Lèv. 9 - Ma Zhiklè

Aaron a va na skwi a Zhiklè

¹ A pats matsamakaɗaʼa, Moise a mbaha ta nda Aaron a wudahi nengaʼa, a ndohi Israel nhalaʼa,

² a ngaɗa na Aaron: Cko kra zlè a gèɗ va ngaya, a gèɗ malai, a drok, da ndara na Zhiklè, cèw cèw ba nsuɗekɗekaʼa, a ka va na Ndo nzi pèc pècèk!

³ A ka gada ta ndohi Israel: Va-hulko mazawal a gèɗ malai, a kra zlè a tambak, cèw ba mvi staɗ, nsuɗekèdekaʼa, va-ndara na Zhiklè,

⁴ a marai a drok staɗ, nsuɗekɗekaʼa, va-ndara na Zhiklè, a marai a drok staɗ a nshid gèɗ, a kin zlaha na Ndo nzi pèc pècèk, a movar te vaʼa, mbsoma a mbar. Aman a patsna Ndo nzi pèc pècèk a di a gudoko kinè va a dai.

⁵ A ta hulkoɗi skwi ara man Moise a gada ta, a sam gi mɓicè-va, a mpi ndohi tèlèba ta shkè a ta zlatsa a pa a sam Ndo nzi pèc pècèk.

⁶ A Moise a ngaɗa: Nta skwi man Ndo nzi pèc pècèk a njè kinè aman kin giaʼa, a nʼnjèl Ndo nzi pèk pècèk adi a gudoko kinè va a dai.

⁷ A Moise a ngaɗa na Aaron: Zlatsa a sam mvi skwi a Zhiklè, vau skwi ngaya a gèɗ malai, ndara na skwi ngaya a Zhiklè, a ka ngatsa ta mpil gèɗ a kinè a mpi ndohai. Te deɓaʼa vau skwi ndohai, a ka ngatsa ta mpil gèɗ, ara man Ndo nzi pèc pècèk a gada.

⁸ A Aaron a nzlatsa a sam mvi skwi a Zhiklè, a nzloho kra zlè a gèɗ mali na.

⁹ A wudahi Aaron ta va na Pombaz, a nengaʼa a nʼnècèdè kra ri na a va pombaz, a mfaɗda a drom sam mvi skwi a Zhiklè. Njèkèɗi pombaz a mbada a herkeda a sam mvi skwi a Zhiklè.

¹⁰ Mbeza skwi man a vau a gèɗ malai, a kwa deɓa, a mbeza te verzi menad, a nfa na vogwa a gèɗ sam mvi skwi a Zhiklè, ara man Ndo nzi pèc pècèk a gada na Moise.

¹¹ A zluèɗ a bkwai, a nfa na vogwa a dal kokwar.

¹² Te deɓaʼa a nzloho skwai, a nʼndara na Zhiklè, a wudahi Aaron ta va na Pombaz, a nengaʼa a nguceda a zlazlar sam mvi skwi a Zhiklè.

¹³ A skwi man ta ndara na Zhiklè, ta ngelaʼa a ta va na Zhiklè, a gèɗèʼa ba, a Aaron a nfa na vogwa a gèɗ sam mvi skwi a Zhiklè.

¹⁴ A vayats a sakaʼa a mpana a iyam, a nfa na vogwa a deɓ skwi man a ndara na Zhiklè a gèɗ sam mvi skwi a Zhiklè.

¹⁵ Te deɓaʼa a mvau skwi ndohai ta vau: a ncko ɓok a géɗ mali ndohai, a nzlahaʼa, a mvau a géɗ malai, ara nshèlèkuraʼa.

¹⁶ Te deɓaʼa a nʼndara na skwi a Zhiklè, a ngau lèmèlèmè ara man Zhiklè a jhèɗèʼa.

¹⁷ A mvau movar ba. A nco zlukri staɗ, a nfa na vogwa a sam mvi skwi a Zhiklè, a va skwi man ta ndara na a prèk a prèk.

¹⁸ Te deɓaʼa a nzlaha marai a nda drok ngiɗè man ta vau a nshid gèɗ. A wudahi Aaron ta cko Pombaz, a nengaʼa a nguceda a zlazlar sam mvi skwi a Zhiklè.

¹⁹ Mbeza mariaʼa, a drok, mbeza hutor a mbeza man a deɓa, kwa deɓa a mbeza te verzi menad,

²⁰ mbeza haha tèlèba, ta pa na a va ndavaʼa, a nfa na vogwa a géɗ sam mvi skwi a Zhiklè.

²¹ Ndavaʼa a ɗuar nte civèɗ ri mandai, Aaron a ngeda na gèɗ a sam Ndo nzi pèc pècèk, ara man Moise a goɗá.

²² Te deɓaʼa Aaron a mpeda ri a zhiklè, a mpshè ta ma ndohai; aman a mvau skwi a géɗ malai a nʼndara na skwi a Zhiklè klèng ma, a mshkè a hai.

²³ A Moise a Aaron to do a gi mɓicè-va. Aman ta shkè auda te pa, ta pshè ta ma ndohai. A nʼnjèl Ndo nzi pèc pècèk a ngudoko ta va a di a ndohi tèlèba,

²⁴ a vogwa a nshkè auda te Ndo nzi pèc pècèk, a nʼndeda skwi man ta ndara na, a mbeza a géɗ sam mvi skwi a Zhiklè a ma. Aman ndohi tèlèba ta rkaʼa, ta wuffè, a ta kalahai a deb sak Zhiklè.