Lèv. 5 - Ma Zhiklè

¹ Aman ndo ngiɗè a gi malai: a ntsena ndo ngiɗè a derde ndo ngiɗè, a slaha a ngi malwudai – gar a rka a di na, gar a ntsena a zlembaɗ na – aman a nja ma bai, mali a gèɗ na.

² Man ɓai, aman ndo ngiɗè a lama na skwi nlizhèa, gar zluèɗ skwi dak nhuslaʼa, gar zluèɗ skwi kudom nhuslaʼa, gar zluèɗ skwi nda a hwaɗ nhuslaʼa, nsenaha bai, a lizhè va na a vna, mali a gèɗ na.

³ Man bai, man ndo ngiɗè a lama na skwi nlizhèa a va ndo ngiɗè – skwi mèmè man a lizhè ndo – nsenaha bai, aman te deɓaʼa a suna a ngaɗa i lama na skwi nlizhèa, malai a gèɗ na.

⁴ Man bai, aman ndo ngiɗè a mbèɗè langa a gèɗ skwi man ambaɓai, a géɗ skwi man amba man a woya a ngiaʼa, a mʼmbèɗè a haka na auda te ma, nsenaha bai, aman te deɓaʼa a suna, – mali a gèɗ na.

⁵ Aman ndo ngiɗè a ngu mali te skwi ar haha, da ngreda mali na, man a ngau, auda.

⁶ Te deɓaʼa da va na skwi a Ndo nzi pèc pècèk a gèɗ mali man a gau, a pil gèɗ: skwi kudom nkèshèa, te va demaʼa, gar tambak, gar ɓok, a géɗ malai. Aranta ndo mvi skwi a Zhiklè a ngatsa na skwi mpil gèɗ a géɗ mali man a gau.

⁷ Aman a slaha a mvi tambak a ɓok bai, da pu ngudokwarhi cèw, man bai nkuɗhomhi cèw, man ta gra tok-tok, a Ndo nzi pèc pècèk, a pela gèɗ mali na a vna; ngiɗè a géɗ malai, ngiɗè aman a ndara na a Zhiklè.

⁸ Da hulkoɗa a sam ndo mvi skwi a Zhiklè, a nengaʼa da vau nshèlèkuraʼa di man a viaʼa, a géɗ malai. Da berɗama na daʼai ndul ndul a sam dai Pombaz, da ngela na gèɗ auda bai.

⁹ Te deɓaʼa da guceda Pombaz skwi man ta vau a géɗ malai a hai a zlazlar sam mvi skwi a Zhiklè. Njèkèɗi Pombaz da ɗizhda a herkeda a verzi sam mvi skwi a Zhiklè. Nasa skwi man ta vi a géɗ malai.

¹⁰ Ngidè da ndara na Zhiklè, ara man Zhiklè a jhèdèʼa. Aranta ndo mvi skwi a Zhiklè a ngatsa na skwi mpil gèɗ a géɗ mali man a gau, a mali nengaʼa mpraʼa.

¹¹ Aman a slaha a ngècè ngudokwarhi cèw bai, a slaha a ngècè nkuɗhomhi cèw man ta gra tok-tok bai, da vau gufa agoda cèw a géɗ mali na man a gau. Nasa skwi man a va na Zhiklè a géɗ malai. Mbar a burdi a te dia ɓai. Nasa skwi man a via a géɗ malai.

¹² Da hulkoɗa a sam ndo mvi skwi a Zhiklè, a ndo mvi skwi a Zhiklè da hul zlukri staɗ a mva na Zhiklè, a nfa na vogwa a sam mvi skwi a Zhiklè, a va skwi man a va na Ndo nzi pèc pècèk te vogwa. Nasa skwi man a via a géɗ malai.

¹³ Ndo mvi skwi a Zhiklè a ngatsa na skwi mpil gèɗ a géɗ mali man a gau a haha tèlèba, a mali nengaʼa mpra. Njèkèdiaʼa, a ndo mvi skwi a Zhiklè, lèmèlèmè ara movar man ta va na Zhiklè.

Mvi skwi a Zhiklè a skwi mpil gèɗ

¹⁴ Ndo nzi pèc pècèk a ngaɗa na Moise:

¹⁵ Aman ndo ngiɗè a mberceha skwi nkezlaʼa man ta va na Ndo nzi pèc pècèk, nsenaha ɓai, da pul gèɗ a Ndo nzi pèc pècèk, a drok staɗ te va rèwè, nsuɗekɗekaʼa, te di Suli nkezlaʼa, a skwi man a vi a skwi mpil gèɗ.

¹⁶ Skwi nkezlaʼa man a nco a metsar, da menda a deɓa, a vi skwi staɗ a verzi skwi zlam, zlam. Skwi sa, da va na ndo mvi skwi a Zhiklè, da ngatsa na skwi mpil gèɗ a nda drok man a vi a géɗ skwi mpil gèɗ; a mali nengaʼa mpra.

¹⁷ Ko wawa man a gi malai, a ntawaɗaha ma nkwèr Ndo nzi pèc pècèk, nsenaha bai, a ngau skwi ambaɓiaʼa, mali a gèɗ na.

¹⁸ Da cko drok te va rèwè, nsuɗekeɗekaʼa, a kin livè te di skwi man kin va na Zhiklè a skwi mpil gèɗ, a ndo mvi skwi a Zhiklè da ngatsa na skwi mpil gèɗ mali man a nga na a rai, a mali nengaʼa mpra.

¹⁹ Nasa skwi man a va na Zhiklè a skwi mpil gèɗ. Te man a ngau malai a sam Ndo nzi pèc pècèk.

²⁰ Ndo nzi pèc pècèk a ngaɗa na Moise:

²¹ Aman ndo ngiɗè a ngau malai, a nʼngwoda Ndo nzi pèc pècèk: gar a tsakal ma a sam nslamagi na a géɗ skwi man a fedahi a sam na, gar a nco skwi a metsar, gar a titka na gèɗ a nslamagi na,

²² gar a tèvèshè skwi ndo ngiɗè man a ze na, gar a gi malwuɗi ncèkèlma a géɗ mali ndo ngiɗè,

²³ ndo man a gu malai, a nkalahi a mali arsa, da menda skwi a deɓa: skwi man a co a metsar, a skwi man a cèha, a skwi man ta fedahi a sam na.

²⁴ Skwi tèlèba man a tsokol ma a géɗèʼa, da menda a deɓa, a skwi staɗ a verzi zlam, zlam, a vaʼa. Da va na bab skwiaʼa a pats man a vi skwi a Zhiklè a géɗ skwi mpil gèɗ.

²⁵ A drok te va rèwè, man a va na Ndo nzi pèc pècèk a skwi mpil gèɗ, man kin livè te di skwi man kin va na Zhiklè a skwi mpil gèɗ, da ckoɗa a sam ndo mvi skwi a Zhiklè.

²⁶ A ndo mvi skwi a Zhiklè da ngatsa na skwi mpil gèɗ a sam Ndo nzi pèc pècèk, a mali mèmè man ndo a gau, mpraʼa.