Lèv. 16 - Ma Zhiklè

Pats mpil gèɗ

¹ A Ndo nzi pèc pècèk a ngaɗa na Moise, te deb mʼmetsi wudahi Aaron cèw, man ta bazl ta, aman ta zlatsa a sam Ndo nzi pèc pècèk.

² Gada na Aaron, kramam ngaya, do do a sam nkezlaʼa a deb maslaka, a sam skwi mpizlè ma koti pèc pècèk bai. Man bai a da metsi na, aman i da zhè a gèɗ skwi mpizlè ma koti.

³ Aman Aaron a dè a pa, a sam nkezlaʼa, sèi man a vi gol marai a géɗ malai, sèi man a da ndarayè drok.

⁴ Da feda maslaka nkezlaʼa a va, suɗkova, sirla kalahai, da dzawa hwaɗ na a skwi deɓa, a mpèɗè gèɗ a maslaka. Nasa maslaka nkezlaʼa. Da feda a va; aman da pana va a iyam, ga a fi a va.

⁵ Te deɓaʼa da hul mazawalhi cèw a sam mpi ndohi Israel, a géɗ malai, da ndarayè drok.

⁶ Te deɓaʼa Aaron da vau gol mari nengaʼa a géɗ mali na, da ngatsa na skwi mpil gèɗ a nengaʼa a ndohi gi na.

⁷ Mazawalhi cèw da hulo, da zlatsa a sam Ndo nzi pèc pècèk a ma gi mbicè-va.

⁸ Da gu jimèr a géɗ mazawalhi cèw, jimèr staɗ a géɗ Ndo nzi pèc pècèk, jimèr ngiɗè a géɗ Azazel.

⁹ A mazawal man jimèr a kala na a gèɗ, Aaron da ckoɗa a sam Ndo nzi pèc pècèk, da va na a géɗ malai.

¹⁰ Mazawal man jimèr a nkala na a géɗ, man a Azazel, da zlatsa a sam Ndo nzi pèc pècèk, a gu a skwi mpil gèɗ, te deɓa da dzamda a hèshèkèɗ.

¹¹ A Aaron da vau gol marai a géɗ malai, da ngatsa skwi mpil gèɗ a géɗ nengaʼa a ndohi gi na, da zloho marai a géɗ mali na.

¹² Te deɓaʼa da co kizlèɗ gongong a ndazli vogwa a sam mvi skwi a Zhiklè, man a zhè a sam Ndo nzi pèc pècèk, a ɓurdi, a zlukria, nkerda ndernènèʼa, da da a deb maslaka.

¹³ Da feda a géɗ ndazli vogwa a sam Ndo nzi pèc pècèk, a vodzok a ngheda skwi mpizl koti ma kita, man bai a metsi na.

¹⁴ Te deɓaʼa da co Pombaz marai kètè, da guceda a skwi mpizl koti a ri na. Da guceda Pombaz a zlazlar koti man a ma, te man a civèɗ mvèng pats, sak tsaraɗ, da guceda a skwi mpizlè ma koti ba.

¹⁵ Te deɓaʼa da zloho mazawal a géɗ mali ndohai, a Pombaz nengaʼa da da a deb maslaka, da gu a Pombaz nengaʼa lèmèlèmè ara man a Pombaz marai. Da guceda skwi mpizlè ma koti, a zlazlar koti man a ma.

¹⁶ Aranta a ngatsa na skwi mpil gèɗ a sam nkezlaʼa a géɗ ndohi Israel man ta lizhè va ta, a géɗ mali tèlèba man ta gau. Da gu lèmèlèmè a géɗ gi mɓicè-va man a zhè te ndev skwi tengaʼa nlizhèa.

¹⁷ Aman a dè a pa, a sam nkezlaʼa, ha a shkè auda te pa zaʼa, ndo ngiɗe da nza te gi mɓicè-va ɓai. Da ngatsa ta skwi mpil gèɗ a nengaʼa, a ndohi gi na, a mpi ndohi Israel tèlèba.

