Lèv. 11 - Ma Zhiklè

Skwi a géɗ herkeda man Zhiklè a sla na nlizhèa

¹ A Ndo nzi pèc pècèk a ngaɗa na Moise a Aaron:

² Va-njè ta ma haha a gèɗ a ndohi Israel! Nta zluèɗ man kin ndiaʼa, te va zluèɗ a géɗ herkeda tèlèba:

³ Skwi tèlèba man kotèkwèr nkezla, mwinèa a vata, skwi man a zhèm skwai, kin slaha kin ndiaʼa.

⁴ Aman te va skwi man a zhèm skwai, a skwi man kotèkwèr nkezla, kin ndi nta azbai: zlugumai; nengaʼa a zhèm skwi ma ba, aman kotèkwèr nkezl bai. Skwi nlizhèa a sam kinè.

⁵ Hupat; a zhèm skwai, aman kotèkwèr nkezl bai. Skwi nlizhèa a sam kinè.

⁶ Wandav; a zhèm skwi ma ba, aman kotèkwèr nkezl ɓai. Skwi nlizhèa a sam kinè.

⁷ Wodala; kotèkwèr nengaʼa nkezla, mwinèa a vata, aman a zhèm skwi azbai. Skwi nlizhèa a sam kinè.

⁸ Kin ndau zluèɗ tengaʼa ɓai! Aman nda metsa, kin lama na bai. Skwi nlizhèa a sam kinè.

⁹ Te va skwi man a nshèffè tʼhwaɗ iyam, kin ndi skwi tèlèba man bèjbèji a va a lakalav a deɓa, ko te woyam mbiaʼa, ko te woyam nkèshèa, kin slaha kin ndiaʼa.

¹⁰ Aman skwi tèlèba man bèjbèji az a va bai, man lakalav az a deɓa bai, man a shèwèlè tʼhwaɗ iyam, man a shèffè te iyam, ko te iyam mbiaʼa, ko te woyam nkèshèa, da ndara kinè!

¹¹ A vava da ndara kinè! Kin ndau zluèɗ tengaʼa ɓai! Aman nda metsa, kin woy ɓai!

¹² Skwi tʼhwaɗ iyam tèlèba, man bèjbèji az a va bai, man lakalav az a deɓa bai, da ndara kinè.

¹³ Te va ɗiakihai, skwi haha da ndara kinè, kin ndu bai, ambaɓai: mangayak, vezai, mangayak zai,

¹⁴ mangalah, mangayak zopom,

¹⁵ ngwakihai,

¹⁶ zhèrèu, wuzhèm, nkèlègègai, zligijè,

¹⁷ kalama, mèzhèva, tugom,

¹⁸ nslepats nguzotok, nzlatsama, mohodok,

¹⁹ massai, zulazula, parmagerzai, gèzhègèzh, a faya.

²⁰ Skwi tèlèba man kelpasl a va, a sak faɗ, da ndara kinè.

²¹ Te va skwi man kelpasl a va, a sak faɗ, sèi kin ndi di man cèw mbiaʼa, man ta nzevi a vna.

²² Hoyok, ndergwozla, nshekshèʼèn, mbèjwèn.

²³ Aman skwi nkütèkütèa ngiɗè tèlèba man sak faɗ, da ndara kinè.

²⁴ Kin lizhè va kinè a vna. Aman nda metsa, a kin lama na, kinè nlizhèa, ha dakwaɗ.

²⁵ A ndo man a pi skwi mʼmetsa sa a gozhèm maslaka, da pana maslaka na, ndo sa nlizhèa ha dakwaɗ.

²⁶ Skwi tèlèba man ko-tèkwèr nengaʼa nkezla, aman mwinèa a vata bai, man a zhèm skwi azbai, da gu a skwi nlizhèa a sam kinè. Ko wawa man a lama na, nlizhèa ha dakwaɗ.

²⁷ Skwi a sak faɗ tèlèba man ta dè a ma sak genè ka ɓai, da gu a skwi nlizhèa a sam kinè. Ko wawa man a lama na skwi mʼmetsa sa, nlizhèa ha dakwaɗ.

