Lèv. 4 - Ma Zhiklè

Mvi skwi a Zhiklè a gèɗ malai

¹ Ndo nzi pèc pècèk a ngaɗa na Moise:

² Gada ta ndohi Israel aranta: Aman ndo ngiɗè a ntawaɗaha ma nkwèr Ndo nzi pèc pècèk, a ngau mali aranta, nsenaha bai:

³ Aman ndo ngu mali sa, ndo mvi skwi a Zhiklè, man ta bada na mbar a gèɗ, a nkalde ta ndohi a malai a vna, da va na gol marai nsuɗekɗekaʼa a Ndo nzi pèc pè-cèk, a géɗ malai man a gau, nasa skwi man a va na Zhiklè a géɗ malai.

⁴ Da cko marai a ntamagi gi mɓicè-va, a sam di Ndo nzi pèc pècèk. Da ngeda rai a gèɗ mariaʼa, da zlaha marai a sam di Ndo nzi pèc pècèk.

⁵ A ndo mvi skwi a Zhiklè man ta bada na mbar a gèɗ da ɓata te va Pombaz marai, da da a gi mɓicè-va.

⁶ A ndo mvi skwi a Zhiklè da nècèdè ri na a va Pombaz, da guceda a maslaka a sam nkezlaʼa, sak tsaraɗ.

⁷ Te deɓaʼa ndo mvi skwi a Zhiklè da faɗda Pombaz a va dromhi sam nʼndèr ɓurdi a Zhiklè, te gi mɓicè-va, a sam di Ndo nzi pèc pècèk. Njèkèɗi pombaz da badaussa, a verzi sam mvi skwi a Zhiklè, man a zhè a ntamagi gi mɓicè-va.

⁸ Te deɓaʼa da porko mbeza auda te va zluèɗ marai man ta va na Zhiklè a géɗ malai: mbeza tèlèba man a mbèda vayats a pa, a mbeza te slrats vayats tèlèba,

⁹ a kwa deɓa cèw a mbeza a pa, mbeza man a deɓaʼa, a mbeza te verzi menad man a zli auda a nda kwa deɓa.

¹⁰ Lèmèlèmè ara man ta gi a sam marai man ta via te pombai.

¹¹ Hutèd marai, a zluèɗ nengaʼa tèlèba, a gèɗèʼa, a sakhiaʼa, a vayatsaʼa, a ziaʼa,

¹² marai tèlèba da hulo, da da auda a dal kokwar, a sam ntilaʼa, a sam man ta wusheda mèrwèc skwi nʼndaraʼa a pa, a ta fa na vogwa a géɗ shègwa. Da fa na vogwa a sam man ta wusheda mèrwèc a pa.

¹³ Aman mpi ndohi Israel tèlèba ta gu malai, a mpi ndohi ta senaha ɓai, aman ta tawaɗaha ma nkwèr Ndo nzi pèc pècèk, a ta gu mali arsa,

¹⁴ a mali man ta gau a ngredè auda, mpi ndohi da vau gol marai a géɗ malai, da ckoɗa a ntamagi gi mɓicè-va.

¹⁵ A ndohi nhalaʼa sèi ta ngeda rai a gèɗ marai, a sam di Ndo nzi pèc pècèk.

¹⁶ A ndo mvi skwi a Zhiklè, man ta bada na mbar a gèɗ, da ckoɗi Pombaz marai a gi mɓicè-va.

¹⁷ Te deɓaʼa ndo mvi skwi a Zhiklè da nècèdè kra ri na a va Pombaz, da guceda a maslaka sak tsaraɗ, a sam di Ndo nzi pèc pècèk.

¹⁸ Te deɓaʼa da faɗda pombaz a va dromhi sam mvi skwi a Zhiklè, man a zhè te gi mɓicè-va, a sam di Ndo nzi pèc pècèk. Njèkèɗi Pombaz tèlèba, da badaussa a verzi sam mvi skwi a Zhiklè man a zhè a ntamagi gi mɓicè-va.

¹⁹ Te deɓaʼa da hul mbeza tèlèba, da fa na vogwa a sam mvi skwi a Zhiklè.

