Luke 10 - Ma Zhiklè

Mizlinè Zhiklè ndohi 70

¹ Te deɓ nasa, Bai Yèsu a mbaha ta ndohi 70 ngiɗè, a nzlinde ta cèw, cèw, a ma na, a sam tèlèba man a woya a ndè a pa.

² A ngaɗa ta: Skwi nslaʼa a zhè a vata, aman ndohi mizlinè ta az a vata ɓai. Va-tsu ri a bi skwi nslaʼa, aman a zlinde ta ndohi mizlinè, a ta ɓicè skwi na.

³ Vo-do! Na haha, i zlinde kinè ara tambakihai a ndev kdadidakhai.

⁴ Kin helda gozhèm sulai, a gozhèm nhèsh skwai, a kotokoroh a ri ɓai, a kin zlatsahi a civèɗ man kin gi mbali a ndo ɓai!

⁵ A gi ko nangwa nangwa man kin dè a pa, va-gaɗa ta nshèlèkuraʼa: Gumi da zhè te gi haha!

⁶ Man ndo gumi a zhè te pa, gumi kinè a da nzi a sam na. Man ɓai, gumi kinè a shkè a deɓa a sam kinè.

⁷ Te gi sa, va-nza a pa, kin ndi skwai, a kin si skwai, man ta va kinè. Aman ndo mizlinè sèi a ngècè skwi ntul na. A kin do auda te pa tsam tsam ɓai.

⁸ A kokwar ko nangwa nangwa man kin dè a pa, a ta woy kinè, va-nza a pa, va-ndau skwai, man ta va kinè,

⁹ va-mbel ta ndohi matakwan te pa, va-gaɗa ta: Kokwar Bi Zhiklè a zhè ndul ndul a sam kinè ma.

¹⁰ Kokwar ko nangwa nangwa man kin dè a pa, a ta ce kinè azɓai, vo-do auda a dala, a kin gaɗa:

¹¹ Ko lokotor kokwar kinè man a ga nga a sak, nga tassaʼa, a gi a skwi malwuɗi a gèɗ kinè. Sèi kin sun skwi haha: Kokwar Bi Zhiklè a zhè ndul ndul a sam kinè ma.

¹² I gaɗa kinè: a pats kita, kita kokwar haha a da fena kita Sodome.

Wobau a géɗ kokwar man a woya a ngwè-dè ndav na ɓai

¹³ Woba ka, kokwar Chorazin! Woba ka, kokwar Béthsaida! Aman agassa nrkedi kumba ar haha ta gu te kokwar Tyr a Sidon, ar ndohi te pa ta ngwoda ndav ta te mèrwèc nʼnzi a zhè ma.

¹⁴ Aman Tyr a Sidon, dara tengaʼa a kinè a pats kita.

¹⁵ Ka, Capernaum, ka da grè ta zhiklè dè? Ta da kalde ka a vogwa kita.

¹⁶ Ndo man a tsena ma kinè, a tsena ma ga. Ndo man a kwol kinè, a kwolyè. A ndo man a kwolyè, a kwol nengaʼa man a zlindekayè.

Mshkè ndohi 70 a deɓa

¹⁷ Ta 70 ta shkè a deɓa a mwuffe, a ta gaɗa: Bai, ko madzagihai ta tsena ma nga, a nzlembaɗ ngaya.

¹⁸ A nengaʼa a ngaɗa ta: I rka Sadan man a kalkaɗahai te zhiklè ara ntsi iyam.

¹⁹ Na haha, i va kinè wuɗi-bai, aman kin bècè a gèɗ zhüzho-kihai, a varadzhai, a i va kinè wuɗai a gèɗ ndo mayam kinè, a faha kinè matakwan azɓai.

²⁰ Aman kin wuffa ɓai, a gèɗ man mèzhèɓhi ambaɓihiaʼa ta tsena ma kinè; aman va-wuffa, a gèɗ man nzlembaɗ kinè mwindèʼa te zhiklè.

Yèsu a wuffè

²¹ A pats nasa Yèsu a wuffè te Mèzhèɓ nengaʼa nkezlaʼa, a ngaɗa: I shida ka gèɗ, Bab ga, Bi zhiklè a Bi herkeda, aman ke nghede skwi haha a sam ndohi maya, a ndohi man ta sun skwi te gèɗ, a ka ngredkodauda a sam ndohi man ta gre di ɓai. Halau, Bab ga, aman arsa ambaha ka.