²⁸ Ko wawa man a zhüɓ skwi mʼmetsa sa, da pana maslaka na; nlizhèa ha dakwaɗ. Da gu a skwi nlizhèa a sam kinè.

²⁹ Te va skwi nkütkütèa tèlèba man a shèwèlè a géɗ herkeda, skwi haha nlizhèa a sam kinè: mvivai, nguzotok, mokwal, nhèdèdèk, koʼom,

³⁰ toɗotoɗo, küzhönök, kuɗof, nkurtak.

³¹ Skwi nlizhèa a sam kinè te va skwi nkütkütèa tèlèba. Aman ta metsa, a ndo man a lama ta, nlizhèa ha dakwaɗ.

³² Aman skwi mʼmetsa sa a nkal na a deɓa skwai, skwi sa nlizhèa, ko wurom, ko maslaka, ko hutèɗ, ko gozhem kolongwi mizlinè mèmè.

³³ Aman skwi mʼmetsa sa a nkala a shidèf ngiɗè, skwi te pa tèlèba, nlizhèa, sèi kin bazldaussa.

³⁴ Te shidèf aranta, skwi mèmè man a dè a pa, nlizhèa. Iyam man ta ɓalda a pa, a ta siaʼa, nlizhèa.

³⁵ Aman skwi mʼmetsa sa a nkala na deɓa skwai, ko vova, ko rewèc, sèi ta mbeɗdaussa. Nlizhèa, skwi nlizhèa a sam kinè.

³⁶ Sam man iyam a nhaya a pa, a thal iyam, a lizhè azɓai. Aman ndo man a lama na skwi mʼmetsa te pa, nlizhèa.

³⁷ Aman skwi mʼmetsa sa a nkala a gèɗ tser skwai, man ta zlekai, nlizhè ɓai.

³⁸ Aman iyam a ga na a déɓ tser skwai, a skwi mʼmetsa sa a nkala a pa, skwi nlizhèa a sam kinè.

³⁹ Aman te va skwi man kin slaha kin ndiaʼa, staɗ a mʼmets mʼmetsai, ndo man a lama na, nlizhèa ha dakwaɗ.

⁴⁰ Aman ndo man a ndi skwi mʼmets mʼmetsai, sèi da pana maslaka na, nlizhèa ha dakwaɗ. A ndo man a co skwi sa, da pana maslaka na, nlizhèa ha dakwaɗ.

⁴¹ Skwi nkütkütèa man ta shèwèlè a géɗ herkeda tèlèba, da ndara kinè. Kin ndau bai!

⁴² Skwi nda a hwaɗhai, a skwi tèlèba man sak faɗ, man bai a fena faɗ, te va skwi nkütkütèa man ta shèwèlè a géɗ herkeda, kin ndau ɓai, da ndara kinè!

⁴³ Kin ndeda va kinè a skwi man a ndara na Zhiklè ɓai. A skwi nda a hwaɗhai kin lizha va a vna bai, a lizhè kinè.

⁴⁴ Aman iyè, Ndo nzi pèc pècèk, Zhiklè kinè. Gar haha va-bür va kinè nkezlaʼa, a kin nzi a ndohi nkezlaʼa, aman iyè i kezla. A kin lizha va kinè a ri kinè bai a skwi tèlèba man a shèwèlè a géɗ herkeda.

⁴⁵ Aman iyè Ndo nzi pèc pècèk, i helka kinè auda te kokwar Egypte, a i gi a Zhiklè kinè. Gar haha sèi kin nzi a ndohi nkezlaʼa, aman iyè, i kezla.

⁴⁶ Nasa ma kita a géɗ skwia, a ɗiak, a skwi man a shèffè tèlèba, man ta shèffè tʼhwaɗ iyam, a skwi man a shèwèlè a géɗ herkeda,

⁴⁷ a kin sun nɗèlè te va skwi man nlizhèa a skwi man nlizhɓai, te va skwi man kin ndiaʼa a skwi man kin ndi azbai.