Lèv. 21 - Ma Zhiklè

Ndohi mvi skwi a Zhiklè nkezlahiaʼa

¹ A Ndo nzi pèc pècèk a ngaɗa na Moise: Gaɗa ta ndohi mvi skwi a Zhiklè, wudahi Aaron, aranta: Ndo mvi skwi a Zhiklè da lizhè va na a sam nckondo gwoli na ɓai!

² Sèi ndohi man ta mbakaɗa hwaɗ: mam na, bab na, kra na, dem na, kramam na,

³ demam na man a nda ngwoz di ɓai, man bidali dai, nte gi na dai; a slaha a nlizhè va na a sam ta.

⁴ Ndo mvi skwi a Zhiklè, nengaʼa ndo mbiaʼa; a slaha a nlizhè va na azɓai, man ɓai a derɗa va na a vna.

⁵ Ndohi mvi skwi a Zhiklè da shoko gwots auda te gèɗ bai, da sha bozozom rèta rèta bai, da bazla medi bai.

⁶ Tengaʼa ndohi nkezlaʼa a sam Zhiklè ta, a ta dérɗè nzlembaɗ Zhiklè tengaʼa azbai; te man ta va na skwi a Ndo nzi pèc pècèk te vogwa, movar Zhiklè ta; gar haha sèi ta nzi ara ndohi nkezlaʼa.

⁷ Fali dam, a dem nsossuraʼa, a ngwoz man ndo ngiɗè a nkwolaʼa, da co a ngwoz bai! Aman nengaʼa ndo nkezlaʼa a sam Zhiklè na.

⁸ Gar haha sèi ka rka ndo mvi skwi a Zhiklè ara ndo nkezlaʼa; te man a vi movar a Zhiklè ngaya. Da nza a sam ngaya ara ndo nkezlaʼa, te man iyè, i kezla, Ndo nzi pèc pècèk, man i ga kinè a ndohi nkezlaʼa.

⁹ Aman dem ndo mvi skwi a Zhiklè a gi mphömè, a lizhè va na a vna, a derɗe bab na, sèi ta fa na vogwa.

¹⁰ Bi ndohi mvi skwi a Zhiklè te ndev kramamhi na, ndo man ta bada na mbar a gèɗ, a ta ndha na skwi a rai, man a feda maslaka nkezlaʼa a va, da cko skwaʼa auda te gèɗ bai, da kuratsa maslaka na bai.

¹¹ Do do a gi man nckondo te pa ɓai. Ko a sam mam na a bab na; da lizhè va na bai.

¹² Da shkè auda a sam nkezlaʼa bai, man bai a derde sam nkezlaʼa Zhiklè na. Ta bada na mbar Zhiklè na a gèɗ, a ta gaʼa a ndo nkezlaʼa. Iyè Ndo nzi pèc pècèk.

¹³ Da co bidali a ngwoz.

¹⁴ Ngwoz mazai, ngwoz man ndo ngiɗè a nkwolaʼa, dem nsossuraʼa, fali dam, da co a ngwoz bai, sèi dam man nzlara bai te va verzi gwoli na.

¹⁵ Da durɗo verzi ndohi na, a gwoli na bai! Aman iyè Ndo nzi pèc pècèk man i gaʼa a ndo nkezlaʼa.

¹⁶ A Ndo nzi pèc pècèk a ngaɗa na Moise:

¹⁷ Gada na Aaron aranta: Aman pats ngiɗè, staɗ te verzi ngaya, bololo ndo, da gu mizlinè mvi skwi a Zhiklè bai, da herda va a va na movar a Zhiklè na bai.

¹⁸ Bololo ndo a slaha a nherda na va a Zhiklè bai, mandazli ka bai, ndo vedal ka bai, ndo man ntèvè a va ka bai, ndo man fiya na nlèmdè bi ka bai,

¹⁹ ndo man sak na mpasla ka bai, man ri na mpasla ka ɓai,

²⁰ ndo man gurcik a ga na, ndo man lamba a ndiaʼa, ndo man zlè a dai, ndo man gayè a va ka bai, ndo man ndovohom a ndi va ka bai, ndo man kibèt ka bai.

²¹ Te verzi Aaron, ndo mvi skwi a Zhiklè, ndo man bololo ndo a slaha a nherda va, a va na skwi a Ndo nzi pèc pècèk te vogwa, bai. Bololo ndo; a gèɗ nengaʼa man a slaha a nherda va, a va na movar a Zhiklè na, azbai.

²² Aman a slaha a nʼndi te skwi nʼndi Zhiklè na, te skwi nkezli nkezlaʼa, te skwi nkezlaʼa ba.

²³ Aman a slaha a ndè a deb maslaka azbai, a zlècè a sam mvi skwi a Zhiklè azbai, a gèɗ man bololo ndo; da derde skwi nkezla bai! Aman iyè Ndo nzi pèc pècèk, man i ga ta a skwi nkezlaʼa.

²⁴ A Moise a ngaɗa ta ma haha tèlèba a Aaron a wudahi nengaʼa a ndohi Israel.