Lamentations de Jérémie 4 - Ma Zhiklè

Sion ngedas na

¹ Wobau, guro nlizh na, guro ndaɓalaʼa a si di asaɓai. Kwa mbelaʼa ta ksara tʼhai a civèɗ tèlèba.

² Wudahi Sion, mbelahiaʼa, lèmèlèmè ara guro ndaɓalaʼa, ta nde ta lèmèlèmè ara shidèf rbasl man ndo nrèmè a ngau.

³ Ko barkdadihai ta wèr di wud ta, aman ta ciɗè wa. Kokwar ndohi ga a nkalda skwi a pa ara zhèrèu tʼhèshèkèd.

⁴ Kra man a cidè wa, ɗèzhè a kala ta hwaɗ, wudahi nkèshèʼa ta jhèɗè skwi nʼndai, ndo a va ta azɓai.

⁵ Tengaʼa man halaʼa ta ndau skwi zhündo, ani ta tiɗ ta a civeɗ. Tengaʼa man ta mana a vèvèzh a matsa, ani ta mènè a va koskosai.

⁶ Mali kokwar ndohi ga, mbiaʼa a fena mali Sodome, man ngedas na a nasa nasa, ri ndo a ngedassa ka ɓai.

⁷ Wud bihi tengaʼa ta dzhwa te va nasa, a fena gol ɗawai nsuɗaʼa ara nhènènèu, pombaz te va ndaɓalaʼa, di tèngaʼa nzlèzlèyè a pa.

⁸ Antanta ta luss ta ara lèlizha, ta sen ta ɓai a civèɗ, vatasl a dala, ta gwora ara shègwa.

⁹ Dara ndohi man ta bazl ta a tsakwal, a géɗ man mi a mbazl ta, man ta tiɗ ta a mai, a ta bazl ta a géɗ man skwi nʼndi azɓai.

¹⁰ Ngwozi man ndo a se ta te va, ta ta wud ta, a ta ndeda ma ara skwi nʼndai, te va man ndohi ga ta kalahai.

¹¹ Ndo nzi pèc pècèk a ga nga ndzoan a gèɗ tèlèba, a nkoldoko nga ndzoan a gèɗ, a nfa na vogwa a Sion, man a ndu verziaʼa ba.

¹² Bihi a géɗ herkeda, a ndohi herkeda, ta hérèʼa arsa ɓai, ta gada ndo ngi matakwan, ndo mayam, a da duma kokwar Jérusalem azɓai.

¹³ Skwi haha a ngau a géɗ mali ndohi nhadka ma, a géɗ mphömè ndohi mvi skwi a Zhiklè, man ta bazl ta ndohi nzuraʼa a sam ta.

¹⁴ Ta bez ta zlawa a civèɗ ara mandazlihai, pombaz a ri ta, ndo a slaha a nlama na maslaka tengaʼa ɓai.

¹⁵ Va-kazla ta auda a tsagai – ndohi nlizhèʼa. Va-kazla ta auda a tsagai, va-kazla ta auda a tsagai, kin lama ta ɓai! Aman ta woy a ta bizhè zlawa, da nza a haha ɓai!

¹⁶ Ndo nzi pèc pècèk a ri na a nvenda ta gèɗ, a woya a nrka ta ɓai. Ndo mvi skwi a Zhiklè a nfa na gèɗ ɓai, ndohi nhalaʼa ta sia te va azɓai.

Kita Sion nrufa ma

¹⁷ Nga pi di helèslèa a nga zhèr skwi ntakaha nga, ambalai. A sam zangalaʼa nga ngél dai, aman ndo ntakaha nga azɓai.

¹⁸ Ta zeɓi sam sak nga, a nga slaha nga bizhè a dala azɓai. Nʼndikè-ma nga ndul ndul. Patshi nga ta rufa ma. A vava nʼndikè-ma nga a mshkè ma.

¹⁹ Ndohi mparaha nga a ta hu a fena mangayak tʼhwaɗ giɗfèk. Ta hu a verzi nga a géɗ za, ta pa nga va a hai tʼhèshèkèɗ.

²⁰ Nengaʼa man Ndo nzi pèc pècèk a mbada na mbar a gèɗ, ta dzawda a vèvèɗ, nengaʼa man nga goɗ a géɗ nengaʼa: nga da nzi a nshèffè te ndev ndohi herkeda a diaʼa.

²¹ Wuffa, gu langlangaʼa, kokwar Edom, man ka zhè te kokwar Uts! Ka ba ka da si kokwi kita, a da keɗ ka lèmèlèmè ara zom, a suɗama ka maslaka auda a va.

²² Kokwar Sion, mali ngaya mpana ma, kin dè ɓèlè asaɓai. Aman kinè, ndohi Edom, kin ngècè kita a géɗ mali kinè, mali kinè a ngredè auda.