Luke 16 - Ma Zhiklè

Ngèlègèɗ-ma a géɗ ndo mizlinè nlèɓèslɓiaʼa

¹ A ngaɗa ta golahi nengaʼa: Ndo mèshèlè ngiɗè a nʼngots ndo mɓera na skwi na. A ndo ngiɗè a mpüno: a ngedassa ka skwi ngaya, ar na.

² A mbaha na, a ngaɗa na: I tsena ma mè a géɗ ngaya? Ngray ɗèlèwèr man ka windeda mizlinè ngaya a pa! Ka slaha ka ɓer skwi ga ɓai! A ndo mɓer skwai a nhuro.

³ I da gi ma kè? Bi ga a cèmay mizlinè ga. I slaha a i pizhè ɓai. I gi hori a i hèsh skwai.

⁴ I sun maya man i da giaʼa, aman a pats man ta cèmay mizlinè ga, ndohi ngiɗè ta da fiyè a gi ta.

⁵ A mbaha ta ndohi godèrè bi nengaʼa, a ngaɗa na nshèlè-kuraʼa: Godèrè bi ga a sam ngaya ngama?

⁶ A nengaʼa a ngaɗa: Mbar gongong 100. A ngaɗa na: Co ɗèlèwèr godèrè ngaya, a ka windeda pa 50, tsam tsam.

⁷ A ngaɗa na ngiɗè: Ka, godèrè a géɗ ngaya ngama? A nengaʼa a ngaɗa: Dau, bho 500. A nengaʼa a ngaɗa na: Co ɗèlèwèr godèrè ngaya, a ka windeda pa 400.

⁸ A bai a nslubordo ndo mɓer skwi nengaʼa man nzuraʼa ka ɓai, a géɗ maya man a gau. Aman ndohi herkeda haha ta fena ndohi skwi nhél sam a maya, man ta giaʼa, ngiɗè a sam ngiɗè.

⁹ Va-gu aman kin ngècè mandalahai, a nda skwi mèshèlè herkeda man zura ka ɓai. A pats man Suli klèng, ta fe kinè a gi te zhiklè te géɗèʼa.

¹⁰ Ndo man a lèɓèslè te skwi nkèshèa, a lèɓèslè te skwi mbiaʼa ba. Ndo man a gi zuraʼa azɓai te skwi nkèshèa, a gi zuraʼa azɓai te skwi mbiaʼa ba.

¹¹ Aman kin lèɓèslè ɓai te skwi mèshèlè man zura ka ɓai, nda va kinè skwi nzuraʼa a ri wa?

¹² Aman kin da lèɓèslè ɓai te skwi ndo ngiɗè, nda va kinè skwi kinè a ri wa?

¹³ Ɓèl azɓai, man a slaha a ngi mizlinè babgihi na cèw. Gar a gi shèwa a staɗ, a woy ngiɗè a ndav na, gar a gshè va a staɗ, a kwola ngiɗè. Kin slaha kin gi ɓèl Zhiklè, a ɓèl skwi mèshèlè cèw ɓai.

Ma kita Zhiklè a kokwar Bi Zhiklè

¹⁴ Ma haha, ko ndohi pharisie man ta woy Suli kumba, ta tsenaʼa, a ta ɓeslè di a pa.

¹⁵ A ngaɗa ta: Kinè ndohi man kin tsoko gèɗ kinè auda a ri kinè, a kin gaɗa: nga ndohi nzuraʼa. Aman Zhiklè a sun ndav kinè. Skwi man ndohi ta fu a skwi mbiaʼa, a ndara na Zhiklè.

¹⁶ Ma kita Zhiklè, a ma ndohi nhadka ma a ndo a ma ma, ha ndika na ma Jean. Te deɓaʼa ta njè ma mbelaʼa te kokwar Bi Zhiklè; staɗ staɗ tèlèba a dè a pa a wuɗi a va.

¹⁷ Dara giɗfèk a herkeda ta ndiv ta, a géɗ skwi nkèshèʼa te ɗèlèwèr Zhiklè a zi na.

Njè-ma Yèsu a géɗ njèkè ngwoz

¹⁸ Ko wawa man a kwola ngwoz, a cè ngiɗè, a gi mphömè. Ko wawa man a cè ngwoz, man ndo ngiɗè a nkwolaʼa, a gi mphömè.

Ndo mèshèlè a Lazare

¹⁹ Ndo mèshèlè ngiɗè a fa maslaka mbelaʼa a va, man a shum azɓai, a nʼnza, a nʼngots skwi tèlèba, a wuffè, a wèl va pèc pècèk.

²⁰ Ndo ntawassaʼa ngiɗè, nzlembaɗ na Lazare, a mʼmana a ntamagi nengaʼa, mblè kumba a va,

²¹ a woya a ndi boborɗiaʼa, man a nwushahai a sam skwi nʼndi ndo mèshèlè. A kdadihi ta shkè, a ta nèkèɗè mblè nengaʼa.

²² Te deɓaʼa ndo ntawassaʼa a mʼmets na, a golahi Zhiklè ta zuɓda a sam Abraham. A ndo mèshèlè ba a mʼmets na, a ta rda a vèvèɗ.

²³ Skwa a ndza na a vata a sam mʼmetsai. A mpu di a Zhiklè, a nrka Abraham dra, ta nza a Lazare.

²⁴ A mbaha na, a ngaɗa: Abraham, Bab ga, i da se ka te va, zlündo Lazare, a nècko iyam a kra ri nengaʼa, a nècèy a nèʼèn ga, a ntaslayè! I si matakwan a vata te ndev vogwa haha.

²⁵ Abraham a ngaɗa na: Huro, a kra ga, te va man ka zhè a géɗ herkeda, ka ngots skwi ngaya man amba, a Lazare a nʼngots skwi man ambaɓai. Antanta ta bidèʼa a haha, a skwi mwuɗitpa a ga ka.

²⁶ Te ndev nga a kinè, slrats mbiaʼa. Aman ndohi haha ta woya a ta dè ahngata, ta slaha ɓai. A ndohi ahngata ta slaha ta shkè a haha ɓai. Ndo mèshèlè a ngaɗa na:

²⁷ I tsa ka rai, a bab ga, aman ka zlindè Lazare a gi bab ga.

²⁸ Kramamhi ga zlam ngiɗè ta zhè, da ngreda ta skwi haha, aman ta da shkè a sam matakwan mbiaʼa haha ɓai.

²⁹ Abraham a ngaɗa na: Ta ngots ma Moise, a ma ndohi nhadka ma. Sèi ta cinè nengaʼa.

³⁰ A nengaʼa a ngaɗa: Aʼai, Abraham, Bab ga, sèi ndo man a shkè auda te mʼmetsai, a ndo a sam ta, a ta ngwèdè ndav ta.

³¹ A nengaʼa a ngaɗa na: Aman ta tsena ma Moise a ma ndohi nhadka ma ɓai, ta cè ma ndo man a shkè auda te mʼmetsi azɓai, lèmèlèmè.