Luke 13 - Ma Zhiklè

Nʼngwèdè ndav

¹ A pats nasa ndohi ngiɗè ta zhè, a ta menda na Yèsu: Pilate a nhumda Pombaz ndohi Galilée a Pombaz skwi man ta va na Zhiklè.

² A Yèsu a mʼmbeɗa ta a ma: Kin huro, mba mali ndohi Galilée haha a ndohi Galilée ngiɗè dè? A géɗ man ta su matakwan aranta.

³ I gaɗa kinè: Aʼai! Aman kin ngwèdè ndav kinè azɓai, kin da zi kinè lèmèlèmè.

⁴ Aman ndohi ngiɗè 18, man gi ngurèʼa te Siloé a mʼmbeɗa ta a gèɗ, kin huro, mba mali ta a gèɗ ndohi ngiɗè te kokwar Jérusalem dè?

⁵ Aʼai; aman kin ngwèdè ndav kinè azɓai, kin da zi kinè lèmèlèmè.

Ngèlègèɗ-ma wof kslor man a yi wuda azɓai

⁶ A ngaɗa ta a ngèlègèɗ-ma: Ndo ngiɗè a nʼngots wof kslor te ndev gi wof barassa na. A mshkè, a woya nyi wof te pa, a nʼngatsa bai.

⁷ A ngaɗa na ndo mɓer gi wof barassa: Na haha, mvi makar man i shkè, a i woya nyi kslor haha, á i ngatsa bai. Ngelaʼa! A baray gi wof barassa ga èhèmè?

⁸ A nengaʼa a mʼmbeɗa na a ma: Bai, jèkeda a vi na dai, a i pizhè gerzia dai, a i ndérh ndaderɗa a verzia dai.

⁹ Aman te deɓaʼa a yi wuda, amba; man ɓai ka da ngeldaussa.

Yèsu a mbela ngwoz man vedal

¹⁰ A pats nshèk va Yèsu a nsenda ta te gi njèngè ma Zhiklè.

¹¹ Na haha, ngwoz ngiɗè a zhè, mèzhèb ambaɓiaʼa a ga na, mvi 18, nhurvaʼa, a slaha a nzlècè-dè va ɓai.

¹² Aman Yèsu a rkaʼa, ambaha na, a ngaɗa na: Ngwoz, ka mbela te ri matakwan ma!

¹³ A mfa na ri a gèɗ, a nasa nasa nzlatsa saraʼa, a nslubordo Zhiklè.

¹⁴ Aman ndo mɓer gi njèngè ma Zhiklè a ngu ndav, a géɗ man Yèsu a mbelaʼa a pats nshèk va. A hüno a ngaɗa ta ndohi rèdèdèa: Mʼmèn mokwa ta gi mizlinè. Vo-washkè, da mbel kinè te matakwan tʼhwaɗ mʼmèn mokwa, a pats nshèk va ka ɓai!

¹⁵ A Bai Yèsu a ngaɗa na: Ndohi nʼngwèdè ndo! Kin prè zlè a kɗèh auda te kudom, a kin de ta a ma iyam a pats nshèk va azbi dè?

¹⁶ Aman ngwoz haha, dem Abraham, man Sadan a ndzawaʼa mvi 18, da pra teɓa nengaʼa a pats nshèk va ɓi dè?

¹⁷ Aman a ngoɗ ma haha, ndohi tèlèba man ta sassaya ndav ta a sam na, ta gu horai. A ndohi rèdèdèʼa ta wuffè a géɗ skwi mbiaʼa tèlèba man Yèsu a gau.

Ngèlègèɗ-ma a gèɗ tser gevda

¹⁸ A ngaɗa: I lèmdè kokwar Bi Zhiklè a mè?

¹⁹ Nengaʼa ara tser gevda, man a nwushahai a gi dau ndo ngiɗè. A grè, a grè, a gi a wof, man ɗiakihi tʼhwaɗ giɗfèk ta gi gi ta a hwaɗaʼa.

Ngèlègèɗ-ma a géɗ skwi nshégèr skwai

²⁰ A ngoɗ zaʼa: I lèmdè kokwar Bi Zhiklè a mè?

²¹ Lèmèlèmè ara skwi nshégèr skwai, man ngwoz a nco, a nhumda na va a gufa, a gi agoda 30, ha tèlèba nsegaraʼa.

Ntamagi nlühaʼa

²² A Yèsu a nsawala te kokwar mbiaʼa, te kokwar nkèshèa tèlèba, a nsenda ta. A ndo a kokwar Jérusalem.

²³ A ndo ngiɗè a ngaɗa na: Bai, ndohi kètè genè, man ta mbél ta ɗè? A Yèsu a ngaɗa ta:

²⁴ Va-gu wuɗai, a kin bizhè a ntamagi nlühaʼa. I gaɗa kine, ndohi kumba ta woy a ta dè a pa, aman ta slaha ɓai.

²⁵ Te deɓaʼa, aman babgiaʼa a nslambaɗa, a mpizla ntamagi ma, a kin zlatsa tʼuda, a kin bèhè a ntamagai, a kin gaɗa: Bai, wina nga! A nengaʼa a da mbeɗa kinè a ma: I sun sam man kin shkè te pa ɓai!

²⁶ Te deɓaʼa kin hinè a kin gaɗa: Nga ndau skwi a nda ka, nga sau skwi a nda ka, a ka senda nga a gaba nga.

²⁷ A nengaʼa a da gaɗa ta: I gaɗa kinè, i sun sam man kin shkè te pa ɓai. Va-kazlay auda a tsagai, kinè ndohi mphömè!

²⁸ Te deɓaʼa kin kuɗai, a kin peɗi zlèʼèn. A kin da rka Abraham, a Isaac, a Jacob, a ndohi nhadka ma te kokwar Bi Zhiklè. A kinè, ta dzam kinè auda.

²⁹ A di ndohi ta shkè te man a verzi gai, te géɗèʼa, te tsagi te tsagai, a ta ndi skwi te kokwar Bi Zhiklè.

³⁰ A na haha, ndohi ngiɗè te va nʼndikèma ndohai, ta da ndi a ndohi nshèlèkurhiaʼa. A ndohi nshèlèkurhiaʼa ta da ndi a nʼndikèma ndohai.

Yèsu a kuɗi a géɗ kokwar Jérusalem

³¹ A pats nasa ndohi pharisie ngiɗè ta shkè, a ta gaɗa na: Do ngaya, jèkeda sam haha, aman Hérode a woya a keɗ ka. A nengaʼa a ngaɗa ta:

³² Vo-do, a kin gaɗa na zhüzhok ndoʼa: Na haha i jèr madzagihai, i mbél ndohi matakwan, a patsna, angoslèm dai. Te pats mamakaraʼa i da ndeva mizlinè ga ma.

³³ Aman sèi i shè-wèlè a patsna, angoslèm, anvakastaɗ dai. Ambaɓai, aman ndo nhadka ma a metsi na dra a kokwar Jérusalem.

³⁴ Jérusalem, Jérusalem, man ka bazl ta ndohi nhadka ma, a ka kal ta ndohi man Zhiklè a zlinde ta a sam ngaya, a kwa! Sak ngama, man i woy a i ɓic ta wudahi ngaya a sam ga, ara wotsak man a ɓic ta wudahi na a hwaɗ kelpasl na. A kin woya ɓai.

³⁵ Na haha, ta da jèkeda gi kinè a dikai. Aman i gaɗa kinè: Anai kin da rkayè asaɓai, ha pats man kin da gaɗa: Nga slébèrdè nengaʼa man a shkè a nzlembaɗ Bi Zhiklè.