Luke 2 - Ma Zhiklè

Nyi Yèsu

¹ A pats nasa Bi Auguste a mbaha ta ndohi tèlèba, aman a nger ta.

² Nʼngér ndo nshèlèluraʼa sa, ta gu te va man Quirinius ngomna te kokwar Syrie.

³ A gi a gai tèlèba to do, aman ta nger ta, ngiɗè a kokwar na, ngiɗè a kokwar na.

⁴ A Joseph ba te Galilée, te kokwar Nazareth, a mdo Judée, a kokwar David, man ta baha na Bethléhem, te man nengaʼa te verzi David,

⁵ aman ta da nger ta a Marie, medemi na, kra tʼhwaɗ.

⁶ Aman ta shkè a samaʼa, ki na ma, a nyu kra nengaʼa.

⁷ A nyu tsuvom nengaʼa, kra nguraʼa, a mpaɗda a bomtèrè, a mfeda a torok, te man sam mʼmènè ngiɗè azɓai te gi mbrokihai.

Ndohi mɓer skwai, a golahi Zhiklè

⁸ A ndohi mɓer skwai ta zhè te pa te dak. Ta mana a sam skwi ta.

⁹ A na haha, gol Bi Zhiklè a mshkè a sam tengaʼa, a nʼnjèl Zhiklè a nhela sam cerh-cerhaʼa. A ta gu zlau a vata.

¹⁰ A gol Zhiklè a ngaɗa ta: Kin gu zlau ɓai! Na haha, i njè kinè ma mbelaʼa a mwuffe mbiaʼa, man a dè wuf-fedè ndohi tèlèba.

¹¹ Aman a patsna ta ya kinè te kokwar David ndo mʼmbel ndo, nengaʼa Kristi, Bai.

¹² Va-suna te skwi malwuɗi haha: Kin ngècè kra, mpaɗaʼa a bomtèrè, mʼmana tʼhai te torok.

¹³ A nasa nasa golahi Zhiklè rèdèdèa ta zhè a sam gol Zhiklè. Ta slébèrdè Zhiklè, a ta gaɗa:

¹⁴ Nʼnjèlè a sam Zhiklè te géɗèʼa, gumai a herkeda, a sam ndohai man Zhiklè a va ta pombai!

¹⁵ Aman golahi Zhiklè ta men ta a deɓa a zhiklè, ndohi mɓer skwai ta goɗ a va ta: Ngo-dokona a kokwar Bethléhem, a nga da rka skwi man a gau, man Bi Zhiklè a ngra nga a haha.

¹⁶ A to do tsam tsam, a ta ngots, Marie a Joseph, a kra mʼmana te torok.

¹⁷ Mrke na, a ta zlèzlèmè ma kra a ma ma.

¹⁸ A ndohi tèlèba man ta tsenaʼa, ta hur ma ndohi mɓer skwai, a ta rzl ta.

¹⁹ A Marie a nʼngheda ma tèlèba a ndav na, a nhérèʼa.

²⁰ A ndohi mɓer skwai ta men ta a deɓa, a ta shid gèɗ, a ta slébèrdè Zhiklè, a géɗ skwi tèlèba man ta tsenaʼa, a ta rkaʼa, ara golahi Zhiklè ta ngreda ta.

Ta ngela na ngwon a Yèsu

²¹ Te deɓ mʼmèn tsamakaɗ, aman ta ngela ngwon nengaʼa, ta va na nzlembaɗ na Yèsu, ara man gol Zhiklè a va na, man a tʼhwaɗ di ɓai.

Ta da Yèsu a gi Zhiklè

²² Man maudza nʼnga ma, ara man Moise a gaɗa, ta da kra a kokwar Jérusalem, aman ta va na a ri Bi Zhiklè

²³ (ara man ta Windo te ɗèlèwèr Zhiklè: Wudahi ngurhi tèlèba, tsuvomhi tsumvomhi tèlèba, man ta yiaʼa, wuda nkezlaʼa a sam Bi Zhiklè).

²⁴ A ta vi skwi a Bi Zhiklè, a ta pil gèɗèʼa, ara man ma kita Zhiklè a gaɗa: nkuɗhomhai cèw, man ɓai wud ngudokwarhi cèw.

²⁵ A na haha, te kokwar Jérusalem, ndo ngiɗè a zhè, nzlembaɗ na Siméon. Nengaʼa ndo nzuraʼa, a woy Zhiklè, a zhèr skwi mbid Israel, a Mèzhèɓ Zhiklè nkezlaʼa a zhè a géɗ nengaʼa.

²⁶ Mèzhèɓ Zhiklè nkezlaʼa a ngaɗa na: Ka da rka Kristi, Bi dai, ga ka metsi ngaya.

