Luke 11 - Ma Zhiklè

Njè-ma Yèsu a géɗ ntsi rai

¹ Pats ngiɗè, Yèsu a ntsu ri a sam ngiɗè. Aman a ndeva ntsi rai, staɗ te va golahi nengaʼa a ngaɗa na: Bai, slebda nga ntsi rai, ara man Jean a slebda ta golahi nengaʼa!

² A nengaʼa a ngaɗa ta: Aman kin tsi rai, va-gaɗa: Baba, a woy ta kezla nzlembaɗ ngaya. Kokwar-bi ngaya da shkè.

³ Vaka nga skwi nʼndi nga te di mpatsna ba.

⁴ Pra nga mali nga, a nga ba, nga pra mali ndo staɗ staɗ tèlèba, man ta gu mali a sam nga. Ka da nga a sam man a pe nga a wi ɓai!

⁵ A ngaɗa ta: Te ndev kinè wa, man mandal na a zhè, a dè a sam na a géɗ vaɗ, a ngaɗa na: Pay movar makar, ka payè a va ga ka ɓai.

⁶ Mandal ga a mshkè te nshèwèlè, a i ngatsa skwi nʼndi man i va na ɓai.

⁷ A nengaʼa te gai a mbeɗka na a ma: Ka geday matakwan ɓai, ntamagi mɓara ma, a wudahi ta nzhuna a sam ga. I slaha a i slèmbèɗè a i pa ka azɓai.

⁸ I gaɗa kinè, aman a slèmbèɗè azɓai, a pa na, a géɗ man mandal na, aman a slèmbèɗè, a géɗ man a rzla na va a gèɗ, a da va na skwi man a woyaʼa.

⁹ Aman i gaɗa kinè: Vo-dzhoɗo, a ta va kinè. Va-woya, a kin ngè-cèʼa. Vo-boho a ntamagai, a ta winè a kinè.

¹⁰ Ko wawa man a jhèɗèʼa, ta va na. Ko wawa man a woyaʼa, a ngècèʼa. Ko wawa man a bèhè a ntamagai, ta wina na.

¹¹ Bab kra te ndev kinè wa, man kra nengaʼa a jhèdè klèf, a nva na züzhok te diaʼa;

¹² aman a jhèdè slaslai, a nva na varadza te diaʼa.

¹³ Ani haha kinè, ndohi ambaɓihiaʼa, kin sun nvi skwi man amba a wudahi kinè. Bab kinè te zhiklè a fenaʼa, aman a va ta Mèzhèɓ Zhiklè nkezlaʼa a tengaʼa man ta jhèɗèʼa. (Mt. 12, 22-30; Marc 3, 19-27)

Yèsu a madzagai

¹⁴ A Yèsu a ndzor mèzhèɓ ambaɓiaʼa ngiɗè auda, man a ndeda ndo ngiɗè a ndaɓazlam. Aman a ndzor madzagi auda ma, ndaɓazlam a ngèɗè, a ndohi rèdèdèʼa ta rzl ta.

¹⁵ Matrhiaʼa te ndev tengaʼa ta gaɗa: A jèr madzagihi auda a Béelzébul, bi madzagihai.

¹⁶ A ndohi ngiɗè ta jkudo, ta dzhoɗo, aman a ngreda ta skwi malwuɗi tezhiklè.

¹⁷ Aman nengaʼa a sun skwi man ta huro, a ngaɗa ta: Kokwar-bi staɗ staɗ tèlèba man nkezla te va, a gédèsh na. A gi man nkezla te va, gèɗ ndohi nengaʼa nkezlaʼa, a nzi azɓai.

¹⁸ Aman Sadan a ngi gèɗ a va na, kokwar-bi nengaʼa a slaha man a nzi de? Aman kin gaɗa, i jèr madzagihi auda a Béelzébul.

¹⁹ Aman iyè, i jèr madzagihi auda a Béelzébul, ndohi kinè ta dzar ta auda a mè? Gar haha tengaʼa ta gi a ndohi kita kinè.

