Lamentations de Jérémie 2 - Ma Zhiklè

Zhiklè a ga na kita a Sion

¹ Bi Zhiklè, a géɗ ndav nengaʼa man a dza na, a vi kokwar Sion a va ruva. A nzukda nʼnjèl Israel a hai te zhiklè te gédèʼa, a herkeda. A mhur skwi nfi sak na ɓai a pats ndzoan nengaʼa.

² Bi Zhiklè a ngedassa sam nwèr skwi Jacob tèlèba, a sia te va azɓai, a mbeɗda zlazlar kokwar Juda a hai a ndav. Kokwar-bai a wud bihi nengaʼa a nkalde ta hai, a nderɗe ta.

³ Wuɗi Israel tèlèba a ncedama a ndav, a mʼmenda ri na a deɓa a sam di mayam, man a nherda va. A ngedassa Jacob ara vogwa mbiaʼa man a nʼndeda ma.

⁴ A nlata lèkèɗ na ara ndo mayam, a nzlatsa ara ndo ngi matakwan, a ngedassa skwi man kokwar Sion a wuffè a gédèʼa te gi na tèlèba, a nkoldko ndzoan a hai ara vogwa.

⁵ Bi Zhiklè nʼngaʼa a mayam, a ngedassa Israel, a ngedassa gi bihi nengaʼa tèlèba, a ngedassa gihi ndakmaʼa, a mfaha nlèyè genè, nlèyè genè a kokwar Juda.

⁶ A ngedassa gi na, a nzeda sam mɓicè-va nengaʼa. Ndo nzi pèc pècèk a ngu aman sam ngolala, a pats nshèk va, a pca, ta a gèɗ a ndohi te Sion, a nkwol ta bihai a ndohi mvi skwi a Zhiklè a ndav man a dza na kumba.

⁷ Bi Zhiklè a nkwola sam man ta va na skwi a pa, a woya sam nengaʼa nkezlaʼa ɓai, a mpa na zlazlar gihi bi Sion a ri a mayamhai. Ta tsi lalau mwuffe te gi Ndo nzi pèc pècèk lèmèlèmè ara pats ngolala.

⁸ Ndo nzi pèc pècèk a mhur a woya a ngedassa zlazlar kokwar Sion, a mpra teɓa nlivè skwai, a mpra ri nengaʼa, aman a gédèshè skwai. Zlazlar kokwar, a kokwar nʼngala te pa, sèi ta lèyè, ta mbeɗ ta tèlèba.

⁹ Ntamagi kokwar ta preka ta auda, a skwi mɓèr ntamagai mpasl na. Bai a wud bihi tengaʼa ta te ndev ndohi nte deɓa; ma kita azɓai; ko ndohi nhadka ma ta ngècè nshunè te ri Ndo nzi pèc pècèk azɓai.

¹⁰ Ndohi kokwar Sion nhalaʼa ta nzi tʼherkeda, ta gèdè skwi azɓai, ta peda hutsoɗ a géɗ, a maslaka sam kuɗa a va. Dalahi Jérusalem ta kalda gèɗ a ndav.

¹¹ Di ga a nhezl na a kuɗa, ndav ga a hubètè, ndav ga a mbeɗ na a géɗ man kokwar ndohi ga ngedas na. A wudahi, a wudahi man a rai, ta ɓerzl ta a dal kokwar.

¹² Ta gada ta mam ta: Skwi nʼndi tema? Ta tiɗ ta a mai, ara ndohi man ta bazl ta a dal kokwar, ta bazl ta a wa mam ta.

¹³ I lèmdè ka a mè, kokwar Jérusalem? Ka lèmèlèmè ara mè, bidalai, dem Sion? Aman skwi ngedas ka mbiaʼa ara iyam mbiaʼa. Nda mbel ka wa?

¹⁴ Ndohi nhadka ma nga ta cèkèl ma a sam ngaya, a ta njè ka ma nrzlaʼa. Ta ngra ka mali ngaya ɓai, aman ka shkè auda te ndzoan. Skwi man ta hodko ma a géɗ ngaya, skwi ncèkèlma, skwi nʼngwode ka genè.

¹⁵ Ta tèlèba man ta bizhè a civèɗ, ta tsi ri pèsl pèslèʼa, ta tsi wagèsh, a ta geda gèɗ kwota-kwotaʼa a géɗ kokwar Jérusalem. Ta gada: Nta kokwar man ta sla na kokwar mbelaʼa, man kokwar tèlèba a wuffè a gédèʼa ma dè?

¹⁶ Mayamhi ngaya tèlèba ta ngre ka, ta ngwèshè, ta winè ma a vata a géɗ ngaya, ta gada: Nga gedassa kokwar! Pats man nga zhoro, nga ngotso ma, nga ndikeda pa!

¹⁷ Ndo nzi pèc pècèk a nrufa skwi man a huro, a ngu skwi man a nguv ta a vna halaʼa: A mbeɗdahai, a sia te va azɓai, a ngu aman ndo mayam a wuffè a géɗ nengaʼa, a mva ta wuɗi a ndohi nʼnga ka matakwan.

¹⁸ Kuɗau a sam Ndo nzi pèc pècèk, zlazlar kokwar Sion, kuɗau sreffsreffaʼa, kuɗ ngaya da hu ara iyam, a pats a vaɗ ba, ka sok va ɓai, kuɗa a di ngaya da satar ɓai!

¹⁹ Gu wobau a vaɗ, a sam nkezawaʼa, ngurdo skwi auda te ndav tèlè a sam Ndo nzi pèc pècèk, da hakaɗauda te pa ara iyam; geda ri a zhiklè a ka tsu ri a géɗ nshèffè wudahi ngaya, man ta tiɗ ta a mai a zolom civèɗ tèlèba.

²⁰ Ndo nzi pèc pècèk, wora, pu dai! Ka ga na skwi aranta a wa? Mam wudahi da ndau wudahi man ta yu ɗè? Wudahi man ta feda a gsa dè? Da bazl ta ndo mvi skwi a Zhiklè a ndo nhadka ma a sam Bi Zhiklè nkezlaʼa dè?

²¹ Gola a babgai ta manatʼhai a dal civèɗ. Dalahi ga a golahi ga ta bazl ta a tsakwal. Ka bazl ta a pats ndzoan, ka tsah ta, ta se ka te va ɓai.

²² Ka baha ta ara man ka baha ta a ngolala te kokwar ga tèlèba. Aman a pats ndzoan Ndo nzi pèc pècèk, ko staɗ a mʼmbel na ɓai, ko staɗ nʼnza a nshèffè ɓai. Tengaʼa man i humbat ta a ndav, man i gre ta, ndo mayam ga a ngedas ta.