Luke 1 - Ma Zhiklè

Ma Luc a sam Théophile

¹ Théophile ga! Ndohi kumba ta windeda skwi man a gu a sam nga a hai;

² ara man tengaʼa, man ta rkaʼa a di ta te nhinkaɗ na, a ta nda a ndohi njè ma Zhiklè, a ta ngra nga.

³ Ko i ha, i hur amba, aman i windè ka skwia staɗ staɗ tèlèba, ara man i junjor te nhinkaɗ na,

⁴ a ka da suna, skwi man ta senda ka, a ngu arsa a vava.

Gol Zhiklè a hodko nyi Jean Baptiste

⁵ Te va man Hérode bi kokwar Judée, ndo mvi skwi a Zhiklè ngiɗè a zhè, nzlembaɗ na Zacharie, te verzi Abia. Ngwoz nengaʼa nzlembaɗ na Elisabeth, nte va dalahi Aaron.

⁶ Ta cèw ba, ta ndohi nzuraʼa a sam di Zhiklè, a ta dzodzor ma nkwèr Bi Zhiklè a ma kita nengaʼa, ta tawaɗaha ɓai, ko staɗ.

⁷ Ta yi kra azɓai. Elisabeth delai. Ta cèw ba ta hala ma.

⁸ A pats ngi mizlinè na, Zacharie a ngu mizlinè te gi Zhiklè. Ndohi mvi skwi a Zhiklè ta venu va a mizlinè tengaʼa pèc pècèk.

⁹ A nengaʼa a mdo a gi Zhiklè, a mpeda ɓurdi a vogwa, man vodzok a düzhè, ara man ndohi Juif ta giaʼa pèc pècèk.

¹⁰ A pats nasa ndohi tèlèba ta tʼuda, a ta tsu rai.

¹¹ A gol Bi Zhiklè staɗ a ngudoko na va a dai a Zacharie, a sam mvi skwi a Zhiklè, man vodzok a düzhè a pa, te civèɗ ri mandai.

¹² Aman Zacharie a rkaʼa, a gudzai, zlau a dza na.

¹³ Gol Zhiklè a ngaɗa na: Ka gu zlau ɓai, Zacharie; aman Zhiklè a ntsena ntsi ri ngaya. Elisabeth, ngwoz ngaya, a da ya ka kra nguraʼa, a ka da va na nzlembaɗ na Jean.

¹⁴ A gi a kra man ndav ngaya a wuffè langlangaʼa a géɗèʼa. A ndohi kumba ta da wuffè a géɗ nyi nengaʼa.

¹⁵ Nengaʼa a gi a ndo mbiaʼa a sam di Bi Zhiklè, a da si zom a skwi man a dè gèɗ azɓai. Ko tʼhwaɗ mam na, Mèzhèɓ Zhiklè nkezlaʼa a nʼndha ndav na.

¹⁶ A da ngwodko ndav wuda Israel kumba a sam Bi Zhiklè tengaʼa.

¹⁷ A nengaʼa a dè a ma Bi Zhiklè te Mèzhèɓ a wuɗi Elie, a ngwodko ndav babgihai a sam wud ta, a gi aman ndohi mèdègèd a ta hér ma ndohi nzuraʼa, a da til ndohi a sam Bi Zhiklè.

¹⁸ Zacharie a ngaɗa na gol Zhiklè: I da shinè skwi haha te mè? Aman iyè, i babgai, ngwoz ga ba, nhala ma.

¹⁹ A gol Zhiklè a mʼmbeɗa na a ma: Iyè Gabriel, man i zlatsa a sam di Zhiklè. Nengaʼa a nzlindekayè man i gaɗa ka ma haha. A i ngreda ka ma mbela haha.

²⁰ Ani haha ka gi a ndaɓazlam. Ka slaha ka gèɗè azɓai, ha pats man skwi haha tèlèba a ndev na, a géɗ man ka ca ma ga a ndav ngaya ɓai. Aman a da gi ara ma ga a vava.

²¹ A ndohi tʼuda ta zhèr Zacharie, a ta hur a vata, aman a ngu ndudoh te gi Zhiklè.

²² Mshkè Zacharie auda ma, a slaha a ngèɗè ɓai. A ta suna, skwa a nrka na dai te gi Zhiklè. Nengaʼa a geda ri mènè, nʼnde na a ndaɓazlam ma.

²³ Aman mizlinè nengaʼa klèng ma, a ndo na ngwai.

