ gi wof barassa a ndohi mizlinè nengaʼa

⁹ Te deɓaʼa a nhüno man a ngaɗa ta ndohi a ngèlègèɗ-ma haha: Ndo ngiɗè a ngu gi wof barassa, a mva na a ri a ndohi mizlinè nengaʼa, a njèkeda kokwar; a ndo nshèwèlè nʼnzi kètè.

¹⁰ A pats man skwi nʼndha, a nzlündo ɓèl nengaʼa staɗ a sam ndohi mizlinè, aman ta porko na ny i wof. Aman ndohi mizlinè ta tsau, a ta zlündo a deɓa adai.

¹¹ A nengaʼa a nzlinda ɓèl nengaʼa ngiɗè; a ta tsau, a ta durdo, a ta zlinda a deɓa adai.

¹² A nengaʼa a nzlündo mamakaraʼa; aman ta ga na mblè a va nengaʼa ba, a ta kolkoɗauda.

¹³ A bi gi wof barassa a ngaɗa: I da gi ma kè? I woya man i zlindè kra ga man i woya a ndav ga. Man ta rka nengaʼa, wa ngiɗè ba, ta gi horai.

¹⁴ Aman ndohi mizlinè ta rkaʼa, ta goɗ a va ta: Nengaʼa ndo nʼndi gai. Vo-washkè, nga-kuɗokoya, a nga ndi gi nengaʼa!

¹⁵ A ta dzarɗauda a dal gi wof barassa, a ta keɗaʼa. Gar haha bi gi wof barassa a da ga ta mè?

¹⁶ Nengaʼa a shkè, a bazl ta ndohi mizlinè haha, a vi gi wof barassa nengaʼa a ri a ndohi ngiɗè. Aman ta tsenaʼa, ta gaɗa: Skwi haha da gu arsa ɓai.

¹⁷ A nengaʼa a mpa ta dai, a ngaɗa: Na haha, ma mè, man ta Windo: Kwa man ndohi nrèm gai ta kwolaʼa, nʼngaʼa a kwa nte verziaʼa?

¹⁸ A ndo man a kèlèhi a géɗ kwa haha, va nengaʼa a mpasl na. A ndo man kwa a nkala na a gèɗ, a hasleda a pa.

¹⁹ A malamhai a ndohi mvi skwi a Zhiklè mbibihiaʼa ta hosso a pats nasa, aman ta fi ri a Yèsu. Aman ta gu zlau ndohai. Ta suna, Yèsu a ngoɗ ngèlègèâ-ma haha a géɗ tengaʼa.

Budu bai

²⁰ A ta wèrèʼa, a ta zlinde ta ndohi nko-tèʼa; ta ngwoda va ta a ndohi nzuraʼa, a ta zeɓiaʼa: a gi mali te ma na ɗè? A ta woy a ta pinèʼa a sam ndohi mbibihiaʼa a kita ngomna.

²¹ A ta dzhoɗo; Ndo njèngè ma, nga suna, ka gèɗè ma a ka senda nga zuraʼa. Ka gi zlau ndo azɓai, sèi ka njè civèɗ Zhiklè zuraʼa.

²² Amba aman nga pi budu a bi dè, dè ambaɓi dè?

²³ Aman Yèsu a sun maya shèwa tengaʼa, a ngaɗa:

²⁴ Va-ngray Suli staɗ! Gèd ngè, man ta vèhda a pa? A ta gaɗa na: A bai. A nengaʼa a ngaɗa ta:

²⁵ Gar haha, va-va na skwi bai a bai, a skwi Bi Zhiklè a Bi Zhiklè!

²⁶ A ta slaha ta gshèʼa a géɗ ma nengaʼa ɓai, a ta rzl ta a géɗ ma nengaʼa, a ta nza tètè.

Njhèɗè-ma a géɗ nslambaɗkaɗauda te ndev ndohi mʼmetsaʼa

²⁷ Te deɓaʼa ndohi sadducée ngiɗè ta shkè. Tengaʼa ta gaɗa, nslambaɗkaɗauda te mʼmetsi azɓai.

²⁸ A ta dzhoɗo, a ta gaɗa: Ndo njèngè ma, Moise a winda nga: Man kramam ndo ngiɗè a mʼmets na, ngwoz na a zhè, aman wuda na azɓai, kramam na da co a ngwoz mazai, aman a ya na kra a kramam na.

²⁹ A kramamhi tsaraɗ ta zhè. Tsuvomaʼa a nco ngwoz, a mʼmets na, wuda na azɓai.

³⁰ Mbegédèʼa a nco a ngwoz, a mʼmets na, wuda na azɓai.

³¹ Mamakaraʼa a nco, lèmèlèmè ta tsaraɗ tèlèba, wuda ta azɓai, a ta bazl ta.

³² Te deɓ tengaʼa tèlèba, ngwoz ba a mʼmets na.

³³ A sam nslambaɗkaɗauda, a ngi a ngwoz te va 7 haha wa? Aman ta 7 tèlèba ta co a ngwoz.

³⁴ A Yèsu a ngaɗa ta: Wudahi herkeda haha ta cè ngwoz, a ta dè ngwoz.

³⁵ Aman tengahi man ta slaha ta ngècè nshèffè te zhiklè, a ta slambaɗkaɗauda te mʼmetsai, ta cè ngwoz azɓai, a ta dè ngwoz azɓai.

³⁶ Ta slaha a ta metsi te deɓaʼa azɓai, aman ta gi lèmèlèmè ara golahi Zhiklè. Ta wudahi Zhiklè, a géɗ man ta wudahi nslambaɗkaɗauda te mʼmetsai.

³⁷ Aman ko Moise a ngreda nga, ndohi mʼmetsaʼa ta slèmbèɗè. A sam vatak wondar, a mbaha na Bai, Zhiklè Abraham, Zhiklè Isaac, a Zhiklè Jacob,

³⁸ Nengaʼa Zhiklè ndohi mʼmetsaʼa ka ɓai, aman Zhiklè ndohi a nshèffè; a géɗ man te nengaʼa tèlèba ta nzi a nshèffè.

³⁹ A malamhi ngiɗè ta mbeɗa na a ma: Ndo njèngè ma, ka goɗ amba.

⁴⁰ A ta gu zlau, aman ta jhèdè ma ngiɗè a vaʼa.

Njhèɗè-ma a géɗ kra David

⁴¹ A nengaʼa a ngaɗa ta: Na haha mè, aman ta gaɗa: Kristi kra David.

⁴² A David a ri na, a ngoɗ te ɗèlèwèr Psaume: Bai a ngaɗa na bi ga:

⁴³ Nzahai a civèɗ ri mandi ga, ha i pe ta mayamhi ngaya a hwaɗ sak ngaya.

⁴⁴ Aman David a ri na a baha na Bai, kos verzi na èhèmè?

Maya maya a sam malamhai!

⁴⁵ Aman ndohi tèlèba ta tsenaʼa, a ngaɗa ta golahi nengaʼa:

⁴⁶ Va-gu maya a sam malamhai! Ta woy a ta shèwèlè a dawar a va, a ta woya ndohi ngiɗè ta ga ta mbalai a luma, a ta woy sam nʼnzi a ma te gi njèngè ma Zhiklè, a sam nʼnzi mbelaʼa a ma, te ngolala.

⁴⁷ A ta ndi gi ngwozi mazihai, a ta gi ara man ta tsi ri kumba, a sam di ndohai. Kita tengaʼa a gi wuɗitpa holholaʼa.