Lèv. 14 - Ma Zhiklè

¹ A Ndo nzi pèc pècèk a ngaɗa na Moise:

² Nta ma nkwèrè a géɗ ndohi hutsoɗ, a pats man ta suɗa ma: sèi ta da a sam ndo mvi skwi a Zhiklè.

³ Ndo mvi skwi a Zhiklè do do auda a dal kokwar, da war ndo hutsoɗ. Aman a rkaʼa, hutsoɗ a va ndo hutsoɗ a nsuɗ na ma,

⁴ ndo mvi skwi a Zhiklè da dzhoɗo ɗiakihi cèw man ta zhè a nshèffè, man ta lizhɓai, a wof ɗawai, a maslaka vèvèzh a hysope, a géɗ ndo man a nsuɗa ma te hutsoɗ.

⁵ Te deɓaʼa ndo mvi skwi a Zhiklè a gèdèʼa, aman ta zli daʼai ɗiak staɗ a tkwè Pombaz nengaʼa a shidèf man ta ɓedzko iyam te nlèlè.

⁶ Ɗiak man a zhè a nshèffè, da co a va wof ɗawai, a maslaka vèvèzh, a hysope, da geda tèlèba a Pombaz ɗiak man ta keɗa a géɗ iyam nlèlè,

⁷ da guca na va ndo hutsoɗ man a nsuɗ na, sak tsaraɗ, da pana arsa. Te deɓaʼa da pra ɗiak man a zhè a nshèffè a hi na.

⁸ Ndo man ta pana na va, da pana maslaka na, da sha gwots gèɗ na tèlèba, da pana va te iyam. Te deɓaʼa nlizhè asaɓai. A slaha a nde a deɓa a va ndohi zaʼa. Aman sèi a nzi a dalmagi mʼmèn tsaraɗ dai.

⁹ A pats matsaraɗaʼa, da sha gèɗ tèlèba, a bozozom, a gwots godobok dai, da sha gwots nengaʼa tèlèba. Te deɓaʼa da pana maslaka a va na a iyam. Te deɓaʼa nlizhè asaɓai.

¹⁰ A pats matsamakaɗaʼa da hul wud droki cèw, suɗekɗekaʼa, a dem tambak, mvi 1, suɗekɗekaʼa, a gufa agoda 6, a mbar htok 1.

¹¹ A ndo mvi skwi a Zhiklè man a til ndoʼa man a pèn va, da Zlatseda a skwi haha tèlèba a sam Ndo nzi pèc pècèk, a ma gi mɓicè-va.

¹² Te deɓaʼa ndo mvi skwi a Zhiklè da co kra drok staɗ, da vau a htok mbar, a skwi mpil gèɗ, da geda na gèɗ a skwi cèw a sam di Ndo nzi pèc pècèk.

¹³ Sèi ta keɗa kra drok a sam man ta zlaha skwi a géɗ malai, a skwi man ta ndara na Zhiklè, a sam nkezlaʼa. Lèmèlèmè ara skwi man ta vi a géɗ malai, skwi man ta vi a géɗ skwi mpil gèɗ, ndo mvi skwi a Zhiklè a ngècèʼa; skwi nkezli nkezlaʼa.

¹⁴ Te deɓaʼa ndo mvi skwi a Zhiklè da co Pombaz skwi man a zlau a géɗ skwi mpil gèɗ haha, da faɗda a bkwi zlembaɗ ndo man a woya a til va na, te civèɗ ri mandai, a babgi ri te civèɗ ri mandai, a babgi sak te civèɗ ri mandai.

¹⁵ Te deɓaʼa ndo mvi skwi a Zhiklè da co mbar te htok kètè, da bada a ri gula na.

¹⁶ Te deɓaʼa ndo mvi skwi a Zhiklè da nècèdè kra ri mandi nengaʼa a va mbar man a zhè te ri gula nengaʼa, da guceda mbar man a kra ri nengaʼa a sam Ndo nzi pèc pècèk, sak tsaraɗ.

¹⁷ Njèkèɗi mbar te ri na, ndo mvi skwi a Zhiklè da faɗda bkwi zlembaɗ te civèɗ ri mandai ndo man a woya a til va na, a babgi ri mandi nengaʼa, a babgi sak te civèɗ ri mandi na, a va Pombaz skwi mpil gèɗ.

