Luke 12 - Ma Zhiklè

Va-gu maya a sam nʼngwèdè ndo!

¹ Aman ndohi a gi gozhèm gozhèm kumba ta ɓica va, sam mbècè sak azɓai, a hüno a ngaɗa ta golahi nengaʼa nshèlèkuraʼa: Va-gu maya a sam skwi ndohi pharisie man a shégèrè; aman nengaʼa skwi nʼngwèdè ndo.

² Aman skwi man mpizlèa pa, azɓai, man a di a gidè va auda azɓai. A skwi man ta gu a metsar azɓai, man ndo a di a shinè azɓai.

³ Gar haha ma man kin goɗo te ruva, a cinè a sam nhelaʼa. A skwi man kin gaɗa na a ndo ngiɗè a metsar te gai; kala auda a gèɗ gai.

Nga gi zlau nge?

⁴ I gaɗa kinè, mandalahi ga: Kin gu zlau tengaʼa ɓai, man ta keɗa va kinè, te deɓaʼa ta slaha ta ga kinè skwi ngiɗè ɓai.

⁵ Aman i woya man i ngra kinè nengaʼa man sèi kin gi zlauaʼa: va-gu zlau nengaʼa, man te deɓ man a keɗe kinè, a slaha man a kalda kinè a vogwa kita. Halau, i gaɗa kinè, va-gu zlau nengaʼa!

⁶ Ta prè shishihi zlam a Suli cèw ka ɓi ɗè? Ko staɗ a mpca na a gèɗ a Bi Zhiklè ɓai.

⁷ Ko gwots gèɗ kinè nʼngraʼa tèlèba. Kin gu zlau ɓai, kin fena shishihi kumba.

Nʼngrédè Yèsu auda a sam ndohai

⁸ Aman i gaɗa kinè: Ko wawa man a ngredyè auda a sam ndohai, kra-ndo ba a ngrédèʼa a sam golahi Zhiklè.

⁹ Aman ko wawa man a gi ara man a senyè ɓai a sam ndohai, kra-ndo a da gi ara man a sun nengaʼa ɓai a sam golahi Zhiklè.

¹⁰ Ko wawa man a gèɗè ma ambaɓiaʼa staɗ a gèɗ kra-ndo, mali nengaʼa a prè. Aman nengaʼa man a derɗa Mèzhèɓ Zhiklè nkezlaʼa, mali nengaʼa a prè azɓai.

¹¹ Aman ta de kinè a sam ndohi njèngè ma Zhiklè, a sam bihai, a sam kita, kin gu zlau ɓai a gèɗ ma man kin woy a kin gaɗa ta, ara man kin tsoko gèɗ kinè auda.

¹² Aman Mèzhèɓ Zhiklè nkezlaʼa a da ngra kinè skwi man kin gèɗèʼa a pats nasa.

Ngèlègèɗ-ma ndo mèshèlè nrzlaʼa

¹³ Ndo ngiɗè te va ndohi rèdèdèa a ngaɗa na: Ndo njèngè ma, gaɗa na kramam ga, aman nga kezla skwi nʼndi gi bab nga.

¹⁴ A Yèsu a ngaɗa na: Masli ga, a mfiyè a ndo kita, a ndo nkezli skwi a sam kinè wa?

¹⁵ A ngaɗa ta ndohi tèlèba: Va-rkaʼa, va-gu maya a ntétékè skwai. Ndo a nzi a nshèffè azɓai, a géɗ skwi man a ngotso kumba.

¹⁶ A ngaɗa ta ngèlègèɗ-ma: Ndo mèshèlè ngiɗè a mɓüco skwi kumba te gi dau na.

¹⁷ A nhuro: I gi kè? I ngatsa sama man i ɓica a pa ɓai. A ngaɗa: I woy a i gi ar haha:

¹⁸ I ngézleda wov ga a hai, a i rèm ngiɗè, mbiaʼa. I woya man i ɓicè skwi ga tèlèba a pa, a i woya man i gèɗè te ndav ga:

¹⁹ Ka ngots skwi kumba, te di mvi a vata ba. Sok va, ndau skwai, sau skwai, wuffa!

