Lèv. 19 - Ma Zhiklè

Maya nshèffè man ambaha Zhiklè

¹ A Ndo nzi pèc pèèk a ngaɗa na Moise:

² Gada ta mpi ndohi Israel tèlèba aranta: A woy kin kezla, te man iyè, i kezla, i Ndo nzi pèc pècèk, Zhiklè kinè.

³ Staɗ staɗ tèlèba te ndev kinè, da gu zlau bab na a mam na, a kin slubordo pats nshèk va ga. Iyè Ndo nzi pèc pècèk, Zhiklè kinè.

⁴ Kin woy skwi mʼmbèh skwi bai, kin rom vri bai! Iyè Ndo nzi pèc pècèk, Zhiklè kinè.

⁵ Aman kin va na skwi a Zhiklè te nshid gèɗ, sèi kin zlahaʼa, aman Zhiklè a wuffè a géɗèʼa.

⁶ Kin zlahaʼa, a pats na, a ta ndi te mangoslèmaʼa. Njèkèdiaʼa, mʼmèn mamakaraʼa, ta fa na vogwa.

⁷ Aman te mʼmèn mamakaraʼa ta ndiaʼa genè, skwi horai, ambaha Zhiklè bai.

⁸ Ndo nʼndau a fi mali a gèɗ na, te man a nderɗa skwi Ndo nzi pèc pècèk nkezlaʼa. Sèi ta zedkoɗauda te va gwoli na.

⁹ Aman ka tsi dau, ka ndikèda ma kuma gi dau bai; aman ka ɓica ma, ka por nksara tʼhi bai!

¹⁰ Ko te gi lak ba, ka porko njèkèdia te deb staɗ staɗ asaɓai! Ko nyi wof nwusha tʼhai ka por bai! Ka jèka na ndo ntawassaʼa, a ndo mbrok. Iyè Ndo nzi pèc pècèk, Zhiklè kinè.

¹¹ Kin gu metsar bai, kin ngwod ndo bai, kin tsokol ma bai!

¹² Kin mboɗ a ncèkèlma a nzlembaɗ ga bai, man bai kin derɗa nzlembaɗ Zhiklè kinè a vna. Iyè Ndo nzi pèc pècèk.

¹³ Kin zumda na gèɗ a ndo a ntamagi kinè bai; kin gu metsar a sam na bai. Skwi ntul ndo man a vak a mizline a sam ngaya, va na a pats nasa, ka zhor mangoslèm ɓai!

¹⁴ Ka lüvo ndaɓazlam ɓai, ka ɓara na gada a civèɗ a mandazli ɓai! Sèi ka gi zlau Zhiklè. Iyè Ndo nzi pèc pècèk.

¹⁵ Kin ngwoda kita bai! Ka por ndo mpèrè a sam kita bai, ko mbelaw ndo, ko ndo mbiaʼa. Sèi ka gi kita nslamagi ngaya zuraʼa.

¹⁶ Ka nguro gwoli ngaya bai, ka ga na ma a gèɗ a nshèffè kramam ngaya bai. Iyè Ndo nzi pèc pècèk.

¹⁷ Ka gu shèwa te ndav ngaya a gèɗ kramam ngaya bai! Ngatsa na maya a nslamagi ngaya, man bai mali a gèɗ ngaya.

¹⁸ Ka pelko di man a ngaya auda a ri ngaya ɓai! Ka gsa kramam ngaya te ndav ɗekeɗekaʼa bai! Sèi ka woy nslamagi ngaya, ara man ka woy va ngaya. Iyè Ndo nzi pèc pècèk.

¹⁹ Sèi kin jèjèr ma nkwèr ga! Skwi kudom verzi tsaɗ tsaɗ ka pra na va aman da nza na a deɓa a ngiɗe bai! Ka humda tser skwi tsaɗ tsaɗ a gi dau ngaya ɓai! Maslaka man ta tsu a skwi tsaɗ tsaɗ, ka feda a va ɓai!

²⁰ Ndo man a mènè a ɓèlè, man medemi ndo ngiɗè, ta pela skwi a deɓa di bai, ta pra di bai, sèi ta ga na kita a gèɗ; aman ta kéɗè azbai, te man ɓèlè.

²¹ Aman sèi a pela na gèɗ a Ndo nzi pèc pècèk a drok staɗ, a ntamagi mɓicè-va.

²² A ndo mvi skwi a Zhiklè da ngatsa na skwi mpil gèɗ a drok sa a sam Ndo nzi pèc pècèk, a gèɗ mali man a gau; a mali nengaʼa man a ngau, mpraʼa.

²³ Aman kin dè ndikè a kokwar, a kin da ngi wof tsaɗ tsaɗ man a yiè, kin ndi nyi wof nshèlèkuraʼa azbai. Mvi makar, kin rkaʼa ara skwi nlizhèa, kin ndia azɓai.

²⁴ Te mvi mafadaʼa sèi ta va na nyi wof tèlèba a Ndo nzi pèc pècèk, a skwi ngolala.

²⁵ Sèi te mvi mazlamaʼa kin ndi nyi wof kinè, a nda ya kinè skwi a ma ma. Iyè Ndo nzi pèc pècèk, Zhiklè kinè.

²⁶ Kin ndau skwi man Pombaz a keɗa na va ɓai. Kin fu gèɗ a skwi nzhüzhor ndo ɓai! Kin mboh skwi ɓai!

²⁷ Kin ngalda gèɗ a pa ɓai, kin she bozozom rèta ɓai!

²⁸ Kin bazla va ɓai, a gèɗ ndo man a mʼmets na; kin bazla medi ɓai! Iyè Ndo nzi pèc pècèk.

²⁹ Ka ndeda dem ngaya a fali dam bai, man bai kokwar tèlèba a lizhèa, a nʼndha a skwi horai.

³⁰ Vo-slubordo pats nshèk va ga, va-gu zlau sam ga nkezlaʼa. Iyè Ndo nzi pèc pècèk.

³¹ Kin gu vri bai, kin pu kwa bai, kin tsasl ta bai, kin lizhè va a sam ta bai! Iyè Ndo nzi pèc pècèk, Zhiklè kinè.

³² Va-jèka na sam nʼnzi a ndo man mokozlar te gèɗ, slubordo ndo nhalaʼa, a ka gu zlau Zhiklè ngaya. Iyè Ndo nzi pèc pècèk.

³³ Aman ndo mbrok a zhè a sam ngaya, kin ga na matakwan bai!

³⁴ Ndo mbrok da nza te va kinè lèmèlèmè ara kra ngwai. Woya a ndav ngaya, ara man ka woy va ngaya; kinè ba te va nasa kin mbrokihai te kokwar Egypte. Iyè Ndo nzi pèc pècèk, Zhiklè kinè.

³⁵ Kin ngwoda ndo te nlivè skwi bai, ko te nlivè a ntsi ri pa pa pa, ko te nlivè a agoda, ko te nlivè a koloba.

³⁶ Sèi kin livè skwi a skwi nlivè zuraʼa, ko agoda, ko koloba, ko ntsi-rai, ko kilo. Iyè Ndo nzi pèc pècèk, Zhiklè kinè, man i helka kinè auda te kokwar Egypte.

³⁷ Gar haha va-dzodzor ma nkwèr ga a ma kita ga tèlèba, va-gu arsa! Iyè Ndo nzi pèc pècèk.