Lèv. 22 - Ma Zhiklè

Skwi nkezlaʼa man ta va na Zhiklè

¹ A Ndo nzi pèc pècèk a ngaɗa na Moise:

² Gaɗa na Aaron a wudahi nengaʼa: aman ndohi Israel ta vay skwi nkezlaʼa, da vay a di na a di na, a ta derɗè nzlembaɗ ga nkezla bai. Iyè Ndo nzi pèc pècèk.

³ Gaɗa ta: Aman a ma ma ndo ngiɗè a zhè te verzi kinè, man a herdekay va a skwi nkezlaʼa, man ndohi Israel ta va na Zhiklè, a va nlizhèa, sèi ta zedkoɗauda a sam di ga. Iyè Ndo nzi pèc pècèk.

⁴ Ko wawa te verzi Aaron man hutsoɗ a va, man mblè a va man a zlèzlèyè, da ndau skwi nkezla ɓai, ha va nengaʼa mpana dai. Ko wawa man a lama na ndo ngiɗè man a lizhè va na a sam nckondo, man a bada iyam va a va,

⁵ man bai man a lama na skwi nda a hwaɗ, a lizhè va na a vna, man bai ndo ngiɗè man a lizhèʼa va na,

⁶ ndo man a lama na skwi aranta, nlizhèa ha dakwaɗ, da ndau skwi nkezla ɓai, sèi da pana va a iyam dai.

⁷ Aman pats nkala ma, nlizhɓi zaʼa; da ndau skwi nkezlaʼa zaʼa, nengaʼa movar na.

⁸ Da ndau skwi mʼmets mʼmetsi ɓai, skwi man skwi ngiɗè keɗa ɓai, man ɓai, a lizhè va na a vna. Iyè Ndo nzi pèc pècèk.

⁹ Sèi ta jèjèr ma kita ga, a ta fi mali a gèɗ ta azɓai a géɗ skwi nkezlaʼa, man ɓai ta metsi ta, te man ta derɗaʼa. Iyè Ndo nzi pèc pècèk, man i ga ta a ndohi nkezlaʼa.

¹⁰ Ndo mbrok a slaha a nʼndi skwi nkezlaʼa azbai. Ndo te gi na, ndo man a vak a mizlinè a sam ndo mvi skwi a Zhiklè, ta slaha ta ndi skwi man ta va na Zhiklè azbai.

¹¹ Aman ndo mvi skwi a Zhiklè a shum ɓèlè a sulai, nengaʼa da ndau. Ko ɓèlèlihi man ta yau te gi na, ta slaha ta ndi movar na.

¹² Aman dem ndo mvi skwi a Zhiklè a dè ngwoz a gi ndo mbrok, a slaha a nʼndi te deɓaʼa azbai te va skwi man ta ckoɗauda te va skwi nkezlaʼa.

¹³ Aman dem ndo mvi skwi a Zhiklè a nde na ngwoz mazai, man bai baki nengaʼa a nkwolaʼa, wudahi na azbai, a shkè a deɓa a gi bab na a gai, a slaha a nʼndi movar bab na. Aman ndo mbrok ambalai a slaha a nʼndi nengaʼa azbai.

¹⁴ Aman ndo ngiɗè a ndi skwi man ta va na Zhiklè, a senaha bai, da menda skwi a deɓa, a vi skwi staɗ a verzi skwi zlam, da va na ndo mvi skwi a Zhiklè a va skwi man ta va na Zhiklè.

¹⁵ Sèi ta derde skwi man ta ckoɗauda te va skwi nkezlaʼa man ndohi Israel ta va na Ndo nzi pèc pècèk azbai.

¹⁶ Man bai ta fi mali a kita a gèɗ ta, man ta ndi skwi tengaʼa nkezlaʼa. Aman iyè, Ndo nzi pèc pècèk, man i ga ta a ndohi nkezlaʼa.

¹⁷ A Ndo nzi pèc pècèk a ngaɗa na Moise:

¹⁸ Gada na Aaron a wudahi nengaʼa a ndohi Israel tèlèba aranta: Ko wawa te ndev ndohi Israel, a mbrokihi te Israel, man a vi skwi na a Zhiklè – ko skwi man a ngaɗdahai, ko skwi man a nhur te ndav na, a ta ndara na skwi a Zhiklè,

¹⁹ da vau skwi man Zhiklè a wuffè a géɗèʼa: skwi te va mazawalhiaʼa, ko marai, ko drok, ko mazawal, nsuɗekɗekaʼa.

²⁰ Kin va na mohtsomba skwi bai, man bai Zhiklè a wuffè a gédèʼa azbai.

²¹ Ndo man a woya a nva na skwi a Ndo nzi pèc pècèk te nshid gèɗ, ko mbiaʼa ara marai, ko nkèshèa ara drok, ko a géɗ man a ngaɗda ma a hai, a gèɗ man a hur te ndav na, Zhiklè a wuffè a gédèʼa, sèi man nsuɗekɗekaʼa, mohtsombaskwi ka bai.

²² Aman mandazlai, sak mpasla, vedal, mblè a va man voroɓ te pa, man gayè man ntèvè a va – skwi aranta kin zla na Ndo nzi pèc pècèk a kin va na te vogwa a géɗ sam mvi skwi a Zhiklè bai.

²³ Zlè a tambak man fiyaʼa nlèmda ɓai, ka slaha ka vi aman ka hur te ndav ngaya; aman ka slaha ka vi azbai a géɗ man ka gaɗdahai; ambaha Zhiklè bai.

²⁴ Skwi man ntsuɓa, mbatsaʼa, nʼngela fiu, man ta da na a deɓa, kin va na Ndo nzi pèc pècèk bai. Kin ga na skwi te kudom kinè, man kin va na Zhiklè, arsa bai.

²⁵ Kin sum skwi arsa te ri ndohi mbrokihi bai a kin va na Zhiklè kinè a movar. Skwi man nsuɗekɗekaʼa ka bai, Zhiklè a wuffè a géɗ nengaʼa azbai.

²⁶ A Ndo nzi pèc pècèk a ngaɗa na Moise:

²⁷ Aman kra zlè, kra tambak, kra ɓok nya ma, da nza a sam mam na mʼmèn tsaraɗ. Aman ka va na Zhiklè te vogwa a ngi ambaha Ndo nzi pèc pècèk, sèi a pats matsamakaɗaʼa.

²⁸ Kin zlaha zlè man bai tambak, a kra na, a pats staɗ bai.

²⁹ Aman kin woy a kin va na skwi a Ndo nzi pèc pècèk te nshid gèɗ, va-vau aman Zhiklè a wuffè a géɗ kinè.

³⁰ Sèi ta ndi a pats nasa langa; kin jèkeda a géɗ ma angoslèm bai! Iyè Ndo nzi pèc pècèk.

³¹ Gar haha va-dzodzor ma nkwèr ga, va-gu arsa! Iyè Ndo nzi pèc pècèk.

³² A kin derɗa nzlembaɗ ga nkezlaʼa bai, a ndohi Israel ta rkayè ara Zhiklè nkezlaʼa. Iyè Ndo nzi pèc pècèk man i ga kinè a ndohi nkezlaʼa,

³³ man i helka kinè auda te kokwar Egypte, a i gi a Zhiklè kinè. Iyè Ndo nzi pèc pècèk.