Lèv. 23 - Ma Zhiklè

Pats ngolala

¹ A Ndo nzi pèc pècèk a ngaɗa na Moise:

² Gada ta ndohi Israel aranta: Nta ngolala ga, ngolala Ndo nzi pèc pècèk, man kin bèhè a mbicè-va ngolala nkezlaʼa.

³ Mʼmèn mokwa kin gi mizlinè, aman pats matsaraɗaʼa, pats nshèk va mbiaʼa, mɓicè-va nkezlaʼa, a kin gi mizlinè azbai, a sam nʼnzi kinè tèlèba. Nasa pats nshèk va a géɗ Ndo nzi pèc pècèk.

⁴ Nta pats ngolala Ndo nzi pèc pècèk, mbicè-va nkezlaʼa, man kin bèhè a pa, man tiɗè sama ma, tiɗè sama ma.

⁵ A ki nshèlèkuraʼa, pats 14, a dakwaɗ, ngolala Pâque a Ndo nzi pèc pècèk.

⁶ A ki nshèlèkuraʼa, mʼmèn 15, ngolala movar man skwi nshégèrè a te di bai. Mʼmèn tsaraɗ kin ndau movar man skwi nshégèrè a te di bi genè.

⁷ A pats nshèlèkuraʼa va-gu a mɓicè-va nkezlaʼa, a kin gu mizline bai, ko keshkata.

⁸ Mʼmèn tsaraɗ kin va na skwi a Ndo nzi pèc pècèk te vogwa. A pats matsaraɗaʼa, nʼndikèma ngolala nkezlaʼa. Kin gu mizlinè bai, ko kèshkata.

⁹ A Ndo nzi pèc pècèk a ngaɗa na Moise:

¹⁰ Gaɗa ta ndohi Israel aranta: Aman kin da ndikè a kokwar man i woy a i va kinè, a kin da ɓicè skwi te pa, tsuvom skwi man kin ɓicaʼa, va-da na a ndo mvi skwi a Zhiklè.

¹¹ Nengaʼa da geda na gèɗ a nkèl-dau a sam Ndo nzi pèc pècèk, a pats nshèk va, te mangoslèmaʼa, a Zhiklè a wuffè a géɗ kinè.

¹² A pats man kin geda na gèɗ a nkèl-dau a sam Ndo nzi pèc pècèk, va-va na kra tambak staɗ, nsuɗekɗekaʼa, mvi staɗ, a kin ndara na Zhiklè,

¹³ a movar a vaʼa, gufa agoda cèw, mbsomaʼa, a mbar, ambaha Ndo nzi pèc pècèk; a skwi nsi a vaʼa, barassa lèta koloba.

¹⁴ Kin ndau movar, a dau mpinèa, tser dau mbatsaʼa bai, ha pats man kin va na skwi a Zhiklè kinè ma. Nasa ma nkwèr kinè te verzi wud wuda kinè a mèdèp, a sam tèlèba man kin nzi a pa.

¹⁵ Daga pats nshèk va, te mangoslèmaʼa, man kin geda na gèɗ a nkèldau, va-ngro luma tsaraɗ.

¹⁶ Va-ngraʼa, ha pats nshèk va matsaraɗaʼa, mʼmèn 50. Te deɓaʼa sèi kin va na movar a Ndo nzi pèc pècèk te dau mɓuaʼa.

¹⁷ Kin hulko te gi kinè movar cèw man kin geda na gèɗ a Zhiklè, ngaʼa a gufa agoda cèw, ntaʼa a skwi nshégèrè te pa, a tsuvom skwi a Ndo nzi pèc pècèk.

¹⁸ A va movar sèi kin vi wud tambaki 7, nsuɗekɗekaʼa, mvi staɗ, a gol marai a drokihi cèw. A kin ndara na skwi sa a Ndo nzi pèc pècèk, a movar a vaʼa, a skwi nsi a vaʼa, skwi man ambaha Ndo nzi pèc pècèk te vogwa.

¹⁹ A vaʼa kin vi mazawal staɗ a gèɗ malai, a wud tambaki cèw, mvi staɗ, te nshid gèɗ.

²⁰ A ndo mvi skwi a Zhiklè da geda na gèɗ a sam Ndo nzi pèc pècèk, a va tsuvom movar, a wud tambaki cèw. Sèi ta va na Ndo nzi pèc pècèk, a ndo mvi skwi a Zhiklè a ngècèʼa.

²¹ A pats nasa sèi kin bèhè a ngolala mɓicè-va nkezlaʼa; kin gu mizlinè ɓai! Nasa ma nkwèr kinè te verzi wud wuda kinè a mèdèp, a sam tèlèba man kin nzi a pa.

