Lèv. 8 - Ma Zhiklè

Mpi ndohi mvi skwi a Zhiklè a mizlinè

¹ Ndo nzi pèc pècèk a ngaɗa na Moise:

² Co Aaron a wudahi nengaʼa, a maslaka, a mbar man ta bada ta a gèɗ, a marai a géɗ malai, a drokihi cèw, a gadagar a movar te pa, man skwi nshégèrè a te di bai,

³ a ka baha ta mpi ndohai a ma gi mɓicè-va.

⁴ A Moise a ngau ara man Ndo nzi pèc pècèk a njè na a gèɗ, a mɓic ta mpi ndohai a sam gi mɓicè-va.

⁵ Moise a ngaɗa ta mpi ndohai: Na haha ma man Ndo nzi pèc pècèk a gada kinè, aman kin giaʼa.

⁶ Moise a mbaha ta nda Aaron a wudahi na a sam na, a mpan ta a iyam.

⁷ A mva na suɗkova a va Aaron, a ndzawa na hwaɗ a skwi deɓa, a mva na sajibèr a va, a mʼmanda Ephod a vaʼa a teɓa nengaʼa.

⁸ Te deɓaʼa a mva na maslaka ara limbèt a va, a mpeda Urim a Thummim a pa,

⁹ a mpaɗa na géɗ, a mfeda lamba a mpèɗè gèɗ, skwi mpèɗè gèɗ guro, skwi mpèɗè gèɗ nkezlaʼa, ara man Ndo nzi pèc pècèk a gada na Moise.

¹⁰ Te deɓaʼa Moise a nco mbar, a mfaɗda a gi nkezlaʼa, a skwi te pa tèlèba, a nʼnga a skwi nkezlaʼa.

¹¹ A nguceda mbar a sam mvi skwi a Zhiklè sak tsaraɗ, a nkezla sam mvi skwi a Zhiklè, a kolongwi nengaʼa tèlèba, a shiɗèf züdo a sakaʼa ba, a nʼnga tèlèba a skwi nkezlaʼa.

¹² Te deɓaʼa a mbada na mbar a gèɗ a Aaron, a ngi a ndo nkezlaʼa.

¹³ Te deɓaʼa Moise a mbaha ta wudahi Aaron, a mpa ta suɗkova a va, a ndzawa ta hwaɗ a skwi deɓa, a mpa ta pokwa a gèɗ, ara man Ndo nzi pèc pècèk a gada na Moise.

¹⁴ Te deɓaʼa a ngod aman ta cko marai a géɗ malai, a Aaron a wudahi nengaʼa ta nga na ri a gèɗ mariaʼa.

¹⁵ A Moise a nzlahaʼa, a nco Pombaz, a nʼnècèda kra ri na a va Pombaz, a mfaɗda a drom sam mvi skwi a Zhiklè, a ncè na mali auda a gèɗ. Njèkèɗi Pombaz, a mbada a herkeda a sam mvi skwi a Zhiklè, Aranta a nkezlaʼa, a ngatsa na skwi mpil gèɗ.

¹⁶ A Moise a nco mbeza tèlèba man a va vayats, a kwa deɓa cèw a mbeza a pa, a mbeza te verzi menad, a nfa na vogwa a géɗ sam mvi skwi a Zhiklè.

¹⁷ A marai, a bkwi ba a zluèɗ ba a ziaʼa ba ta fa na vogwa a dal kokwar, ara man Ndo nzi pèc pècèk a gada na Moise.

¹⁸ Te deɓaʼa a ncko drok, aman ta ndara na a Zhiklè. A Aaron a wudahi nengaʼa ta ngeda ri ta a gèɗ drok.

¹⁹ A Moise a nzlahaʼa, a nguceda pombaz a zlazlar sam mvi skwi a Zhiklè, a nʼngelaʼa.

²⁰ Te deɓaʼa Moise a nfa na vogwa a gèɗèʼa, a zluèɗèʼa, a mbezaʼa.