¹⁸ Njèkèɗi mbar te ri na, ndo mvi skwi a Zhiklè da bada na a gèɗ ndo man a woya a ntil va na, da ngatsa na skwi mpil gèɗ a sam Ndo nzi pèc pècèk.

¹⁹ Te deɓaʼa ndo mvi skwi a Zhiklè da vau skwi a géɗ malai, da ngatsa na skwi mpil gèɗ a ndo man a woya a til va na, te skwi man a lizhèʼa. Te deɓaʼa da ndara na skwi a Zhiklè.

²⁰ Ndo mvi skwi a Zhiklè da vau skwi man a ndara na Zhiklè, amovar tèlèba, a géɗ sam mvi skwi a Zhiklè, da ngatsa na skwi mpil gèɗ. Te deɓaʼa nlizhè asaɓai.

²¹ Aman ndo matsa ndo ntawassaʼa, a slaha skwi kumba ɓai, da co kra drok staɗ a skwi mpil gèɗ, a ngeda na gèɗ a sam Ndo nzi pèc pècèk, a ngècè skwi mpil gèɗ, a gufa agoda cèw, mbsoma a mbar, a movar, a mbar htok 1,

²² a ngudok warhi cèw, a nkuɗhomhi cèw man ta gra tok-tok, skwi man a slaha mènè, ngiɗè a géɗ malai, ngiɗè aman ta ndara na Zhiklè.

²³ Skwi haha tèlèba da vau a pats matsamakaɗaʼa, man ndo mvi skwi a Zhiklè a til va na, a ntamagi mɓicè-va a sam Ndo nzi pèc pècèk.

²⁴ A ndo mvi skwi a Zhiklè da co kra tambak a géɗ skwi mpil gèɗ, a mbar htok 1, da geda na gèɗ a sam Ndo nzi pèc pècèk.

²⁵ Te deɓaʼa da zloho kra tambak a géɗ skwi mpil gèɗ, a ndo mvi skwi a Zhiklè da co Pombaz skwi mpil gèɗ haha, da faɗda a bkwi zlembaɗ te civèɗ ri mandi nengaʼa man a til va na, a babgi ri mandi nengaʼa, a babgi sak te civèɗ ri mandi nengaʼa.

²⁶ Te va mbar, ndo mvi skwi a Zhiklè da bada a ri gula nengaʼa,

²⁷ da guceda mbar man a zhè te ri gula nengaʼa, a kra ri civèɗ ri mandi nengaʼa a sam Ndo nzi pèc pècèk sak 7.

²⁸ Te deɓaʼa ndo mvi skwi a Zhiklè da faɗda mbar man a zhè te ri na a bkwi zlembaɗ ri mandi ndo man a woya a til va na, a babgi ri mandai a babgi sak te civèɗ ri mandai, a Pombaz skwi mpil gèɗ.

²⁹ Njèkèɗi mbar te ri na, ndo mvi skwi a Zhiklè da bada na a gèɗ ndo man a woya a til va na, a ngatsa na skwi mpil gèɗ a sam Ndo nzi pèc pècèk.

³⁰ Te deɓaʼa da vau ngudokwarhi cèw, man bai nkuɗhomhi ngiɗè cèw man ta gra tok-tok, man a slaha,

³¹ ngiɗè a géɗ malai, ngiɗè 9 skwi man a ndara na Zhiklè, a nda movar. Aranta ndo mvi skwi a Zhiklè da ngatsa na skwi mpil gèɗ a ndo man a woya a til va na a sam Ndo nzi pèc pècèk.

³² Nasa ma nkwèrè a gèɗ ndo man hutsoɗ a va, a slaha a vi skwi kumba ɓai aman a til va na.

³³ A Ndo nzi pèc pècèk a ngaɗa na Moise a Aaron aranta:

³⁴ Aman kin da ndikè a kokwar Canaan, man i woy a i va kinè, a kin ngècè te gi ngiɗè skwi ara hutsoɗ, ara hutsoɗ man a ndi ndo,

³⁵ babgiaʼa da shkè, da ngra na ndo mvi skwi a Zhiklè, da gada na: A der gi ga skwi ngiɗè ara hutsoɗ!