²⁰ Aman Zhiklè a ngaɗa na: Ka rzla! A vaɗ haha Zhiklè a da jhèdè nshèffè te ri ngaya, a skwi man ka ɓica haha, a nda ndiaʼa wa?

²¹ Gar haha ndo man a ɓicè skwai a va na, a nʼngatsa skwi mèshèlè a sam Zhiklè ɓai.

Nhèr gèɗ zlau a géɗ nshèffè

²² A ngaɗa ta golahi nengaʼa: Gar haha i gaɗa kinè: Kin hur gèɗ a géɗ nshèffè kinè ɓai, a géɗ skwi man kin ndiaʼa, a géɗ va kinè, a géɗ skwi man kin fi a va.

²³ Nshèffè a fena skwi nʼndai, va a fena maslaka.

²⁴ Va-rka ɗiakihai, ta zleki azɓai, ta ɓicè skwi azɓai, ta ngatsa gi a wov ɓai, a Zhiklè a mva ta skwi nʼndi gene. A kin fen ta ɗiakihi a vata ba!

²⁵ Te ndev kinè wa, man a slaha a nherda na va a ngurè nengaʼa, ntsi ri staɗ?

²⁶ Aman kin slaha a kin ga ko skwi nkèshèa ɓai, kin hér gèɗ zlau a géɗ skwi ngiɗè èhèmè?

²⁷ Va-rka nwurzhè mbèbèzh. Ta min gogumi azɓai, ta gi mizlinè azɓai. Aman i gaɗa kinè, ko Salomon a nʼnjèl nengaʼa tèlèba nʼnga ara staɗ te va tengaʼa ɓai.

²⁸ Aman Zhiklè a va na va a kuza arsa, nengaʼa man a patsna a zhè, angoslèm ta wusheda vogwa, a sam kinè a gi arsa holholaʼa azɓi dè? Kinè ndohi man kin ca a ndav kumba ɓai!

²⁹ Gar haha kin dzhoɗ ɓai, a kin gaɗa: Nga da ndi mè, nga da si mè, kin gu zlau ɓai! Aman ndohi herkeda ta hér gèɗ arsa.

³⁰ Bab kinè a sun skwi man kin tè-kwènèʼa.

³¹ Aman va-hur kokwar Bi Zhiklè, a kin ngècè skwi haha tèlèba a deɓaʼa.

Skwi mèshèlè te zhiklè te géɗèʼa

³² Kin gu zlau ɓai, kinè rèwè nkèshèa; aman Zhiklè a woya a va kinè kokwar Bi nengaʼa.

³³ Va-preda skwi kinè a ma, va-va ta skwi a ndohai, va-doho gozhèm, man ta hèlè azɓai, a kin ɓüco skwi mèshèlè man a zi azɓai te zhiklè, a sam man ndo metsar a dè a pa azɓai, a pombok a ndiaʼa azɓai.

³⁴ A sam man skwi mèshèlè kinè a pa, ndav kinè ba a pa.

Ndohi mizlinè man ta nzi a dai

³⁵ Va-tka hwaɗ kinè; pitirla kinè da zhè a vogwa te pa!

³⁶ Va-gu lèmèlèmè ara ndohi man ta zhèr bi tengaʼa. Aman a slèmbèɗè a sam ngolala nfi ngwoz a gai, a shkè, a bèhè a ntamagai, ta winè na tsam tsam.

³⁷ Mwuffe a sam ɓèlèlihai, aman bi tengaʼa a shkè, a nʼngats ta, ta nzhun ɓai. A vava i gaɗa kinè: A da tke hwaɗ, a pe ta a table, a va ta skwi nʼndai.

³⁸ Gar a shkè a vaɗ, gar a shkè a prèk vaɗ, a nʼngats ta arsa – mwuffè a sam ɓèlèlihi sa.

³⁹ Aman skwi haha va-suna! Aman babgi a suna, sam tèkè ndo metsar a shkè, ar a nzhun azɓai, a va na civèɗ azɓai, aman a zlinè gi nengaʼa.

⁴⁰ Kinè ba, va-nza, ntila, aman kra-ndo a shkè a pats man kin hur ɓai.