²² A ngaɗa ta golahi nengaʼa: Skwi tèlèba Bab ga a mvay a rai. Ndo ngiɗè a sun kra ɓai sèi bab na a suna a vava. A ndo ngiɗè a sun Bab kra ɓai, sèi kra na a suna a vava, a ndo man kra a ngreda na.

²³ A ngaɗa ta golahi nengaʼa, ta a géɗ ta: Mwuffè mbiaʼa a sam dihai, man ta rka skwi man kin rkaʼa.

²⁴ Aman i gaɗa kine: Ndohi nhadka ma, a bihi kumba, ta woy a ta rka skwi man kin rkaʼa, aman ta rka ɓai; a ta woy a ta tsena ma man kin tsenaʼa, aman ta tsena ɓai.

Ndo te Samarie man amba

²⁵ Na haha, ndo njèngè ma kita ngiɗè staɗ a nslambaɗa, a mpeda Yèsu a wai, a ngaɗa: Ndo njèngè ma, i gi be kè, aman i ngècè nshèffè a mèdèp?

²⁶ A Yèsu a ngaɗa na: Ta Windo mè te ma kita Zhi-klè? Ka jèngè mè?

²⁷ A nengaʼa a mʼmbeɗa na a ma: Woy Bi Zhiklè ngaya, a ndav ngaya tèlèba, a nshèffè ngaya tè-lèba, a wuɗi ngaya tèlèba, a nhér gèɗ ngaya tèlèba, woy ndo ngaya, ara man ka woy nshèffè ngaya.

²⁸ A Yèsu a ngaɗa na: Ka mendayè zuraʼa. Gu ar haha, a ka nzi a nshèffè.

²⁹ A ndo njèngè ma a nzevi na auda, a ngaɗa na Yèsu: Ndo ga wa? A Yèsu a ngaɗa na:

³⁰ Ndo ngiɗè a njèkeda kokwar Jérusalem, a mdo Jéricho, a nkala a ndev metsarhai. Ta suɗama na maslaka auda a va, ta keɗaʼa, a ta jèkeda pa, te ndav te ndav.

³¹ A ndo mvi skwi a Zhiklè a mbeza a civèɗ matsa. Aman a rkaʼa, a mdo na.

³² Lèmèlèmè ndo Lévite, man a shkè a samaʼa, a nrkaʼa, a mdo na.

³³ Te deɓaʼa ndo Samarie a mbeza a civèdèʼa. Aman a rkaʼa, a sia te va,

³⁴ a mdo a sam na, a mʼmana na mblè nengaʼa a mbar a barassa, a zuɓkoɗa a deɓ kɗèh nengaʼa, a ndaʼa a barki, a nwara na dai.

³⁵ Te mangoslè-maʼa, a nco gozhèm, a mva na bab barki, a ngaɗa na: I va ka Suli haha, wara na di mbelembela. Aman ka va na skwi a vaʼa, i da pela ka a pats man i shkè a deɓa.

³⁶ Ka hur kè? Te va tengahi makar, ndo ndo man a kala a ndev metsarhi, na wa?

³⁷ A nengaʼa a ngaɗa: Nengaʼa man ndo a sia te va. A Yèsu a ngaɗa na: Ani haha do, a ka gu arsa!

Yèsu a de a gi Marthe a Marie

³⁸ Te deɓaʼa to do a ma a civèɗ, a ta shkè a kokwar ngiɗè. Ngwoz ngiɗè a zhe, nzlembaɗ na Marthe, man a nceda a gi na.

³⁹ Demam ngwozaʼa a zhè, nzlembaɗ na Marie. Nengaʼa a nʼnzahai a sam Bi Yèsu, a ntsena ma nengaʼa.

⁴⁰ A Marthe, mizlinè tsaɗ tsaɗ a ngsedahai. A nherda na va a Yèsu, a ngaɗa: Bai, ka rka ɓi dè, aman demam ga a jèkay mizlinè a gèɗ tèlèba? Anai sèi ka gaɗa na, aman a taka-hayè.

⁴¹ A Bai a mʼmbeɗa na a ma: Marthe, Marthe! Ka ngeza a skwi kumba, a mizlinè a ngso ndav ngaya.

⁴² Gso va a skwi staɗgenè! Marie a nco skwi man amba, a ta cè nengaʼa te ri na azɓai.