Lèv. 10 - Ma Zhiklè

Nadab a Abihu ta gi malai

¹ Nadab a Abihu, wudahi Aaron cèw ta co kizlèɗ gongong nʼndèr skwi ta, ta peda ndazli vogwa a pa, a ɓurdi man ta ndara na Zhiklè, a ta va na skwi te vogwa aranta, man Ndo nzi pèc pècèk a ngaɗa bai.

² A vogwa a shkè auda te Ndo nzi pèc pècèk, a nda ta ma, a ta bazl ta a sam Ndo nzi pèc pècèk.

³ A Moise a ngaɗa na Aaron: Nasa man Ndo nzi pèc pècèk a goɗa: A sam tengaʼa man ta herdekay va, i ngreda ta va ga auda, i Zhiklè nkezlaʼa. A sam di ndohi tèlèba i nzala va ga. A Aaron a mʼmbeɗa na a ma bai.

⁴ Moise a mbaha ta Mischael a Etsaphan, wudahi Uziel, kramam bab Aaron, a ngaɗa ta: Vo-washkè, va-hel ta gwoli kinè auda a sam nkezlaʼa, va-de ta auda a dal kokwar!

⁵ A ta shkè a ta zuɓ ta auda a dal kokwar, suɗkova a va tengaʼa, ara man Moise a goɗa.

⁶ Te deɓaʼa Moise a ngaɗa na Aaron a wudahi nengaʼa, Eleazar a Ithamar: Kin sha gèɗ bai, kin kuratseda maslaka kinè aussa bai, man bai kin metsi kinè, a ndzoan Zhiklè a shkè a géɗ mpi ndohi tèlèba. Aman kramamhi kinè, ndohi Israel tèlèba, tengaʼa ta slaha ta kuɗai a géɗ vogwa man Ndo nzi pèc pècèk a vatsa a haha.

⁷ Kin slaha kin jèkeda ntamagi gi mɓicè-va azbai, man bai kin metsi kinè, te man Ndo nzi pèc pècèk a mbada kinè mbar a gèɗ. A ta gu ara man Moise a gada ta.

Mpi ndohi mvi skwi a Zhiklè a mizlinè

⁸ A. Ndo nzi pèc pècèk a ngaɗa na Aaron:

⁹ Kin su barassa a zom ɓai, ko ka, ko wudahi ngaya, aman kin dè a gi mɓicè-va. Man bai kin metsi kinè. Nasa ma nkwèr kinè te verzi wud wuda kinè a mèdèp.

¹⁰ Sèi kin ɗèl te va skwi nkezlaʼa a skwi nkezlaɗiaʼa, te va skwi nlizhèa a skwi nlizhèɓiaʼa.

¹¹ A kin menda ta ndohi Israel ma nkwèr Ndo nzi pèc pècèk man a gada na Moise.

¹² A Moise a ngaɗa na Aaron a Eleazar a Ithamar, wudahi nengaʼa cèw njè-kèdiaʼa: Va-hul njèkèɗi movarte va skwi man ta va na Ndo nzi pèc pècèk te va vogwa, va-ndau a sam nkezlaʼa, a sam mvi skwi a Zhiklè. Skwi nkezli nkezlaʼa.

¹³ Sèi kin ndiaʼa a sam nkezlaʼa. Nengaʼa skwi man kinè a wudahi kinè a kin ngè-cèʼa te va skwi man ta va na Ndo nzi pèc pècèk te vogwa. Zhiklè a ngadayè aranta.

¹⁴ Ndavaʼa a ɗuaraʼa man kin hulkoɗauda, sèi kin ndi a sam nkezlaʼa, wudahi a dalahi ngaya a nda ka. Aman nasa skwi man kinè a wudahi ngaya kin ngè-cèʼa te va skwi man ndohi Israel ta via a nshid gèɗ.

¹⁵ Ɗuaraʼa man kin ckoɗauda, a ndavaʼa man ta geda na gèɗ a Ndo nzi pèc pècèk, sèi ta pa na a va mbeza skwi man ta va na Zhiklè te vogwa, a ta geda na gèɗ a sam Ndo nzi pèc pècèk. Nasa skwi man kinè a wudahi kinè kin ngècèʼa a mèdèp, ara man Ndo nzi pèc pècèk a goɗa.

¹⁶ Aman Moise a hoss mazawal a géɗ malai – na haha, vogwa a nʼndeda ma. A nengaʼa a ngu ndav a géɗ Eleasar a Ithamar, wudahi Aaron njèkèdiaʼa, a ngaɗa:

¹⁷ Skwi man ta vau a géɗ malai, kin ndau a sam nkezlaʼa bi èhèmè? Skwi nkezli nkezlaʼa, Zhiklè a mva kinè, a ncè mali mpi ndohi auda, a ta ngècè skwi mpil gèɗ a sam Ndo nzi pèc pècèk.

¹⁸ Pombaz nengaʼa a mdo a hwaɗ gi a sam nkezlaʼa bai; ar kin ndiaʼa a sam nkezlaʼa, ara man i goɗa.

¹⁹ A Aaron a ngaɗa na Moise: Na haha, a patsna ta vau skwi a géɗ malai, a ta ndara na skwi a Zhiklè: Te skwi man a ngayè aranta, a i da ndau te skwi man ta vau a géɗ malai a patsna, ambaha Ndo nzi pèc pècèk dè?

²⁰ Aman Moise a ntsenaʼa, ambaha te ndav na.