Ɓèl nlèɓèslèa, ɓèl nlèɓèslɓiaʼa

⁴¹ A Pierre a ngaɗa na: Bai, ka gèɗè ngèlègèɗ-ma haha a sam nga genè ɗè, ɗè a sam ndohi tèlèba dè?

⁴² A Bai a ngaɗa: Ɓèl nlèɓèslèa, man a sun maya, wa, man bi a mvau a ndo mɓer ndohi mizlinè nengaʼa, aman a va ta skwi nʼndi ta tidè sama zuraʼa?

⁴³ Mwuffè a sam ɓèl sa, aman bi nengaʼa a shkè, a ngècèʼa, a gi arsa.

⁴⁴ A vava i gaɗa kinè, a da fi a bai a géɗ skwi nengaʼa tèlèba.

⁴⁵ Aman ɓèl sa a hérèʼa te ndav na: Bi ga a gi ndudoh, a shkè azɓai, a hinè a tsi ndohi a ngwozi mizlinè, a ndi skwai, a si zom, ha zom a keɗaʼa,

⁴⁶ bi ɓèl matsa a shkè a pats man nengaʼa a nhéra ɓai, a pats man a sun ɓai, a kédèʼa, a va na skwi na ara man a va ta ndohi nʼngwèdè ndo.

⁴⁷ Aman ɓèlè man a sun skwi man bi na a woyaʼa, a ntila nshèffè na ɓai, a ngu skwi ara bi nengaʼa a ngaɗa ɓai, ta da ndèhaʼa a vata.

⁴⁸ Aman ndo man a sun skwi man bi a woya ɓai, ta ndèhè kètè genè. Te ri ndo staɗ staɗ tèlèba, man ta va na skwi kumba, ta jhèɗè skwi kumba. Te ri ndo, man ta va na a ri skwi kumba, aman a ɓerèʼa, ta jhèɗè holholaʼa.

Gèɗ ndohi nkezla a géɗ Yèsu

⁴⁹ I shkè, aman i vècè vogwa a géɗ herkeda; i woya aman nvatsa ma!

⁵⁰ Aman baptême ga a zhè, man ta gayè. Ha nʼnga ma, a hérdyè.

⁵¹ Kin hur te, ndav kinè, i shkè aman i ckoɗi gumi a herkeda ɗè? Azbai! I gaɗa kinè, i shkè aman i kezla ta gèɗ ndohai.

⁵² Anai te gi staɗ, ndohi zlam ta zhè, ta ngi gèɗ a va; ndohi makar ta ngi gèɗ a va ndohi ncèwaʼa, ndohi cèw ta ngi gèɗ a va ndohi mʼmakaraʼa.

⁵³ Bab kra a kra na, a kra a bab na; mam dam a dem na, a demaʼa a mam na; mam bakai a ngwoz kra na, a ngwoz kra a mam baki na.

Nwèr samaʼa

⁵⁴ A ngaɗa ta ndohi rèdèdèa: Aman kin rka vanai a gi te verzi gai, kin gèɗè tsam-tsam; Iyam a shkè – a gi arsa.

⁵⁵ Aman kin rka kozlar a gi te man a nkèl pats, kin gaɗa: Vazaza a shkè – a gi arsa.

⁵⁶ Ndohi nʼngwèdè ndo! Skwi herkeda a giɗfèk kin sun nɗèlèʼa; kin ɗèl skwi man a gi a haha azbi èhèmè?

Va-lèmdè ma a ndo mpin kinè!

⁵⁷ Kin dèl skwi nzuraʼa te ndav kinè a ri kinè azɓi èhèmè?

⁵⁸ Aman kin dè a ndo shèwa ngaya a sam bai, gu maya, man kinè a civèɗ dai, aman a mpre ka a gumai, man bai a da va ka a ri a ndo kita, a ndo kita a da va ka a ri a sojè, a sojè a da kalde ka a dangai.

⁵⁹ I gaɗa ka: Ka shkè auda te pa ambali azɓai, sèi ka pau Suli skwi tèlèba, ko sissi a pcè a deɓa azɓai.