²⁰ Aman i jèr madzagihi auda a wuɗi Zhiklè. Gar haha kokwar Bi Zhi-klè a mshkè a sam kinè ma.

²¹ Aman ndo wuɗai, a skwi var a va, a ɓer gi na, skwi nengaʼa a nza a gumai.

²² Aman ndo ngiɗè a shkè, wuɗi nengaʼa a fena wuɗi ndo var sa, a gi a ngulaʼa, a ngézlè skwi var nengaʼa tèlèba a ma, man ndo matsa a fu gèɗ a vna, a kezla skwi man a hul a metsar a ndohi ngiɗè.

²³ Ndo man nga a vna ka ɓai, ndo mayam ga. A ndo man nga ɓicè skwi a vna ka ɓai, a ksarda skwi aussa.

Mshkè mèzhèɓ ambaɓiaʼa a deɓa

²⁴ Aman mèzhèɓ ambaɓiaʼa a mdo auda te ndo, a dè nshèwèlè a ɓala, a woya sam nshèk va. Aman a da ngècè azɓai, a gaɗa: I woya a i dè a deɓa a gi ga, man i slambaɗka te pa.

²⁵ Aman a shkè, a ngècè gai, mpatsa, ntila.

²⁶ Te deɓaʼa a dè, a hil mèzhèɓhi ambaɓihiaʼa tsaraɗ a nda nengaʼa, ta ambaɓai ta fena nengaʼa, a ta dè a pa, a ta nzi a pa. Te deɓaʼa ndo haha wuɗitpa holholaʼa, a fena matsa.

Mwuffè zuraʼa

²⁷ Aman a ngoɗ ma haha, ngwoz ngiɗè te va ndohi rèdèdèa a hüno ngèɗè, a ngaɗa na: Mwuffè a sam ngwoz man ka yaka tʼhwaɗ na, man ka tseɗka wa na!

²⁸ A nengaʼa a ngaɗa: Mwuffe mbiaʼa holholaʼa a vava a sam ndohi man ta tsena ma Zhiklè, a ta ɓerè te ndav ta.

Ndohi ambaɓihiaʼa ta jhèɗè skwi malwuɗai

²⁹ Aman ndohi rèdèdèa ta haya a vata, a hüno a ngaɗa ta: Ndohi man a géɗ herkeda antanta, ndohi ambaɓihiaʼa, ta jhèdè skwi malwudai. A ta ngècè skwi malwuɗi azɓai, sèi skwi malwuɗi Jonas.

³⁰ Lèmèlèmè ara Jonas skwi malwuɗi a sam ndohi Ninive, lèmèlèmè krando a sam ndohi herkeda haha.

³¹ Bai man ngwozaʼa te tsagai, a da slèmbèɗè a sam kita, a nda ndohi haha, a da fa ta mali a gèɗ. Aman nengaʼa a mshkè te verzi herkeda, aman a cinè ma maya Salomon.

³² A na haha, ndo a zhè, man a fena Salomon. A ndohi te Ninive ta da slèmbèɗè a sam kita a nda ndohi haha, a ta da fa ta mali a gèɗ. Aman ta ngwoda ndav ta a géɗ njè-ma Zhiklè man Jonas a njè ta. Na haha, ndo a zhè, man a fena Jonas.

Skwi nhél sam te va ndo

³³ Ndo man a feda vogwa a pitirla, a nghédè azɓai, a tuzloma na kokwi a gèɗ azɓai; aman a feda a géɗ sam nfi pitirla, a ndohi man ta shkè a gai, ta rka vogwa pitirla.

³⁴ Di ngaya, ara pitirla va ngaya. Aman di ngaya amba, va ngaya tèlèba nhela. Aman di ngaya di nʼngwèdè ndo, va ngaya tèlèba nara ruva.

³⁵ Gu maya, a woy skwi nhél sam nte va ngaya, ruva ka ɓai!