²⁴ Te deɓaʼa Elisabeth, ngwoz na, a ngu a hwaɗ, a nʼngheda va na ki zlam, a ngaɗa:

²⁵ Bi Zhiklè a vay pombai arsa, te man a héryè te ndav na, a cay hori auda a dai.

Gol Zhiklè a hodko nyi Yèsu

²⁶ Te mamokwa kia, Bi Zhiklèa nzlündo Gabriel, gol nengaʼa, a kokwar Nazareth, te Galilee,

²⁷ a sam bidali ngiɗè, medemi Joseph, te verzi David. Nzlembaɗ demaʼa, Marie.

²⁸ A gol Zhiklè a mdo a gai a sam na, a ngaɗa na: Mwuffe a sam ngaya, ka man Zhiklè a mva ka pombai! Bi Zhiklè a zhè a nda ka!

²⁹ Aman demaʼa a ntsena ngèɗè haha, a gudzai, a nhuro: Mabali haha nkèkèkè?

³⁰ A gol Zhiklè a ngaɗa na: Ka gu zlau ɓai, Marie! Ka ngots pombai a sam Zhiklè!

³¹ Na haha, ka da gi a hwaɗ, ka da yi kra nguraʼa, a ka da baha na Yèsu.

³² Nengaʼa a da gi a mbiaʼa, a ta da baha na kra Zhiklè te géɗèʼa. Bi Zhiklè a da va na sam nʼnzi bi David, bab na.

³³ A nengaʼa a da gi bai a géɗ gi Jacob a mèdèp, a kokwar-bi nengaʼa a ndivè azbai.

³⁴ A Marie a ngaɗa na gol Zhiklè: Skwi haha a da gi a nkèkèkè? I sun baki ɓai.

³⁵ A gol Zhiklè a mʼmbeɗa na a ma: Mèzhèɓ Zhiklè nkezlaʼa a di a shkè a géɗ ngaya, a wuɗi Zhiklè te géɗèʼa a da nzi a géɗ ngaya. Gar haha kra man ka da yiaʼa, nkezlaʼa, ta da baha na kra Zhiklè.

³⁶ Na haha, ko Elisabeth, dem bab ngaya, man ta baha na delai, kra tʼhwaɗ ma, ko nhala ma. Ki nengaʼa mokwa antanta.

³⁷ Skwi man Zhiklè a slaha bi ba, azbai.

³⁸ A Marie a ngaɗa: Na haha, i ɓèl Bi Zhiklè. Da gu a sam ga, ara man Zhiklè a gaɗa. A gol Zhiklè a mdo na.

Marie a ngela na di a Elisabeth

³⁹ A pats nasa Marie a nslambaɗa, a mdo, tsam tsam va a za ngiɗè te kokwar Judée.

⁴⁰ A ndo a gi Zacharie, a nʼnga na mbalai a Elisabeth.

⁴¹ Aman Elisabeth a ntsena mbali Marie, kra tʼhwaɗ a gidè va, a Mèzhèɓ nkezlaʼa a nʼndha ndav Elisabeth.

⁴² A Elisabeth a mboho a wuɗai: Te ndev ngwozai, Zhiklè a mpshè ka ma, kinè a kra ntʼhwaɗ ngaya!

⁴³ I wa, a mam Bi ga a shkè a sam ga?

⁴⁴ Na haha, man i tsena mbali ngaya te zlembaɗ ga, ambaha kra ntʼhwaɗ ga, a wuffè, a gidè va.

⁴⁵ Mwuffe a sam ngaya, man ka co a ndav; a gi ara man Bi Zhiklè a gaɗa ka!

Marie a sli dimèsh nslébèrdè Zhiklè

⁴⁶ A Marie a ngaɗa: Ndav ga a slébèrdè Bi Zhiklè!

⁴⁷ Mèzhèɓ ga a wuffè te Bi Zhiklè, Bi mʼmbelyè!

⁴⁸ Nengaʼa a nrkayè, i ɓèl nengaʼa nkèshèʼa. Na haha, anai verzi ndohi tèlèba ta da gaɗayè: Mwuffe a sam ngaya!

⁴⁹ Aman Zhiklè wuɗi tèlèba a ngu skwi mbiaʼa a sam ga. Nzlembaɗ nengaʼa nkezla.

⁵⁰ A verzi, verzi ndohi man ta gi zlauaʼa, ta sia te va.

⁵¹ Ri nengaʼa a ngu skwi mbiaʼa. A nksar ta ndohi nfi va aussa.

