Lèv. 17 - Ma Zhiklè

Sam mvi skwi a Zhiklè staɗgenè

¹ A Ndo nzi pèc pècèk a ngaɗa na Moise:

² Gada ta nda Aaron a wudahi nengaʼa a ndohi Israel tèlèba aranta: Nta skwi man Ndo nzi pèc pècèk a njè kinè a gèɗ:

³ Ko wawa te ndev ndohi Israel man a zlaha zlè, man ɓai tambak, man ɓai ɓok, ko tʼhwaɗ kokwar, ko a dal kokwar,

⁴ da ckoɗa ntamagi mɓicè-va man a va na Ndo nzi pèc pècèk; man ɓai ma kita mʼmetsai a gshèʼa. Nengaʼa a nɗizheda pombaz aussa ambalai. Ndo aranta sèi ta zedkoɗauda te va gwoli na.

⁵ Ndohi Israel sèi ta ckoɗi skwi man ta zlèhè a hwaɗ ta, a sam Ndo nzi pèc pècèk, a ntamagi mɓicè-va, a sam ndo mvi skwi a Zhiklè, a ta zla na Ndo nzi pèc pècèk te nshid gèɗ.

⁶ A ndo mvi skwi a Zhiklè da guceda Pombaz a sam mvi skwi a Ndo nzi pèc pècèk a ntamagi mɓicè-va, da fa na vogwa a mbeza, a ngi ambaha Ndo nzi pèc pècèk.

⁷ Anai ta zla ta skwi a madzagihi asaɓai, ara man ta gu halaʼa. Nasa ma nkwèr ta a mèdèp, te verzi wud wuda.

⁸ A ka gada ta: Ko wawa te ndev ndohi Israel, ko te ndev mbrokihai man ta zhè a sam ta, man a ndara na skwi a Zhiklè, man a zli skwi a Zhiklè,

⁹ a ckoɗa ntamagi mɓicè-va azɓai, a va na Ndo nzi pèc pècèk azɓai, sèi ta zedkoɗauda te va ndohi na.

Nʼndi pombaz

¹⁰ Ko wawa man a ndi Pombaz, ko te ndev ndohi Israel, ko te ndev mbrokihai man ta zhè a sam ta, i ngwoda na gèɗ a va ndo sa, a i zedkoɗauda te va ndohi na.

¹¹ Aman nshèffè skwi a zhè te pombaz, a i va kinè a gèɗ sam mvi skwi a Zhiklè, a gi a skwi mpil gèɗ kinè. Pombaz a gi a skwi mpil gèɗ, a géɗ nshèffè man te pa.

¹² Gar haha i njè ta a gèɗ a ndohi Israel: Ko staɗ te ndev kinè da ndau Pombaz ɓai! Ko ndo mbrok man a zhè a sam kinè, da ndau Pombaz ɓai!

¹³ A ndo Israel tas, a ndo mbrok man a zhè a sam ta, man a ɓèr skwi dak, man bai ɗiak man ta ndiaʼa, sèi da ɗizheda Pombaz aussa, da ra na herkeda a deɓa.

¹⁴ Aman Pombaz ngaʼa a nshèffè skwi tèlèba. Gar haha i gada ta ndohi Israel: Kin ndau Pombaz skwi ɓi fèt! Te man Pombaz, nshèffè skwi tèlèba. Ko wawa man a ndiaʼa, sèi ta zedkoɗauda te va gwoli na.

¹⁵ Ko wawa man a ndi skwi mʼmets mʼmetsai, man ɓai zluèɗ man skwi ngiɗè a keɗaʼa, ko ndo kokwar tas, ko ndo mbrok, da pana maslaka na, da pana va a iyam, nlizhèa ha dakwaɗ. Te deɓaʼa mpana zaʼa.

¹⁶ Aman a pènè maslaka na azbai, a pènè va na azbai, mali a gèɗ na.