³⁶ Aman va ngaya tèlèba nhela, sam ruva az a pa ɓai, nhela tèlèba, lèmèlèmè ara pitirla, man a hél va ngaya a vogwa nengaʼa.

Maya, maya a ndohi pharisie!

³⁷ Aman a ngoɗ ma haha, ndo pharisie ngiɗè staɗ a ndzhoɗo, aman a dè a ndi skwi nʼndai a sam na. A Yèsu a mdo, a ndau skwi a vna.

³⁸ Aman ndo pharisie a rkaʼa, a nhur a vata, a géɗ man a mpana ri ɓai, ga a ndi skwi nʼndai.

³⁹ A Bai a ngaɗa na: Anai, kinè ndohi pharisie, kin pènè deɓ kokwi a gandaf; aman ndav kinè nʼndha a skwi metsar a malai.

⁴⁰ Ndohi nrzlaʼa! Ndo nʼnga deɓ skwai, a gu ga deɓaʼa a hwaɗaʼa ka ɓi dè?

⁴¹ Nshèlèkuraʼa va-va na skwi a Zhiklè, te skwi man kin ngotso. A na haha, skwi tèlèba a ngaʼa a skwi mpanaʼa a sam kinè.

⁴² Aman Woba kine, ndohi pharisie! Kin vi skwi staɗ te va kula, te skwi nkè-shèa; aman kin fa na gèɗ a ma kita a mwoy-ndo Zhiklè ɓai. Aman ar agassa sèi kin gi skwi haha, a kin jèkaha ngiɗè azɓai.

⁴³ Woba kinè, ndohi pharisie! Aman kin woya sam nʼnzi a ma te gi njèngè ma Zhiklè, a kin woy a ta ga kinè mbalai a luma.

⁴⁴ Woba kinè! Aman kinè lèmèlèmè ara gi dzavihai, a ndohi man ta beza a pa, ta sun a ta gaɗa: Gi dzavi ɓai.

⁴⁵ A ndo njèngè ma kita staɗ a mʼmbeɗa na a ma: Ndo njèngè ma, aman ka gèɗ ma haha, ka derde nga ba.

⁴⁶ A Yèsu a ngaɗa: Woba kinè ba, ndohi njèngè ma kita! Aman kin va ta skwi mwuɗitpa a gèɗ a ndohai, man ta zhüɓèʼa, aman kin takaha ta azbai, ko kèshkata.

⁴⁷ Woba kinè! Aman kin rèm gi dzavi ndohi nhadka ma, man bababhi kinè ta bazl ta.

⁴⁸ Gar haha kin ngreda skwi babhi kinè, a kin mba a mizlinè a nda babhi kinè. Tengaʼa ta mbozlo, a kin wuffè a géɗèʼa, a kinè nrèm gi dzavi tengaʼa.

⁴⁹ Gar haha Zhiklè a ngoɗ te maya na: I da zlinde ta ndohi nhadka ma a ndohi sak. A matrhiaʼa te va tengaʼa ta da bazl ta, a ta da paraha ta.

⁵⁰ Aman Pombaz ndohi nhadka ma tèlèba, man ta bazl ta, te nhinkaɗ herkeda,

⁵¹ ta jhèɗèʼa te ri ndohi herkeda haha, a hüno a sam pombaz Abel, ha ndè a Pombaz Zacharie, man ta keɗa a sam mvi skwi a Zhiklè, a ma gi Zhiklè. A vava, i gaɗa kinè, ta jhèɗèʼa, te ri ndohi haha.

⁵² Woba kinè, ndohi njèngè ma kita! Aman skwi mwinè maya, kin ceda ma; aman kinè ba kin dè a pa azɓai, a kin gedassa civèɗ ndohi man ta woy a ta dè a pa.

⁵³ Aman a ndo auda te gai, malamhai a ndohi pharisie ta hüno a ta jénjèrèʼa, a ta jhèɗè skwi kumba.

⁵⁴ A ta pa na di a ma, ta woy a ta pinè a géɗèʼa.