Lèv. 25 - Ma Zhiklè

Herkeda a shèk va mvi mwuffe

¹ A Ndo nzi pèc pècèk a ngaɗa na Moise a géɗ za Sinai aranta:

² Gada ta ndohi Israel aranta: Aman kin da ndikè a kokwar man i woy a i va kinè, herkeda tèlèba da sok va a sam Ndo nzi pèc pècèk.

³ Mvi 6 kin pizhè gi dau kinè, mvi 6 kin pizhè gi lak kinè, a kin ɓicè skwai.

⁴ Aman mvi matsaraɗaʼa, herkeda da sok va, mvi nshèk va a sam Ndo nzi pèc pècèk. Kin zlekau skwa bai, kin slüdo wof bai!

⁵ Ntogodza skwai kin ɓica bai, nyi wof man kin sleɗa bai, kin por bai. Herkeda da sok va!

⁶ A skwi man herkeda a yiè tʼhwaɗ mvi man a shèk va, va-ndau a pa a pa, kinè a bèlèlihi ngaya, ngu-raʼa a ngwoz, a ndohi mizlinè ngaya, a ndohi te gi ngaya.

⁷ Ko skwi gi ngaya a skwi dak da ndau skwi man herkeda a ckoɗauda.

⁸ Te deɓaʼa ka ngrè mvi nshèk va tsaraɗ, mvi tsaraɗ, sak tsaraɗ, a gi tèlè mvi 49.

⁹ A ka tsu tolom, a ki matsaraɗaʼa, mʼmèn 10, a pats mprè malai, va-tsu tolom te kokwar tèlèba.

¹⁰ Aranta va-gu ngolala mvi 50 aʼa, a kin boho, var a mpraʼa te kokwar tèlèba, a sam ndohi man a pa tèlèba. Nasa mvi mwuffè. A ndo staɗ staɗ tèlèba da ngots gi dau bab na a skwi nʼndi bab na a deɓa.

¹¹ Mvi 50 aʼa da gu a mvi mwuffè. Kin zlekau skwa bai, kin ɓüco ntogodza skwa bai, kin por nyi wof man kin sleɗa ɓai,

¹² a géɗ man mvi mwuffè. Mvi nkezlaʼa a sam kinè. Va-ndau skwi man a shkè auda tʼherkeda kata genè.

¹³ Mvi sa, staɗ staɗ te ndev kinè da ngots gi dau bab na a deɓa.

¹⁴ Aman ka pra na skwi ngiɗè a nslamagi ngaya, man ɓai ka shum skwi a sam na, ndo da da gu ri a sam kramam na ɓai!

¹⁵ Va-ngul ganai, a kin ngrè mvai te mvi mwuffè man nkala a deɓa, kin dèlè te mvi mɓicè skwai.

¹⁶ Man mvi a ma kumba dai, a prè a gani kumba. Man mvi a ma kètè genè, a gani kètè genè. Skwi man a pra ka, a ɓüca tʼhwaɗ mvai, a mvi a mvai.

¹⁷ Ndo da ngwoda kramam na ɓai, aman da gu zlau Zhiklè. Iyè Ndo nzi pèc pècèk, Zhiklè kinè.

¹⁸ Gar haha va-dzodzor ma nkwèr ga, a ma kita ga, va-gu arsa! A kin da nzi te kokwar, skwa a ga kinè azbai,

¹⁹ a herkeda a yi skwai, a skwi nʼndi dèʼa kinè, kin nza genè.

²⁰ Aman kin hur a kin gada: Te mvi matsaraɗaʼa nga da ndi mè? Nga slaha nga zleki skwi azbai, nga slaha nga ɓicè skwi azbai –

²¹ i woy a i pshè kinè ma te mvi mamokwaʼa, a skwi a dèʼa kinè te di mvi makar.

²² Te mvi matsamakaɗaʼa kin zleki skwai, a kin da ndi dau mʼmovaʼa genè. Ha kin ɓicè skwi te mvi macüdaʼa, kin ndi dau mʼmovaʼa genè.

²³ Kin slaha kin preda dak a ma a mèdèp ɓai, te man herkeda a ga. Kinè mbrokihai a ndohi nshèwèlè a sam ga.

²⁴ Te kokwar tèlèba man kin dè kwèrèʼa, va-va ta civèɗ a ndohai a ta shum skwi man ta preda ma a deɓa.

²⁵ Aman kramam ngaya a tawass na, a mpreda dak na a ma, sèi gwoli na man ta mbakaɗa hwaɗ da shum skwi man kramam nengaʼa a mpreda ma a deɓa.

²⁶ Aman a ngècè ndo man a suma na skwi na a deɓa azbai, aman a slaha a nʼngècè Suli a ri na, a sumkaɗa deɓa.

²⁷ Da ngra mvi man a mpreda ma, da menda na njèkèɗi Suli a deɓa a ndo nsumaʼa, a gi a skwi na zaʼa.

²⁸ Aman a ngècè Suli kumba azbai, a slaha a nsumkaɗa deɓa azbai, skwi man a mpreda ma da nza, te ri ndo nsuma, ha mvi mwuffè. A mvi mwuffè, mpraʼa, a ngècè skwi na a deɓa.

²⁹ Aman ndo ngiɗè a shum gai te kokwar nʼngala te pa, a slaha a nsumkaɗa a deɓa tʼhwaɗ mvi sa. A slaha a nsumkaɗa deɓa pats ngiɗè asaɓai.

