Lèv. 6 - Ma Zhiklè

Ma kita a géɗ mvi skwi a Zhiklè

¹ Ndo nzi pèc pècèk a ngaɗa na Moise:

² Fa ta ma a gèɗ a nda Aaron a wudahi nengaʼa, a ka gada ta: Nta ma nkwèré a géɗ skwi man kin ndara na Zhiklè. Skwi man ta ndara na a sam mvi skwi a Zhiklè, vogwa da mbatsahi a pa bai, ha ndidèk sam.

³ Ndo mvi skwi a Zhiklè da feda maslaka ntsentsai a sajibèr a va, da hul mèrwècèʼa, da patseda sam mvi skwi a Zhiklè.

⁴ Te deɓaʼa da suɗa na maslaka matsa auda a va, da feda ngiɗè a va, da helda mèrwèc auda a dal kokwar, a sam ntilaʼa.

⁵ Vogwa da mbatsahi bai, da vatsa pèc pècèk a prèk a prèk ndo mvi skwi a Zhiklè da peda shègwa a pa, da ɗesla na skwi man a ndara na Zhiklè a gèɗ, da feda mbeza skwi man a va na Zhiklè te pombai, a géɗ vogwa.

⁶ Vogwa da mbatsahi a sam mvi skwi a Zhiklè bai, da vatsa pèc pècèk.

⁷ Nta ma nkwèrè a géɗ movar man kin va na Zhiklè: Wudahi Aaron sèi ta hulkoɗi a sam Ndo nzi pèc pècèk, a sam mvi skwi a Zhiklè.

⁸ Te deɓaʼa da hul gufa, zlukri staɗ, te va movar man ta va na Zhiklè, a mbar a burdi man a zhè a géɗ movar man ta va na Zhiklè, da fa na vogwa, da va na Ndo nzi pèc pècèk a sam mvi skwi a Zhiklè, ambaha.

⁹ Njèkèɗiaʼa, Aaron a wudahi nengaʼa ta da ndiaʼa. Sèi ta ndiaʼa, skwi nshégèrè a te di bai, a sam nkezlaʼa, a dalmagi gi mɓicè-va.

¹⁰ Sèi ta tiaʼa, skwi nshégèrè a te di ɓai. I tsaka ta te va skwi man kin vayè, te vogwa. Nasa skwi nkezli nkezlaʼa, lèmèlèmè ara skwi man kin vi a géɗ malai, a skwi man kin vi a skwi mpil gèɗ.

¹¹ Ndohi te verzi Aaron, ngurhiaʼa, ta slaha ta ndiaʼa. Nasa ma nkwèrè kinè a mèdèp a géɗ skwi man kin va na Ndo nzi pèc pècèk te vogwa, te verzi wud wudahi kinè a ma ma. Ko wawa man a lama na, nkezla mènè.

¹² Ndo nzi pèc pècèk a ngaɗa na Moise:

¹³ Na haha skwi man Aaron a wudahi nengaʼa ta va na Zhiklè, a pats man ta bada ta mbar a gèɗ: gufa agoda staɗ a movar a pats a pats, rèta a prèk, rèta ngiɗè a dakwaɗ.

¹⁴ Sèi ta ti a géɗ tèndèlèk, mbsomaʼa a mbar, a ta va na Zhiklè. Movar man ta tu a gufa, ntsakaʼa, ta va na Ndo nzi pèc pècèk, ambaha.

¹⁵ Ndo mvi skwi a Zhiklè te va wudahi Aaron, man ta bada na mbar a géɗ te di man a nengaʼa, da tau. Nasa skwi man Ndo nzi pèc pècèk a jhèɗè a mèdèp. Vogwa da ndau tèlèba.

¹⁶ Movar man ndo mvi skwi a Zhiklè a viaʼa, vogwa da ndau tèlèba. Da ndaha ɓai!

¹⁷ Ndo nzi pèc pècèk a ngaɗa na Moise:

¹⁸ Gada ta nda Aaron a wudahi nengaʼa aranta: Na haha ma nkwèr a géɗ skwi man kin via a géɗ malai. A sam man ta zlèh skwi man ta ndara na a Ndo nzi pèc pècèk, ta zlèh skwi man ta va na a géɗ mali ba. Nasa skwi nkezli nkezlaʼa.

¹⁹ Ndo mvi skwi a Zhiklè man a viaʼa, da ndau. Da ndau a sam nkezlaʼa, a dalmagi gi mɓicè-va.

²⁰ Ko wawa man a lama na zluèɗ skwi nzlahaʼa, nkezla mènè. Aman pombaz a ndzerɗa na a maslaka, sèi kin pana maslaka man pombaz a ndzerɗaha a sam nkezlaʼa.

²¹ Shidèf man ta tu te pa, sèi ta bazlaʼa. Aman ta tau te shidèf züdo, sèi ta slahaʼa a ta pana a iyam.

²² Te verzi ndohi mvi skwi a Zhiklè, tèlèba ngurhi ta ndiaʼa. Nasa skwi nkezli nkezlaʼa.

²³ Aman te va skwi man ta vau a géɗ malai, te va Pombaz nengaʼa ta da a gi mɓicè-va, a ta pil géɗ mali a sam nkezlaʼa, kin ndau te nengaʼa bai, sèi ta fa na vogwa.