Lèv. 1 - Ma Zhiklè

Nʼndèr skwi a Zhiklè

¹ Ndo nzi pèc pècèk a mbaha na Moise, a ngaɗka na te gi mɓicè-va:

² Gada ta ndohi Israel aranta: Aman ndo te ndev kinè a woya a mva na skwi a Ndo nzi pèc pècèk, da va na skwi kudom, ko zlè, ko tambak, ko ɓok.

³ Aman a ndara na zlè, sèi marai suɗekɗekaʼa. Da da a ntamagi mɓicè-va, aman a da ambaha Ndo nzi pèc pècèk.

⁴ Da ngeda rai a géɗ skwi man a ndara na, a da ambaha Zhiklè, aman gèd nengaʼa mpela.

⁵ Te deɓaʼa a zlaha zlè a sam di Ndo nzi pèc pècèk. A wudahi Aaron, ndohi mvi skwi a Zhiklè, ta cè Pombaz, a ta gucedahai a tsagi sam mvi skwi a Zhiklè, man a zhè a ntamagi gi mɓicè-va.

⁶ Te deɓaʼa a ncè na bkwi auda, a ngela zluèɗ.

⁷ A wudahi Aaron ta co vogwa, a ta lèɓèslè shègwa a sam mvi skwi a Zhiklè.

⁸ A wudahi Aaron, ndohi mvi skwi a Zhiklè, ta feda zluèdèʼa, gèdè ba, a mbeza ba, a géɗ vogwa a sam mvi skwi a Zhiklè.

⁹ Aman skwi hwaɗaʼa, a sakhiaʼa, da pana a iyam. Te deɓaʼa ndo mvi skwi a Zhiklè da ndara tèlèba, a géɗ sam mvi skwi a Zhiklè. Aranta a ndara na skwi a Zhiklè, skwi man a va na Ndo nzi pèc pècèk te vogwa, ambaha.

¹⁰ Aman a ndara na skwi nkèshèa, ko tambak, ko ɓok, da vau te va mazawalaʼa, suɗekɗekaʼa.

¹¹ Sèi ta zlèhaʼa a sam di Zhiklè, a tsagi sam mvi skwi a Zhiklè, te man a gédèʼa. A wudahi Aaron, ndohi mvi skwi a Zhiklè, ta guceda Pombaz a hai a sam mvi skwi a Zhiklè tèlèba.

¹² Te deɓaʼa ta ngela zluèd, a gèdè ba, a mbeza ba, ndo mvi skwi a Zhiklè da feda a géɗ vogwa a sam mvi skwi a Zhiklè.

¹³ Aman skwi hwaɗaʼa, a sakhiaʼa, da pana a iyam. Te deɓaʼa ndo mvi skwi a Zhiklè a via tèlèba, a fa na vogwa a sam mvi skwi a Zhiklè. A ndara na Aranta skwi a Zhiklè, skwi man a va na Ndo nzi pèc pècèk te vogwa, ambaha.

¹⁴ Aman a ndara na ɗiak a Ndo nzi pèc pècèk, da hulkoɗi ngudokwarhi, man ɓai nkuɗhomhi man ta gra tok-tok.

¹⁵ Ndo mvi skwi a Zhiklè da baha na a nckoɗa a sam mvi skwi a Zhiklè, a berɗama na daʼai, a nfa na vogwa a sam mvi skwi a Zhiklè. A ɗizh pombazaʼa, a nguceda a zlazlar sam mvi skwi a Zhiklè.

¹⁶ A ncè modondevaʼa, a gwotsaʼa, da wusheda a va mèrwèc a tsagi sam mvi skwi a Zhiklè, te civèɗ mvèng pats.

¹⁷ Te deɓaʼa da wulaɗama ta kelpasl; aman da ce na auda ɓai, a ndo mvi skwi a Zhiklè a da feda a vogwa a sam mvi skwi a Zhiklè. A ndara na Aranta skwi a Zhiklè, a va na Ndo nzi pèc pècèk te vogwa, ambaha.