Lamentations de Jérémie 3 - Ma Zhiklè

Wobau mbiaʼa

¹ Iyè ndo man i sau matakwan te ri mènèwèd man a ndahyè a vna a ndzoan.

² Bi Zhiklè a ndzamyè, a ndedyè a ruva, a skwi nhél sam ka ɓai.

³ Iyè man a ntarayè ri a dai pèc pècèk.

⁴ Nengaʼa a ngu aman va ga a hezhèk na, a mpaslay vatasl a va.

⁵ Skwi mwuɗitpa a matakwan a ntsamay va a tsagai.

⁶ A nzedyè a va ruva, ara ndohi man ta bazl ta halaʼa.

⁷ A mɓaray civèɗ, a mpay shèla a sak.

⁸ Ko i kuɗai, ko i gi wobau – a ngedassa civèɗ ntsi ri ga.

⁹ A mɓaray civèɗ ga a kwa mbiaʼa, a dzaray civèɗ ga.

¹⁰ A mpi va a iyè ara kokoya, ara marizhèlè tʼhwaɗ wof.

¹¹ A zlakedyè a civèɗ, a ncizlyè, a ngedassyè.

¹² A nlata lèkèɗ na, a ndèlè sulom na a va.

¹³ Sulom te godom na a ntezay a deɓa.

¹⁴ Ndohi ga tèlèba ta ngwossahayè, ta sli dimèsh ta a gèɗ a iyè.

¹⁵ A ngezyè a skwi nduzlekzlekaʼa, a mvay dèrvowa aman i siaʼa.

¹⁶ A mpay kwa a ma, a i peɗia, a nkaldyè a va mèrwèc.

¹⁷ Ndav ga a nʼngatsa gumi ɓai, manam a mpcayè a gèɗ,

¹⁸ a i hüro: wuɗi ga klèng, skwi man i zhor te ri Ndo nzi pèc pècèk, klèng.

Mpi ndav a Zhiklè

¹⁹ Aman i hér nlèyè ga, a i hér civèɗ man i zlak ga a pa, nara dèrvowa, nara dèrè.

²⁰ Lèk lèk ndav ga a hérèʼa, a ɗawaramay ndav tʼhwadaʼa.

²¹ Na haha skwi man i hérèʼa, a i zhèrèʼa:

²² Pombi Ndo nzi pèc pècèk nʼndev di ɓai, nsi ndo nengaʼa te va klèng di ɓai.

²³ A nciɗ sam a nciɗ sam nga sia te va zaʼa, nlèɓèslè nengaʼa mbiaʼa.

²⁴ Ndav ga a gaɗa: Skwi man i ngotso, nasa Ndo nzi pèc pècèk. Gar haha i zhèr nengaʼa.

²⁵ Ndo nzi pèc pècèk amba a sam tengaʼa man ta zhèr skwi te ri nengaʼa, a sam ndo man a hèshèʼa.

²⁶ Amba, aman nga nzi tètèʼa, a nga zhèr skwi ntakaha nga te ri Ndo nzi pèc pècèk.

²⁷ Amba, aman ndo a zhüɓ wof nkelawa te daʼai te gol dai.

²⁸ Da nza a gèɗ na, da nza tètè, aman Ndo nzi pèc pècèk a nfa na a daʼai.

²⁹ Da nza a ri a bazlazlam, wa ngiɗè ba, skwi man a zhèrèʼa a shkè dai.

³⁰ Da geda na bazlazlam a ndo ntsau, da su matakwan na.

³¹ Aman Bi Zhiklè a kwèl ndo a mèdèp azɓai.

³² A mbeɗama na ndav; aman a sia te va genè, ara pombi nengaʼa man a ndev ɓai.

³³ Aman a ga na matakwan a ndo, aman a mbeɗama ta ndav a ndohai, ambaha ɓai.

