Lèv. 26 - Ma Zhiklè

Mpshè ma a géɗ ndohi man ta fi gèɗ a ma Zhiklè

¹ Kin gu vri bai, kin gu skwi mʼmbèh skwi a mblom bai, kin Zlatseda kwa a dzegau a géɗèʼa bai, kin gurɓahi a sam ta bai, aman iyè Ndo nzi pèc pècèk, Zhiklè kinè.

² Vo-slubordo pats nshèk va ga, va-gu zlau sam ga nkezlaʼa! Iyè Ndo nzi pèc pècèk.

³ Aman kin jèjèr ma nkwèr ga, a ma kita ga, a kin gi aranta,

⁴ i zlinda kinè iyam man tiɗè sama ma, a herkeda a yi skwi na, a wof a yi wud na.

⁵ Te deɓaʼa kin ɓicè dau, ha kin pèr nyi wof, a kin pèr nyi wof, ha kin zleki skwi zaʼa. A skwi nʼndi kinè a da ngeza kinè, a kin nza bar-ɓararaʼa te kokwar kinè.

⁶ I woy a i va kinè gumai a kokwar, a kin nzhunè a zlau ka ɓai. Skwi dakhi man ta ndi ndo, i zede ta, a tsakwal a dzi a ndo te kokwar kinè asaɓai.

⁷ Kin da dzam ta mayan hi auda a ma kinè, a ta bazl ta a tsakwal.

⁸ Zlam te va kinè ta da dzam ta 100; 100 te va kinè ta da dzam ta 10.000. Tsakwal a da bazl ta mayamhi kinè.

⁹ I nza kinè a deɓa, a i gi aman kin mènè kumba, a nderzlè-ma ga a prè azɓai.

¹⁰ Kin da ndi mova dau, kin patsko mʼmovaʼa auda, a kin pi mɓuaʼa a pa, a gèɗ man kumba.

¹¹ I da nzi te ndev kinè, a kin ngezlay a gèɗ asaɓai.

¹² I shèwèlè te ndev kinè, a i gi a Zhiklè kinè, a kinè ndohi ga.

¹³ Iyè Ndo nzi pèc pècèk, Zhiklè kinè, man i helka kinè auda te kokwar Egypte, a kin nzi te pa ara ɓèlèlihi asaɓai. I pasla wof nkelawa te daʼai kinè, a kin dè a gèɗ nzlatsedaʼa.

Kita a géɗ ndohai man ta gi mèdègèɗ

¹⁴ Aman kin da gi mèdègèɗ a sam ga, a kin dzodzor ma nkwèr ga tèlèba bai,

¹⁵ aman kin kwola ma nkwèr ga, kin woya ma kita ga bai, a kin gi ara ma nkwèr ga tèlèba azbai, a kin prè nderzlè-ma ga aranta,

¹⁶ i ba i gi a sam kinè lèmèlèmè. I da ga kinè skwi mwuɗitpa: zlau a gs kinè, lamba a nde kinè, vogwa a va, di kinè a vatasl a vatasl, nshèffè kinè te ndav te ndav. Kin zleki skwi ambalai, mayamhi kinè ta da ndi skwi man kin ɓicaʼa.

¹⁷ I ngwoda kinè gèɗ a va, a mayamhi kinè ta da dum kinè. Ndohi shèwa ta gi bi a gèɗ kinè, a kin hi kinè, ko ndo nha a verzi kinè ɓai.

¹⁸ Aman ko gar haha kin gi mèdègèɗ a sam ga genè, i ga kinè kita holholaʼa, sak tsaraɗ, a gèɗ mali kinè.

¹⁹ Nfi va man kin fiaʼa, i gédèshèʼa. Giɗfèk a shfè ara züdo kwandalasslassaʼa, a herkeda a gwor na harkangkangaʼa.

²⁰ Kin gi mizlinè, a kin ngézhè ambalai. Herkeda kinè a da yi skwi azɓai, a wof kinè a da yi wuda azɓai.

²¹ Aman kin salay va a gèɗ, a kin gi mèdègèd a sam ga, i ga kinè matakwan a vaʼa sak tsaraɗ, ara mali kine.

²² I pra kinè skwi dak a va, ta da parama kinè wud kinè, a ta ndiv skwi kinè, ta ndiv kinè, a ndo a shèwèlè te kokwar kinè azbai.

²³ Aman ko gar haha kin manda gèɗ a hi bi genè, a kin salay va a gèɗ,

²⁴ i ba i Sala kinè va a gèɗ, a i ga kinè matakwan, sak tsaraɗ, a gèɗ mali kinè.