³⁶ Te deɓaʼa ndo mvi skwi a Zhiklè, ga a dè a pa, a ndè wèr skwi sa, da goɗ aman da hulko skwi auda te gi tèlèba, a skwi man a zhè te gai a lizhè tèlè azbai. Sèi te deɓaʼa ndo mvi skwi a Zhiklè do do a gai, da war gai.

³⁷ Aman a wèrèʼa, a rkaʼa, skwi a ndi gai, nteva a zurnanai a peɗiaʼa, a skwi ngiɗè a kulbat na a pa,

³⁸ ndo mvi skwi a Zhiklè da shkè auda te gai, a ntamagai, da ɓarda gi a pa mʼmèn tsaraɗ.

³⁹ Aman a pats matsaraɗaʼa a shkè a deɓa, a rkaʼa, der gi a ngedas na a ma ma,

⁴⁰ da ckoɗi kwa ngedassaʼa auda a samaʼa, da wusheda a dal kokwar, a sam nlizhèa.

⁴¹ A gi tʼhwaɗaʼa, sèi te kerzhaʼa, wujèd man ta kerzha na auda, da wushedaussa a dal kokwar, a sam nlizhèa.

⁴² Te deɓaʼa sèi ta feda kwa ngiɗè a pa, a ta shèɓè gi a pa zaʼa.

⁴³ Aman skwi a hinè a gedèshè gi zaʼa, te deb man ta ckoɗi kwa mʼmovaʼa auda, a ta kerzha gai a ta saɓa mɓuaʼa ma,

⁴⁴ ndo mvi skwi a Zhiklè do do a gai; aman a rkaʼa, skwi ngedassa gi a dè a ma ma, a sun a gada hutsoɗ – gi nlizhèa.

⁴⁵ Sèi ta mbeɗda gi aussa, a kwa a wof a wujèɗ tèlèba sèi ta da auda a dal kokwar, a sam nlizhèa.

⁴⁶ Ndo man a dè a gai, man gi mɓara a pa, nlizhèa ha dakwaɗ.

⁴⁷ A ndo man a mènè te gai, da pana maslaka na; ko ndo man a ndi skwi te gai, da pana maslaka na.

⁴⁸ Aman ndo mvi skwi a Zhiklè a dè a pa, a wèrèʼa, a rkaʼa, skwi ngedassa gai a dè a ma ma azɓai, ndo mvi skwi a Zhiklè da ngreda gai, nlizhɓai. Skwi ngedassaʼa ntila ma.

⁴⁹ Da hul ɗiakihi cèw, wof ɗawai, maslaka vèvèzh a hysope, aman a cè mali auda a géɗ gai.

⁵⁰ Ɗiak ngiɗè da zlaʼa, Pombaz a da tkwa a shiɗèf man ta ɓedzko iyam nlèlè a pa,

⁵¹ da co wof ɗawai, a hysope, a maslaka vèvèzh, a ɗiak man a zhè a nshèffè, da geda tèlèba a va Pombaz ɗiak nzlaʼa, nte va iyam man ta ɓedzko te nlèlè, da guca na va gai, sak tsaraɗ.

⁵² Aranta da co mali auda a géɗ gai, a ɗiak man a zhè a nshèffè, a wof ɗawai, a hysope, a maslaka vèvèzh.

⁵³ Te deɓaʼa da pra ɗiak man a zhè a nshèffè, da hu na a dala, a ngatsa na skwi mpil gèɗ a gai aranta. Te deɓaʼa nlizhɓai.

⁵⁴ Nasa ma nkwèrè a géɗ hutsoɗ, a géɗ nduvohom,

⁵⁵ a géɗ hutsoɗ a va maslaka, a va gai,

⁵⁶ a géɗ skwi man a hezi na, skwi man a ndi gèɗ, a sam kuftorhoʼa.

⁵⁷ A kin suna, sam nlizhèa nangwa, sam nlizhɓia nangwa. Nasa ma nkwèrè a géɗ hutsoɗ.