²² Aman kin tsi dau, kin ndikeda ma kuma gi dau bai! Aman kin ɓica ma, kin por nksara tʼhi bai. Kinjèka na a ndo ntawassaʼa, a ndo mbrok. Iyè Ndo nzi pèc pècèk, Zhiklè kinè.

²³ A Ndo nzi pèc pècèk a ngaɗa na Moise:

²⁴ Gada ta ndohi Israel: A ki tsaraɗ, pats nshèlèkuraʼa, vo-sok va, va-tsu tolom, a ndohi a ta suna ta ɓicè va a ngolala nkezlaʼa.

²⁵ Kin gu mizline bai, ko kèsh-kata, a kin va na skwi a Ndo nzi pèc pècèk te vogwa.

²⁶ A Ndo nzi pèc pècèk a ngaɗa na Moise:

²⁷ A ki tsaraɗ, mʼmèn 10, pats mprè malai. A kin shkè a sam mɓicè-va nkezlaʼa. Vo-sok va te skwi tèlèba, a kin va na skwi a Ndo nzi pèc pècèk te vogwa.

²⁸ A pats nasa kin gu mizlinè bai, ko kèshkata; nengaʼa pats mprè malai, pats man kin ngècè skwi mpil gèɗ a sam Ndo nzi pèc pècèk, Zhiklè kinè.

²⁹ Ko wawa man a jèkeda skwi nʼndi azbai a pats sa, ta zedkoɗauda te va ndohi na.

³⁰ Ko wawa man a gi mizlinè a pats nasa, i gedassedaussa te va ndohi na.

³¹ Kin gu mizlinè bai! Nasa ma nkwèr kinè te verzi wud wuda a mèdèp, a sam tèlèba man kin nzi a pa.

³² Nasa pats ngolala mbiaʼa a sam kinè, vo-sok va te skwi tèlèba! A dakwaɗ mʼmèn cüɗ a ki sa, ha ndè ma dakwaɗ ngiɗè, kin sok va!

³³ Ndo nzi pèc pècèk a ngaɗa na Moise:

³⁴ Gada ta ndohi Israel: Ki tsaraɗ, mʼmèn 15, ngolala te godzovok, mʼmèn tsaraɗ, a sam Ndo nzi pèc pècèk.

³⁵ A pats nasa kin ɓica va a ngolala nkezlaʼa. Kin gu mizlinè bai!

³⁶ Mʼmèn tsaraɗ, sèi kin vi skwi a Ndo nzi pèc pècèk. A pats matsamakaɗaʼa, va-ɓica va a ngolala nkezlaʼa, a kin va na skwi a Ndo nzi pèc pècèk te vogwa. Nasa nʼndikèma ngolala mɓicè-va. Kin gu mizlinè bai!

³⁷ Nasa pats ngolala man kin bèhè a mɓicè-va. Nasa skwi man kin va na Ndo nzi pèc pècèk te vogwa. Kin ndara na skwai, kin va na movar, kin zlaha na skwai, kin va na skwi nsai, a nciɗ sam a nciɗ sam, ara man a jhèɗèʼa.

³⁸ Nasa skwi man kin va na Zhiklè a vaʼa, a va skwi man kin va na a pats nshèk va, a va skwi man kin zla na, man kin gaɗdahai, a va skwi man kin hur te ndav kinè.

³⁹ A ki tsaraɗ, mʼmèn 15, man kin ɓica skwi te kokwar kinè, sèi kin gi ngolala Ndo nzi pèc pècèk, mʼmèn tsaraɗ. Pats nshèlèkuraʼa, pats nshèk va; pats matsamakaɗaʼa, pats nshèk va.

⁴⁰ A pats nshèlèkuraʼa va-hulko nyi wof mbelaʼa, vah gangar, ri wof a vah dizlimaʼa, a vah wuslaf, a kin wuffè a sam Ndo nzi pèc pècèk, Zhiklè kinè, mʼmèn tsaraɗ.

⁴¹ A mvi a mvai va-gu ngolala Ndo nzi pèc pècèk aranta mʼmèn tsaraɗ. Nasa ma nkwèr kinè te verzi wud wuda a mèdèp. Kin gi ngolalaʼa a ki matsaraɗaʼa.

⁴² Va-nza a godzovok mʼmèn tsaraɗ. Ndohi Israel tèlèba ta nzi a godzovok,

⁴³ a ndohi te verzi kinè ta suna, aman i helka ta ndohi Israel auda te kokwar Egypte, ta nza a godzovok. Iyè Ndo nzi pèc pècèk, Zhiklè kinè.

⁴⁴ A Moise a nʼngra ta pats ngolala Ndo nzi pèc pècèk a ndohi Israel.