²⁵ I bazl kinè a tsakwal, da pulkoy di man a nderzlè-ma ga auda. Aman te deɓaʼa kin hi a kokwar kinè, i pra kinè gidibèr a va, a i va kinè a ri a mayamhi kinè.

²⁶ Aman i cèma kinè movar kinè auda te ma, ngwozi kula ta ti skwi a rèwèc staɗ, a ta kezla kinè te deɓaʼa, a slra a ngeza kinè ɓai.

²⁷ Aman ko gar haha kin gi mèdègèɗ a sam ga genè, a kin salay va a gèɗ,

²⁸ i woy a i gi ndav a géɗ kinè, a i ngeza kinè, sak tsaraɗ, a géɗ mali kinè.

²⁹ Kin da ndi wudahi a dalahi kinè.

³⁰ A i da gedassa sam mvi skwi a zhiklèhi kinè a géɗ za, a zhiklè mbèh skwi pats. A nckondo kinè i tsamda a va skwi mʼmbèh skwi kinè, a zhkèhayè ambaɓai.

³¹ I da mbeɗda kokwar kinè a dikai, a i gedassa sam kinè nkezlaʼa, a skwi man kin vayè da zhkèhayè a htsan bai!

³² Iyè a ri ga i woy a i gedassa kokwar, a mayamhi kinè ta nzi a pa, ta rkaʼa, a ta gi zlau a géɗèʼa.

³³ Aman kinè, i woy a i ksar kinè a ndev ndohi herkeɗa, a i gedka kinè tsakwal, a herkeda kinè a ndi a hèshèkèɗ, a kokwar kinè a mbeɗ na a ngi a dikai.

³⁴ Te deɓaʼa mvi man herkeda a sok va bai, man a nʼnza ara hèshèkèd, a kin nza te kokwar mayamhi kinè, a shèk va mènè, te di mvi nshèk va man nkala a deɓa.

³⁵ Mvi tèlèba man a nʼnza ara hèshèkèd, a shèk va, nshèk va man kin va na bai, te va man kinè te pa.

³⁶ A njèkèɗia te ndev kinè i gi a ndav tengaʼa a mbeɗè te kokwar mayamhi tengaʼa. Ngidè ko kwolala vah wof a dzam ta, ara man ta hi auda a sam tsakwal, a ta kèlèhai, ko ndo a dzam ta azbai.

³⁷ A ngiɗè a kèlèhi a deb ngiɗè, a ta ɗumbokda va a sam staɗ, ara man ta hi ta a sam tsakwal, ko ndo a hi a verzi tengaʼa azbai. Kin slaha kin zlècèhi a sam mayamhi kinè azbai,

³⁸ a kin zi kinè te ndev ndohi man verzi ta tsaɗ, a herkeda mayamhi kinè a da ge rɗa kinè a ma.

³⁹ Aman njèkèdia te ndev kinè ta da gedas ta te kokwar mayamhi kinè, a géɗ mali tengaʼa, a mali bab ta man a zhè a gèɗ ta. Sèi ta gedas ta.

⁴⁰ Aman te deɓaʼa ta da ngreda mali ta a mali bab ta, ara man ta pra nderzlè-ma ga, a ta salay va a gèɗ –

⁴¹ a géɗ nengaʼa i ba i Sala ta va a gèɗ, a i dzam ta a kokwar mayamhi ta – aman te deɓaʼa ta manda gèɗ a hai, nfi va ta kala ta a ndav, a ta til malai,

⁴² i woy a i hér nderzlè-ma ga a Jacob, a nderzlè-ma ga a Isaac, a nderzlè-ma ga a Abraham, a i woy ai hér kokwar.

⁴³ Aman sèi ta jèkeda kokwar dai, a i ngècè nshèk va te di mvi man a sok va bai, a nzi ara hèshèkèd dai, a ta nzi te pa azbai, a ta til mali ta, a géɗ man ta kwola ma kita ga, a ta woy ma nkwèr ga bai.

⁴⁴ Aman ko ta te kokwar mayamhi ta, i kwol ta a mèdèp azbai, ta ndarayè holholaʼa azbai, a i zede ta a mèdèp azbai, i prè nderzlè-ma ga azbai. Iyè Ndo nzi pèc pè-cèk, Zhiklè tengaʼa.

⁴⁵ I woy a i hér nderzlè-ma ga a nda babhi ta, man i helka ta auda te kokwar Egypte, a sam di ndohi herkeda, a i mbel ta, a i gi a Zhiklè tengaʼa. Iyè Ndo nzi pèc pècèk.

⁴⁶ Nasa ma nkwèrè, ma bai, ma kita man Ndo nzi pèc pècèk a va ta ndohi Israel a géɗ za Sinai te ma Moise.