Nʼngwèdè ndav

³⁴ Aman ta zler ta ndohi dangai a sak,

³⁵ aman ta terɗa kita ndo a sam di Zhiklè te géɗèʼa,

³⁶ aman ta ngwèdè ndo te kita, Bi Zhiklè a rka ɓi dè?

³⁷ Skwi nʼnga, man Bi Zhiklè a ngoɗ ka ɓi, a nangwa?

³⁸ Manam a matakwan, Bi Zhiklè a ngoɗ ka ɓi dè?

³⁹ Ndo man a nzi a nshèffè a kuɗi mè? Staɗ staɗ tèlèba da kuɗau a géɗ mali na!

⁴⁰ Ngo-worokoy, ngo-hurokoy civèɗ nga, ngo-menokoy a deɓa a sam Ndo nzi pèc pècèk!

⁴¹ Ngo-vokoy ndav nga a nda skwi man nga va na Zhiklè te zhiklè te géɗèʼa.

⁴² Nga gu mèdègèɗ, nga tsena gèɗ ɓai, gar haha ka pra nga mali ɓai.

⁴³ Ka gu ndzoan, ka paraha nga, ka keɗa ndo, nga se ka te va ɓai.

⁴⁴ Ka ngheda va ngaya a va vanai, a ntsi ri nga a cinè a pa azɓai.

⁴⁵ Ka ge nga a koskosai, man ndohi herkeda ta kwol nga.

⁴⁶ Mayamhi nga tèlèba ta winè ma ta a vata a géɗ nga.

⁴⁷ Zlau a mʼmetsai, skwi man nga ngotso, skwi ngedas nga, skwi nzede nga.

⁴⁸ Kuɗa a shkè auda te di ga ara iyam, a géɗ skwi man a ngedassa kokwar ndohi ga.

⁴⁹ Di ga a kuɗi lèk lèk, a jèkè azɓai,

⁵⁰ ha Ndo nzi pèc pècèk a paka di a hi te zhiklè, a rkaʼa.

⁵¹ Di ga a dzayè a géɗ dalahi kokwar ga.

Ntsi rai

⁵² Tengaʼa man ta woy iyè ɓai, ambalai, ta fiyè a ma ara ɗiak,

⁵³ ta tseday ma a vèvèɗ, ta kalyè a kwa.

⁵⁴ Iyam a mbizhèmay gèɗ a pa, i huro: i za.

⁵⁵ I boho nzlembaɗ ngaya, Ndo nzi pèc pècèk, te vèvèɗ tʼhwaɗaʼa.

⁵⁶ A ka tsena daʼai ga. Ka ndè zlembaɗ ngaya a sam mbèhè ga ɓai.

⁵⁷ Aman i baha ka, ka zhè ndul ndul, ka gada: Ka gu zlau ɓai!

⁵⁸ Bi Zhiklè, ka nzay a deɓa, ka mbela nshèffè ga.

⁵⁹ Ka rka skwi man ambaɓai man ta gu a sam ga, ka ckay auda te kita.

⁶⁰ Ka rka ta ara man ta woya man a i pela ta gèɗ, ara man ta vhèy ma a gèɗ tèlèba.

⁶¹ Ndo nzi pèc pècèk, ka tsena man ta derɗyè, ara man ta vhèy ma a gèɗ tèlèba.

⁶² Mayamhi ga ta tsi tsaval a géɗ ga, a ta hér skwi amoaɓiaʼa pèc pècèk.

⁶³ Pu di a tengaʼa, ko ta nza tʼhai, ko ta zlatsa. Iyè man ta fiyè a skwi nlim ta.

⁶⁴ Ndo nzi pèc pècèk, pulkoy di man a ga auda a sam ta, ara skwi man ta gau.

⁶⁵ Ka da sassaya ndav ta, ka da phomde ta a vna.

⁶⁶ Ka da paraha ta a ndav, a ka gedas ta aussa tʼhwaɗ giɗfèk.