⁵² A nhelka ta ndohi mbibihiaʼa auda a sam nʼnzi bi ta, a nslambaɗda ta gèɗ a ndohi man ta manda gèɗ ta a hai.

⁵³ Ndohi man mi a keɗ ta, a nʼngez ta a skwi man amba a vata; aman ndohi mèshèlè a menda ta a deɓa, skwa a te ri ɓai.

⁵⁴ Nengaʼa a ntakaha Israel, ɓèl na.

⁵⁵ Abraham a wud na ta sia te va a mèdèp, ara man a gaɗa ta bababhi nga.

⁵⁶ A Marie a nʼnza a sam nengaʼa, ki makar. Te deɓaʼa a ndo na a deɓa a ngwai.

Nyi Jean Baptiste

⁵⁷ A pats nyi kra Elisabeth, a myu kra nguraʼa.

⁵⁸ A nslamagihi na, a gwoli na ta tsena, a msau Bi Zhiklè te va, a ta wuffè a nda nengaʼa.

⁵⁹ Mʼmèn matsamakaɗaʼa a ta shkè, aman ta ngél ngwon kra, a ta woy a ta va na nzlembaɗ bab na, Zacharie.

⁶⁰ A mam nengaʼa a ngaɗa ta: Azɓai, sèi ta baha na Jean!

⁶¹ A ta gaɗa na: Te va gwoli ngaya ndo man a ngots nzlembaɗ ar haha, ngiɗè a zhi ɗè?

⁶² A ta kutèka na ri a bab na, a woy a ta baha na kra wa?

⁶³ A nengaʼa a ndzhoɗo wof, a mwindeda pa: Nzlembaɗ na Jean. Ta tèlèba ta rzl ta.

⁶⁴ A nasa nasa ma nengaʼa a mwin na, a nèʼèn nengaʼa a mpre na, a ngèɗè, a nslubordo Zhiklè.

⁶⁵ A zlau a ndza ta nslamagihi ta. Te za Judée tèlèba ta goɗ ma haha.

⁶⁶ A ndohi tèlèba man ta tsenaʼa, ta hérèʼa a ta gaɗa: Kra haha a da gi a kra mè? Aman Bi Zhiklè a zhè a nda nengaʼa.

Zacharie a hodko ma

⁶⁷ A Mèzhèɓ Zhiklè nkezlaʼa a nʼndha ndav Zacharie, bab kra. A Zacharie a nhodko ma, a ngaɗa:

⁶⁸ Va-slubordo Bai, Zhiklè Israel, aman nengaʼa a mshkè a sam ndohi na, a mpreka ta auda.

⁶⁹ A mva nga ndo mʼmbel ndo man wuɗi na zhè, te verzi David, ɓèl na,

⁷⁰ ara man a hodko ma te ma ndohi nhadka ma nkezlahiaʼa halaʼa,

⁷¹ ara man a gaɗa, a mbel nga te ri ndohi mayamhi nga, te ri ndohi shèwa nga tèlèba.

⁷² Bababhi nga ta sia te va, a hér nderzlè-ma nengaʼa nkezlaʼa,

⁷³ a mʼmbèdè man a mbaɗa na Abraham, bab nga.

⁷⁴ Aman te deɓaʼa, aman nga mbel nga te ri ndohi mayamhi nga ma, a gi aman nga gi mizline nengaʼa a zlau ka ɓai,

⁷⁵ zuraʼa, a ndav nkezlaʼa, a sam di nengaʼa, a pats nshèffè nga teleba.

⁷⁶ Ka ba, kra ga, ta da baha ka ndo nhadka ma Bi Zhiklè te géɗèʼa, a ka de a ma ma a sam di Bi Zhiklè, aman ka tila na civèɗ,

⁷⁷ a ka winè ta dai a ndohi na, aman ta rka skwi mʼmbel tengaʼa, a mali tengaʼa mpraʼa;

⁷⁸ a géɗ man nga si Zhiklè te va. Te nengaʼa skwi man a vangka te géɗèʼa a mshkè a sam nga,

⁷⁹ aman a hela ta sam a ndohai, man ta te ruva, man ta te mèzhèɓ mʼmetsai, a da pa nga sak a civèɗ gumai.

⁸⁰ A kra a grè a grè, a nʼngots wuɗai te Mèzhèɓ Zhiklè, a nʼnza te ndev hèshèkèɗ, ha pats man a ngreda ta va na auda a sam ndohi Israel.