³⁰ Aman a shum skwi na a deɓa azbai tʼhwaɗ mvi sa, gi sa a mèdèp a ndo man a sumaʼa, a ndohi te verzi na ta slaha ta ngècè a deɓa te mvi mwuffè ɓai.

³¹ Aman gihi man a vara, man ta ngalda a pa ɓai, ta ngrè a va dak. Gi haha ta slaha ta sumkaɗa deɓa pèc pècèk te mvi mwuffè.

³² Aman kokwar ndohi Lévi – gi te kokwar tengaʼa – ta slaha ta shum skwi ta a deɓa pèc pècèk.

³³ Aman ndo man a shum skwi te ri ndo Lévi, gi te kokwar tengaʼa, ndohi Lévi ta ngècè a deɓa te mvi mwuffè. A géɗ man gi te kokwar Lévi; a ndohi Israel.

³⁴ Sam mwèr skwi a tsagi kokwar ta, ta slaha ta prè azɓai. Skwi ta a mèdèp.

³⁵ Aman kramam ngaya a tsagi ngaya a tawass na, a slaha a nʼnzi a géɗ na ɓai, sèi ka takaha, a slaha a nʼnzi a sam ngaya ara ndo mbrok, ara ndo gi ngaya.

³⁶ Ka dzhoɗ skwi a deɓa, a mpataka a vaʼa, te ri nengaʼa bai! Sèi ka gi zlau Zhiklè ngaya, a kramam ngaya a slaha a nʼnzi a sam ngaya.

³⁷ Aman ka va na Suli a dua, ko dzhoɗ mpataka a vaʼa ɓai! Aman ka pa na dau a dua, ka dzhoɗ a mpataka a vaʼa ɓai!

³⁸ Aman iyè Ndo nzi pèc pècèk, Zhiklè kinè, man i helka kinè auda te kokwar Egypte, a i va kinè kokwar Canaan, a i gi a Zhiklè kinè.

³⁹ Aman kramam ngaya a tsagi ngaya a tawass na, a mpreda va na a ma a sam ngaya, da gu mizlinè ɓèlè ɓai!

⁴⁰ Da nza a sam ngaya ara ndo mizlinè, ara ndo gi ngaya! Da gu mizlinè a sam ngaya, ha mvi mwuffè.

⁴¹ Te deɓaʼa ka praʼa, a wudahi nengaʼa tèlèba, da mena a deɓa a sam gwoli na, a sam ncèkè bab na.

⁴² Te man ta ɓèlèlihi ga, man i helka ta auda te kokwar Egypte. Ka pra ta ma a ɓèlèlihi ɓai!

⁴³ Ka gu bi a géɗ nengaʼa a wuɗi bai; aman sèi ka gi zlau Zhiklè ngaya.

⁴⁴ ʼBèlèlihi, ngurhi a ngwozi, man ka woyaʼa, va-suma a sam ndohi nte verzi ngiɗè, man ta nza te kokwar kinè,

⁴⁵ kin slaha kin sum ta, te verzi ndohi tengaʼa man ta zhè te kokwar kinè, man ta yu te kokwar kinè. Sèi ta ndi a ndohi kine,

⁴⁶ a ndohi te verzi kinè; a mèdèp ɓèlèlihi kinè. Aman te va kramamhi kinè, ndohi Israel, ngiɗè da gu bi a géɗ ngiɗè a wuɗi ɓai!

⁴⁷ Aman mbrok, man ɓai ndo mana nzi a gi ngaya, a ndi a ndo mèshèlè, a man kramam ngaya a tsagi ngaya a tawass na, a mpreda va na a ma a ndo mbrok, man ɓai a ndo man a nza a gi ngaya, man ɓai a ndo te verzi nengaʼa,

⁴⁸ staɗ te va kramamhi nengaʼa da sumkaɗa deɓa!

⁴⁹ Man ɓai kük na, man ɓai kramam bab na da sumkaɗa deɓa, man bai gwoli na ngiɗè man verzi ta staɗ. Aman skwi na a zhè, da suma va na a deɓa a ri na.

⁵⁰ Aman da ngra Suli babgi na, a hinè te mvi man a preda va na a ma, ha ndikè na ma a mvi mwuffe. Suli a dèlè te nʼngèr mvi sa. Suli ta ngrèʼa ara Suli ndo mizlinè, mvi tèlèba man a nza a sam na.

⁵¹ Aman a suma va na a deɓa, njèkè mvi a ma kumba dai, ha mvi mwuffe, da menda Suli man a preda va na a ma a deɓa.

⁵² Aman njèkè mvi kètè genè, ha mvi mwuffe, da helaha. Suli mpil gèɗ, ta ngrè te mvi man a gu mizlinè.

⁵³ Da nza a sam na ara ndo mizlinè, a mvi a mvai. Da ga na wuɗi ara bi mwuɗitpa a sam di kinè bai.

⁵⁴ Aman ta suma a deɓa aranta bai, a mvi mwuffe sèi ta praʼa, a wudahi nengaʼa tèlèba.

⁵⁵ Aman ndohi Israel, ta a ga, ɓèlèlihi ga, man i helka ta auda te kokwar Egypte. Iyè Ndo nzi pèc pècèk, Zhiklè kinè.