Luke 17 - Ma Zhiklè

Mali a pe nga a wai

¹ A Yèsu a ngaɗa ta golahi nengaʼa: Skwi man a slafadama ta sak a ndohi a zhè genè! Aman Woba a nengaʼa, man a slafadama ta sak a ndohai!

² Dara ta mana na vova a daʼai, a ta kalda a drav iyam, a géɗ man a slafadama na sak a kra nkèshèʼa staɗ haha. Va-gu maya a géɗ va kinè.

³ Aman kramam ngaya a gi malai, ngatsa na maya! Aman a hér mali na, pra na malai.

⁴ Aman a gi mali a sam ngaya, a gi tsaraɗ, pats staɗ, a mʼmenkaɗa deɓa sak tsaraɗ, a gaɗa: I hér mali ga, sèi ka pra na mali nengaʼa.

Ncè-a-ndav nga do do a ma ma

⁵ A ndohi sak ta gaɗa na Bai: Zledaha ncè-a-ndav nga!

⁶ A Bai a ngaɗa: Aman kin cè a ndav kèshkata, ara tser gevda, nkütèkütèʼa, ar kin da gaɗa na wof kslor haha: Ca na va ngaya auda, a ka kala a woyam mbiaʼa, a nengaʼa a fi gèɗ a ma kinè.

Mizlinè ɓèl Zhiklè

⁷ Te ndev kinè wa, man ɓèl na a zhè, a pizhè, a wèr skwai, te deɓaʼa man a shkè ngwai te gi dau, a ngaɗa na: Washkè a ka ndau skwi tsam tsam? Sèi a gaɗa na:

⁸ Tila skwi nʼndi ga, mana maslaka ngaya a ka takahayè! Aman i nda skwi ma, i sa skwi ma, te deɓaʼa ka ba ka ndi skwai, a ka si skwai.

⁹ A shida na gèɗ a ɓèl ɗè, aman a gi skwi ara man a gaɗa na? Arsa ka ɓai.

¹⁰ Lèmèlèmè kinè, aman kin gu skwi tèlèba, man ta gaɗa kinè, sèi kin gaɗa: Nga ɓèlèlihi ambalai, nga ga skwi man ta gaɗa nga genè.

Yèsu a suɗa ndohi hutsoɗ kula

¹¹ Te deɓaʼa, aman a ndo a kokwar Jérusalem, a mbeza a ndev kokwar Samarie a Galilée.

¹² Aman a mdo a kokwar ngiɗè staɗ, ta zlü gèɗ a ndohi hutsoɗ kula, man ta zlatsa dra.

¹³ A ta hüno a ta boho a wuɗai, a ta gaɗa: Yèsu, Bai, nga da se ka te va!

¹⁴ Aman a rka ta, a ngaɗa ta: Vo-do, a kin ngra ta va kinè a ndohi mvi skwi a Zhiklè! A tengaʼa, man to do, ta suɗ ta.

¹⁵ Staɗ te va tengaʼa, aman a rkaʼa, a nsuɗ na ma, a mʼmenkaɗa deɓa, a hèzlèwè a vata, a nslubordo Zhiklè.

¹⁶ A nkalahi a deɓ sak Yèsu, a nshida na gèɗ. Nengaʼa ndo Samarie.

¹⁷ A Yèsu a mʼmbeɗa na a ma: Ta kula, man ta suɗ ta ka ɓi dè? Tengahia cüd, ta tema?

¹⁸ Ndohi ngiɗè ta shkè a deɓa aman ta slébèrdè Zhiklè azɓi ɗè, sèi ndo man verzi na tsaɗ haha dè?

¹⁹ A nengaʼa a ngaɗa na: Slambaɗa, a ko do, ncè-a-ndav ngaya a mʼmbel ka ma!

Mshkè kokwar Bi Zhiklè

²⁰ Aman ndohi pharisie ta dzhoɗo: Kokwar Bi Zhiklè a shkè a ngèmè? Yèsu a mʼmbeɗa ta a ma, a ngaɗa: Kokwar Bi Zhiklè a shkè azɓai, aman ndohi ta slaha ta rkaʼa.

²¹ A ta gèɗè azɓai: Na haha, na ahngata! Aman na haha, kokwar Bi Zhiklè a zhè te ndev kinè.

²² A ngaɗa ta golahi nengaʼa: Aman a pats ngiɗè kin woy a kin rka pats kra-ndo; aman kin da rka azɓai.

²³ A ta gaɗa kinè: Na ahngata, na haha! Kin do ɓai, kin dzodzor ma tengaʼa ɓai!

²⁴ Lèmèlèmè ara ntsi iyam a hél sam tèlèba tʼhwaɗ giɗfèk, lèmèlèmè kra-ndo a da gi arsa a pats nengaʼa.

²⁵ Aman sèi skwa a dza na a vata nshèlèkuraʼa dai, a ndohi a gèɗ herkeda haha ta da kwolaʼa.

²⁶ Lèmèlèmè ara man ta gu a pats Noé, lèmèlèmè ta da gia a pats kra-ndo.

²⁷ Ta ndau, ta sau, ta co ngwoz, to do ngwoz, ha pats man Noé a ndo a wurom, a iyam mbiaʼa a mshkè, a mbazl ta tèlèba.

²⁸ Lèmèlèmè a pats Lot: Ta ndau, ta sau, ta sum skwai, ta pro skwai, ta zlekau, ta rom gai,

²⁹ aman a pats man Lot a njèke-da Sodome, vogwa a mshkèhai te zhiklè, a skwi nvècè vogwa, ara iyam, a mbazl ta tèlèba.

³⁰ Lèmèlèmè a da gia a pats nasa, aman kra-ndo a gudko va a dai.

³¹ A pats nasa – ndo man a zhè a gèɗ gai, a skwi nengaʼa a zhè te gai, da shkèhi ɓai, aman a dè hilèʼa. A ndo man a zhè te gi dau, da mena a deɓa a ngwi ɓai.

³² Va-hur ma ngwoz Lot!

³³ Ndo man a woya a mbél nshèffe na a ri na, a da zede nshèf-fè na. Ndo man a da zede nshèffè na, a da ngècè a deɓa.

³⁴ I gaɗa kinè: cèw ta mana a sam staɗ, staɗ ta cèʼa, ngiɗè ta jèkeda.

³⁵ Ngwozi cèw ta shidè, staɗ ta cèʼa, ngiɗè ta jèkeda.

³⁶ Te va ndohi cèw te gi dau, staɗ ta cèʼa, ngiɗè ta jèkeda.

³⁷ A ta gaɗa na: Bai, tema? A nengaʼa a mʼmbeɗa ta a ma: A sam skwi mʼmetsaʼa, mohodokihi ta haya a pa.