Lèv. 18 - Ma Zhiklè

Mphömè ngwoz

¹ A Ndo nzi pèc pècèk a ngaɗa na Moise:

² Gada ta ndohi Israel aranta: Iyè Ndo nzi pèc pècèk, Zhiklè kinè.

³ Kin gu ara ndohi Egypte man kin nzakaɗa pa, man ta gia bai; kin da gu ara ndohi Canaan man i woy a i de kinè a pa bai! Kin dzodzor tsuf tengaʼa bai!

⁴ Sèi kin jèjèr ma nkwèr ga, a ma kita ga, a kin giaʼa. Iyè Ndo nzi pèc pècèk Zhiklè kinè.

⁵ Gar haha sèi kin jèjèr ma nkwèr ga a ma kita ga. Ndo man a jèjèrèʼa, a nzi a nshèffè a vna. Iyè Ndo nzi pèc pècèk.

⁶ Ko staɗ te ndev kinè da co dem ngi ndo na bai. Iyè Ndo nzi pèc pècèk.

⁷ Kin mana na va bab kinè a mam kinè bai! Mam ngaya, ka mana a vna bai!

⁸ Ka mana na va ngwoz bab ngaya bai! Ka derɗè bab ngaya a vna.

⁹ Ka mana na va demam ngaya bai, man bab ngaya, man mam ngaya a myau. Ko a yau te gi bab ngaya, ko a ya na ndo ngiɗè.

¹⁰ Ka mana na va dem kra ngaya bai, a va dem dem ngaya bai! Ka derdè va ngaya a vna.

¹¹ Ka mana na va dem ngwoz bab ngaya bai, man a ya na bab ngaya, kala man demam ngaya.

¹² Ka mana na va demam bab ngaya bai! Gwoli bab ngaya.

¹³ Ka mana na va demam mam ngaya bai! Gwoli mam ngaya.

¹⁴ Ka mana na va ngwoz kramam bab ngaya bai! Nengaʼa ngwoz kramam bab ngaya, ka derɗa bai!

¹⁵ Ka mana na va ngwoz kra ngaya bai! Nengaʼa ngwoz kra ngaya, ka mana a vna bai!

¹⁶ Ka mana na va ngwoz kramam ngaya bai! Ka derdè kramam ngaya a vna.

¹⁷ Ka mana na va dam a mam na bai! Ko dem kra na, ko dem dem na, kin co bai, ta ngi ndo. Nasa skwi horai.

¹⁸ Ka co demam ngwoz ngaya a ngwoz bai, man demam na a zhè dai, a ka mana a vna ɓai!

¹⁹ Ka mana na va ngwoz a hwaɗ a va bai. Hwaɗ a va a nlizhèa.

²⁰ Ka mana na va ngwoz nslamagi ngaya ɓai. Ka lizhè va a vna.

²¹ Ka vau kra ngaya a Moloc bai; ka derdè nzlembaɗ Zhiklè a vna. Iyè Ndo nzi pèc nècèk.

²² Ka nguraʼa ka mana na va nguraʼa ara man a va ngwoz bai! Nasa skwi man a ndèrè a ndo.

²³ Ka nza a deɓ skwi ndzham bai. Ka lizhè va a vna. Ko ngwoz, da va na va na a hi a skwi ndzham bai. Nasa skwi horai.

²⁴ Kin lizhè va aranta bai! Ndohi nte deɓa ta lizhè va ta a vna, man i woy a i dzam ta auda a ma kinè.

²⁵ Herkeda nlizhèa a vna, a i ga ta kita a géɗ mali ta; a herkeda a nkwol ta ndohi na.

²⁶ Gar haha va-dzodzor ma nkwèr ga a ma kita ga, kin gu skwi man a ndèrè a ndo ɓai, ko ndo kokwar tas, ko ndo mbrok man a zhè a sam kinè.

²⁷ Aman skwi man a ndèrè a ndo, ndohi kokwar haha ta gau, ga kin shkè, a ta lizhè kokwar a vna.

²⁸ Man bai man kin lizhè kokwar, a da kwol kinè ara man a gu a sam ndohi nte deɓa te pa, ga kin shkè.

²⁹ Aman ta tèlèba man ta gi skwi man a ndèr a ndo aranta, sèi ta zi ta auda te va gwoli ta.

³⁰ Gar haha va-dzodzor ma kita ga, kin dzodzor mbèh skwi tengaʼa man hori te pa bai, man ta gau, ga kin shkè, a kin lizhè va a vna ɓai! Iyè Ndo nzi pèc pècèk, Zhiklè kinè.