¹⁸ Aman a shkè auda a sam mvi skwi a Zhiklè, man a zhè a sam Ndo nzi pèc pècèk, da ngatsa na skwi mpil gèɗ a sam mvi skwi a Zhiklè ba. Da co Pombaz marai kètè, a Pombaz mazawal, da faɗda a dromhi sam mvi skwi a Zhiklè tèlèba,

¹⁹ da guceda Pombaz a va nengaʼa a ri na, sak tsaraɗ. Aranta mpana, nkezla te va skwi nlizhè ndohi Israel.

²⁰ Aman a ngatsa ta skwi mpil gèɗ a sam nkezlaʼa, a gi mbicè-va, a sam mvi skwi a Zhiklè, aranta ma, da cko mazawal man a zhè a nshèffè.

²¹ Te deɓaʼa Aaron da ngeda rihi na cèw a géɗ mazawal man a zhè a nshèffè, da ngreda mali tè-lèba, skwi man ambaɓi man Israel a gu mali a vna tèlèba, da fana a géɗ mazawal, a ndo ngiɗè man a zlatsa a pa da dzamda a hèshèkèʼd.

²² Aranta mazawal da hadeda mali tengaʼa tèlèba a hèshèkèɗ. A ndzamdauda a hèshèkèɗ.

²³ Te deɓaʼa Aaron do do a gi mɓicèva, da suɗa maslaka man a feda a va, ga a dè a sam nkezlaʼa, auda a va na, da fedahi a samaʼa.

²⁴ Te deɓaʼa da pana va a iyam a sam nkezlaʼa, da feda maslaka ngiɗè a va. Aman a shke auda ma, da ndara na skwi na, a skwi ndohai, a Zhi-klè, da ngatsa skwi mpil gèɗ a géɗ va na, a géɗ ndohai.

²⁵ Mbeza skwi a géɗ malai, da fa na vogwa a géɗ sam mvi skwi a Zhiklè.

²⁶ Ndo man a da mazawal auda a sam Azazel, da pana maslaka na a va na a iyam, te deɓaʼa a shkè a va ndohi zaʼa.

²⁷ Aman marai a géɗ malai, a mazawal a géɗ malai, man Pombaz tengaʼa a shkè a sam nkezlaʼa a skwi mpil gèɗ, sèi da heldauda a dal kokwar, da fa na vogwa, a bkwi ba a zluèɗèʼa ba a ziaʼa ba.

²⁸ A ndo man a fa na vogwa, da pana maslaka na, a va na, a iyam. Te deɓaʼa a slaha a nshkè a va ndohi zaʼa.

²⁹ Skwi haha da gu a ma nkwèr kinè a mèdèp: A ki matsaraɗaʼa, mʼmèn 10, kin jèkeda skwi nʼndai, kin gu mizlinè ɓai, ko ndo Israel tas, ko ndo mbrok man a zhè a sam kinè.

³⁰ Aman a pats nasa, ta ngatsa kinè skwi mpil gèɗ, ta pan kinè te malai a sam Ndo nzi pèc pècèk.

³¹ Nengaʼa pats nshèk va mbiaʼa a sam kinè; sèi kin jèkeda skwi nʼndai. Nasa ma nkwèr kinè a mèdèp.

³² Skwi mpil gèɗ, ndo mvi skwi a Zhiklè da gau, man ta feda a mizlinè mvi skwi a Zhiklè te di man a bab na; da feda maslaka nkezlaʼa a va,

³³ da ngatsa ta skwi mpil gèɗ a sam nkezlaʼa, a gi mɓicè-va, a sam mvi skwi a Zhiklè, a ndohi mvi skwi a Zhiklè ba, a mpi ndohi tèlèba.

³⁴ Nasa ma kita a sam kinè a mèdèp, a ndohi Israel ta ngècè skwi mpil gèɗ, a géɗ mali tengaʼa tèlèba, sak staɗ tʼhwaɗ mvai. A Aaron a ngau, ara man Ndo nzi pèc pècèk a njè na a gèɗ a Moise.