Lèv. 15 - Ma Zhiklè

¹ A Ndo nzi pèc pècèk a ngaɗa na Moise a Aaron:

² Gada ta ndohi Israel aranta: Aman ndo ngiɗè a zhè a mblè a va nengaʼa a zlèzlèyè, va nengaʼa nlizhèa.

³ Va nengaʼa nlizhèa a géɗ nzlèzlèy mblè, ko mblè a tsi nzlèzlèyè, ko a tsi azbai, skwi nlizhèa.

⁴ Sam tèlèba man ndo sa a mènè a pa, nlizhèa. Sam nʼnzi tèlèba man a nza a pa, nlizhèa.

⁵ A ndo man a lama na sam mʼmènè na, da pana maslaka na, da pana va a iyam, nlizhèa ha dakwaɗ.

⁶ Ndo man a nzahi a sam man nengaʼa a nza a pa, da pana maslaka na, da pana va a iyam, nlizhèa ha dakwaɗ.

⁷ A ndo man a lama na va ndo sa, da pana maslaka na, da pana va a iyam, nlizhèa ha dakwaɗ.

⁸ Aman ndo sa a njfè na slèslèɓ a va ndo man nlizhɓai, da pana maslaka na, da pana va a iyam, nlizhèa ha dakwaɗ.

⁹ A plèsh man ndo sa a nzi a pa, nlizhèa a skwi man a fa na a deɓaʼa, nlizhèa.

¹⁰ Ko wawa man a lama na skwi man ndo sa a nza a pa, nlizhèa ha dakwaɗ. A ndo man a zuɓa na skwi sa, da pana maslaka na, da pana va a iyam, nlizhèa ha dakwaɗ.

¹¹ A ndo man ndo sa a lama na, a mpana ri a iyam bai, da pana maslaka na a iyam, da pana va a iyam, nlizhèa ha dakwaɗ.

¹² A shidèf man ndo sa a lama na, sèi da bazlaʼa. Gandaf, sèi ta pènè a iyam.

¹³ Aman mblè a va nengaʼa mpkwa ma, daga pats man a mpana va na, da ngra mʼmèn tsaraɗ a vaʼa. Te deɓaʼa da pana maslaka na a iyam, da pana va na a iyam te nlèlè – nlizhɓi zaʼa.

¹⁴ A pats matsamakaɗaʼa, da hul ngudokwarhi cèw, a nkuɗhomhi cèw man ta gra tok-tok, da shkè a vna a sam Ndo nzi pèc pècèk a ntamagi gi mɓicè-va, da va na ndo mvi skwi a Zhiklè.

¹⁵ A ndo mvi skwi a Zhiklè da va ta, ngiɗè a géɗ malai, ngiɗè a ndara na Zhiklè, a ngatsa na skwi mpil gèɗ a sam Ndo nzi pèc pècèk a géɗ mblè a va nengaʼa man a zlézléyè.

¹⁶ Aman nguraʼa a mbada iyam va a va, da pana va tèlèba a iyam, nlizhèa ha dakwaɗ.

¹⁷ Maslaka mèmè, bkwi mèmè man iyam va a nge na pa, sèi da pana a iyam, nlizhèa ha dakwaɗ.

¹⁸ Ndo man a mènè a ngwoz na, sèi ta pènè va a iyam, ta lizhèa ha dakwaɗ.

¹⁹ Ngwoz man hwaɗ a va, nlizhèa mʼmèn tsaraɗ. Ko wawa man a lama na, nlizhèa ha dakwaɗ.

²⁰ Skwi mèmè man a mènè a pa te ndev man hwaɗ a va, nlizhèa. Skwi mèmè man a nza a pa, skwi nlizhèa.

²¹ Ndo man a lama na sam mʼmènè na, da pana maslaka na, da pana va a iyam, nlizhèa ha dakwaɗ.

²² Ndo man a lama na skwi man a nza a pa, da pana maslaka na, da pana va a iyam, nlizhèa ha dakwaɗ.

²³ Ndo man a lama na skwi a géɗ sam mʼmènè, man bai a géɗ skwi man a nza a pa, nlizhèa ha dakwaɗ.

²⁴ Baki man a mana a sam staɗ a ngwoz na, a Pombaz a nga na va, nlizhèa mʼmèn tsaraɗ. Sam mʼmènè tèlèba man baki a mènè a pa, nlizhèa.

²⁵ Aman ngwoz a pèn va, a ndikè a ki ɓai, nlizhèa ha mpana na hwaɗ auda a va, ara pats man a pèn va.

²⁶ Sam mʼmènè tèlèba man ngwoz sa a mènè a pa, a hwaɗ a va, nara sam mʼmènè te va man a pèn va. Skwi mèmè man a nzi a pa, nlizhèa, lèmèlèmè ara man a pèn va a kia kia.

²⁷ Ndo man a lama na skwi sa, nlizhèa, da pana maslaka na, da pana va a iyam, nlizhèa ha dakwaɗ.

²⁸ Aman a mpana na hwaɗ auda a va ma, da ngra mʼmèn tsaraɗ a vaʼa. Te deɓaʼa nlizhɓi zaʼa.

²⁹ A pats matsamakaɗaʼa da hul ngudokwarhi cèw, a nkuɗhomhi cèw man ta gra tok-tok, da hulkoɗa a sam ndo mvi skwi a Zhiklè, a ntamagi gi mɓicè-va.

³⁰ Ndo mvi skwi a Zhiklè da vau ngiɗè a géɗ malai, ngiɗè da ndara na Zhiklè, da ngatsa na skwi mpil gèɗ a sam Ndo nzi pèc pècèk aranta a géɗ man hwaɗ a va.

³¹ Aranta sèi kin pan ta ndohi Israel te skwi nlizhèa, man bai ta metsi ta, a géɗ skwi man a lizhè va ta, a ta lizhè gi ga man a zhè te ndev tengaʼa a vna.

³² Nasa ma nkwèr a géɗ ndo man a mblè man a zlèzlèyè, ndo mbada iyamva a va, a lizhè va a vna,

³³ a ngwoz man a pèn va, a ngwoz man hwaɗ a va a kia kia ka bai, ndo man mblè na a zlèzlèyè, ko nguraʼa ko ngwoz, a nguraʼa man a mènè a ngwoz na a hwaɗ a va.