²¹ Vayats a sakaʼa a mpana a iyam, te deɓaʼa Moise a nfa na vogwa a zluèɗ drok tèlèba a géɗ sam mvi skwi a Zhiklè, a nʼndara na skwi a Zhiklè aranta, aman ambaha, a skwi man a va na Ndo nzi pèc pècèk te vogwa, ara man Ndo nzi pèc pècèk a gada na Moise.

²² Te deɓaʼa a ncko drok ngiɗè, man ta vi a pats man ta bada ta mbar a gèɗ, a Aaron a wudahi nengaʼa ta ngeda ri ta a gèɗ drok.

²³ A Moise a nzlahaʼa, a nco Pombaz, a mfaɗda a bkwi zlembaɗ Aaron te civèɗ ri mandai, a babgi rai te civèɗ ri mandai, a babgi sak te civèɗ ri mandai.

²⁴ Te deɓaʼa Moise a mbaha ta wudahi Aaron, a mfaɗda ta Pombaz a bkwi zlembaɗ tengaʼa ba, te civèɗ ri mandai, a babgi ri te civèɗ ri mandai, a babgi sak te civèɗ ri mandai. Njèkèɗi Pombaz, Moise a mbada a herkeda a sam mvi skwi a Zhiklè.

²⁵ Te deɓaʼa a nco mbeza: mbeza hutor, a mbeza man a va vayats tèlèba, a kwa deɓa cèw a mbeza a pa, a mbeza te verzi menad, a ɗuar nte civèɗ ri mandai.

²⁶ A nhul te gadagar, man movar te pa, movar man skwi nshégèrè a te di bai, man a zhè a sam Ndo nzi pèc pècèk, a movar wontuktukaʼa staɗ, a mɓelaslasla man mbar a pa staɗ, a mpa na a va mbezaʼa a ɗuar nte civèɗ ri mandai.

²⁷ Skwi haha tèlèba a mpa ta a ri a Aaron a wudahi nengaʼa, a ngeda na gèɗ a sam Ndo nzi pèc pècèk.

²⁸ Te deɓaʼa Moise a mhul skwi tèlèba a deɓa te ri ta, a mfa na vogwa a sam mvi skwi a Zhiklè. Nasa skwi man ta va na Zhiklè a pats man ta bada ta mbar a gèɗ, aman ambaha, skwi man ta va na Ndo nzi pèc pècèk te vogwa.

²⁹ A Moise a nco ndavaʼa, a ngeda na gèɗ a sam Ndo nzi pèc pècèk. Moise a nʼngotso te va skwi drok a pats man ta va na Zhiklè, a pats man ta bada ta mbar a gèɗ, ara man Ndo nzi pèc pècèk a gada na Moise, a skwi na.

³⁰ Te deɓaʼa Moise a nco mbar kètè, a Pombaz kètè, a sam mvi skwi a Zhiklè, a nguca na va Aaron a maslaka na, a va wudahi na a maslaka ta.

³¹ A Moise a ngaɗa na Aaron a wudahi na: Va-tau zluèɗ a ntamagi gi mɓicè-va, va-ndau a pa, a nda movar te gadagar, skwi man ta vau a pats man ta bada kinè mbar a gèɗ, ara man Zhiklè a njèy a gèɗ: Aaron a wudahi nengaʼa sèi ta da ndiaʼa.

³² Aman njèkèdi zluèɗ a movar, sèi kin fa na vogwa.

³³ A kin jèkeda sam a ntamagi gi mɓicè-va ɓai, mʼmèn tsaraɗ, ha ta pe kinè a mizlinè kinè klèng ma. Ha ta pe kinè a mizlinè, a gi mʼmèn tsaraɗ.

³⁴ Skwi man nga gu a patsna, Ndo nzi pèc pècèk a njè nga a gèɗ aman nga giaʼa, a kin ngècè skwi mpil gèɗ.

³⁵ Sèi kin nzi a ntamagi gi mɓicè-va mʼmèn tsaraɗ, a pats a vad, a kin dzodzor ma nkwèr Ndo nzi pèc pècèk, man ɓai kin metsi kinè. Aranta Ndo nzi pèc pècèk a njèy a gèɗ.

³⁶ A Aaron a wudahi nengaʼa ta gau skwi tèlèba, man Ndo nzi pèc pècèk a njè ta te ma Moise.