²⁰ Da gu a mari haha lèmèlèmè ara man a giaʼa a mari ngiɗè man ta via a géɗ malai, da gu arsa. A ndo mvi skwi a Zhiklè a ngatsa ta skwi mpil gèɗ, a mali tengaʼa mpra.

²¹ Aman marai sèi ta da auda a dal kokwar, a ta fa na vogwa, lèmèlèmè ara nshèlèkuraʼa. Nasa skwi man mpi ndohai ta via a gèɗ malai.

²² Aman bai a ngu malai, a ntawaɗaha ma nkwèr Ndo nzi pèc pècèk, Zhiklè na, nsenaha ɓai, a mali a zhè a gèɗ na,

²³ te deɓaʼa a suna a ngaɗa i gu malai, da vau mazawal nsuɗekɗekaʼa.

²⁴ Da ngeda rai a gèdèʼa, da zloho a sam di Ndo nzi pèc pècèk, a sam man ta zlèh skwi man ta ndara na a Zhiklè. Nasa skwi man ta via a géɗ malai.

²⁵ Ndo mvi skwi a Zhiklè da nècèdè kra ri na a va Pombaz skwi man ta zlu a géɗ malai, da faɗda a dromhi sam mvi skwi a Zhiklè. Njèkèɗi Pombaz da badaussa a verzi sam mvi skwi a Zhiklè.

²⁶ Mbeza nengaʼa tèlèba da fa na vogwa a sam mvi skwi a Zhiklè, lèmèlèmè ara mbeza skwi man ta via te pombai. Aranta ndo mvi skwi a Zhiklè a ngatsa na skwi mpil gèɗ, a géɗ mali na, a mali nengaʼa mpraʼa.

²⁷ Aman ndo kokwar ambalai a ngu malai, nsenaha ɓai, a ntawaɗaha ma nkwèr Ndo nzi pèc pècèk, a ngu malai,

²⁸ te deɓaʼa a suna a ngaɗa i gu malai, da vau dem ɓok nsuɗekɗekaʼa, da zla na Zhiklè.

²⁹ Da ngeda rai a gèɗ skwia, man a via a géɗ malai, da zloho a sam man ta zlèh skwi man ta ndara na a Zhiklè.

³⁰ Ndo mvi skwi a Zhiklè da nècèdè kra ri na a va Pombaz, da faɗda a dromhi sam mvi skwi a Zhiklè. Njèkèɗi pombaz tèlèba, da badaussa a verzi sam mvi skwi a Zhiklè.

³¹ Aman mbeza tèlèba da zla na auda, ara man ta gu a sam skwi man ta zlu te pombai. A ndo mvi skwi a Zhiklè da fa na vogwa a sam mvi skwi a Zhiklè, a ngi ambaha Ndo nzi pèc pècèk. Aranta ndo mvi skwi a Zhiklè a ngatsa na skwi mpil gèɗ, a mali nengaʼa mpraʼa.

³² Aman a woya a nzla na tambak a Zhiklè a géɗ malai, da cko tambak, demaʼa, nsuɗekɗekaʼa.

³³ Da ngeda rai a gèɗ skwi man a via a géɗ malai, da zloho a géɗ malai, a sam man ta zlèh skwi man ta ndara na a Zhiklè.

³⁴ A ndo mvi skwi a Zhiklè da nècèdè kra ri na a va Pombaz skwi man ta vi a géɗ malai, da faɗda a dromhi sam mvi skwi a Zhiklè. Njèkèɗi pombaz tèlèba da badaussa a verzi sam mvi skwi a Zhiklè.

³⁵ Mbeza tèlèba sèi ta zlia auda, ara man ta gu a sam skwi man ta zlu te pombai. A ndo mvi skwi a Zhiklè da fa na vogwa a sam mvi skwi a Zhiklè, a deɓ skwi man ta va na Ndo nzi pèc pècèk te vogwa. Aranta ndo mvi skwi a Zhiklè a ngatsa na skwi mpil gèɗ a géɗ mali man a gau, a mali nengaʼa mpraʼa.