²⁷ A Mèzhèɓ Zhiklè a ndaʼa a gi Zhiklè. Aman Marie a Joseph ta cko kra ta, Yèsu, aman ta gia ara man ma Zhiklè a gaɗa,

²⁸ nenga ba a nhumbatda a rai, a nslubordo Zhiklè, a ngaɗa:

²⁹ Bai, anai ka da jèkeda ɓèl ngaya, aman a dè vèvèɗ a gumai, ara ma ngaya a gaɗa.

³⁰ Aman i rka skwi mʼmbel ndo ngaya a di ga ma,

³¹ skwi mʼmbel ndo man ka tila a sam di ndohi herkeda tèlèba;

³² skwi nhél sam man a ngreda ta civèɗ a ndohi herkeda tèlèba; nʼnjèlè a sam Israel, ndohi ngaya.

³³ Nda bab na a mam na ta rzl ta a géɗ ma man a goɗ a géɗèʼa.

³⁴ A Siméon a mpshè ta ma, a ngaɗa na Marie, mam na: Na haha, ta vau, aman ndohi kumba te Israel — ngiɗè a kèlèhai, ngiɗè a slèmbèɗè. Ta vau a skwi malwuɗai, man ta ndèvèɗ ma a géɗèʼa.

³⁵ Skwi a tezama ka ndav, ara kafahi gwèsh, a skwi man ndohi kumba ta gshè te ndav, a ngrédè auda.

³⁶ Ngwoz nhadka ma ngiɗè a zhè, nzlembaɗ na Anne, dem Phanuel, te verzi Aser. Nhala ma. Te dalai ta nza a baki na, mvi tsaraɗ.

³⁷ A nʼnde na a ngwoz mazai, ani mvi na 84 ma. A njèka gi Zhi-klè ɓai, ko a pats, ko a vaɗ, a ngu mizlinè Zhiklè a njèkeda skwi nʼndai, a ntsi rai.

³⁸ A pats nasa a mshkè, a nshid gèɗ a Zhiklè, a ngoɗ ma a gèɗ nengaʼa a sam ndohi tèlèba, man ta zhor skwi mʼmbel Jérusalem.

Mshkè a deda a kokwar Nazareth

³⁹ Aman ta ndeva skwi tèlèba ma, ara ma Bi Zhiklè a gaɗa, to do a deɓa a kokwar Galilée, a Nazareth, kokwar ta.

⁴⁰ A kra a grè, a grè, a nʼngots wuɗai, a gèɗ nengaʼa nʼndha a maya, a pombi Zhiklè a zhè a gèɗ nengaʼa.

Yèsu man kra te gi Zhiklè

⁴¹ A mvi a mvai bab a mam Yèsu ta dè a ngolala Pâque a kokwar Jérusalem.

⁴² Aman mvi Yèsu 12, to do Jérusalem, ara man ndohi Juif ta giaʼa pèc pècèk.

⁴³ Aman ngolala klèng ma, to do ta a ngwai. Yèsu a nʼnza na a deɓa, a bab na a mam na ta senaha ɓai.

⁴⁴ Ta huro, ta a nda mandalahi tengaʼa. Aman to do mʼmèn staɗ, ta woyaʼa te va mandalahi ta, te va gwoli ta.

⁴⁵ Aman ta ngatsa ɓai, to do a deɓa a kokwar Jérusalem, a ta woyaʼa.

⁴⁶ Te deɓ mʼmèn makar ta ngotso te gi Zhiklè, nʼnza te ndev ndohi njèngè ma Zhiklè, a nfi zlembaɗ a ma ta, a ndzhad ta.

⁴⁷ A ndohi tèlèba man ta tsenaʼa, ta rzl ta a géɗ ma nengaʼa, a maya nengaʼa.

⁴⁸ Aman bab a mam Yèsu ta rkaʼa, ta hur a vata. A mam na a ngaɗa na: Kra ga, ka ge nga ar haha èhèmè? Na haha, nga a bab ngaya nga has ka, a ndav nga mʼmbeɗ na.

⁴⁹ A Yèsu a ngaɗa ta: Kin woyè èhèmè? Kin sun ɓi ɗè, aman i gi sèi skwi Bab ga?

⁵⁰ Ta tsena ma nengaʼa ɓai.

⁵¹ A Yèsu a mdo a nda tengaʼa, a kokwar Nazareth, a nfu gèɗ a ma ta. A mam na a nʼngheda ma haha tèlèba a ndav na.

⁵² A Yèsu a ngrè a ma ma, a maya, a mvi a mvai, a pombai, a sam Zhiklè, a sam ndohai.