Lamentations de Jérémie 1 - Ma Zhiklè

Nlèyè Jérusalem

¹ Wobau! Ani kokwar a gi mbelawa, man halaʼa ndohi kumba te pa! A nʼnde na dikai, man halaʼa mbiaʼa te ndev kokwar bihai. Halaʼa, mba nengaʼa a géɗ kokwar; antanta bèlè.

² A kuɗi lèk lèk hzlatsagai, kuɗa a dai. Te va ndohi man halaʼa ta woyaʼa, ndo mbidèʼa azɓai. Mandalahi nenga tèlèba ta kwolaʼa, ta ga a mayamhi na.

³ Ta hel ta ndohi Juda a ma a ɓèlè, ta pe ta a mizlinè bèlè. Ta nzi a ndev ndohi nte deɓa, ta ngècè nshèk va azɓai. Ndohi tèlèba man ta paraha ta, ta gats ta te ndev matakwan.

⁴ Civèɗ ndè Sion a lèyè. Ndo ndè ngolala azɓai, ntamagi kokwar nenga tèlèba ta nza a pa ambalai. Ndohi mvi skwi a Zhiklè nengaʼa ta kuɗai, dalahi tengaʼa ta kuɗi te ndav, a géɗ skwi mwuɗitpa man a ga na kokwar.

⁵ Ndohi nʼnga ta matakwan ta gi a ngul ta, mayamhi tengaʼa ta nza amba amba, te man Ndo nzi pèc pècèk a nkalde Sion a matakwan, a géɗ mali nengaʼa tèlèba. Wudahi nengaʼa ta hel ta a ɓèlè, mayam tengaʼa a pe ta a ma.

⁶ Nʼnjèl kokwar Sion tèlèba klèng. Wud bihi tengaʼa lèmèlèmè ara mènèɗ. A mèdèp ta ngècè mandi azɓai. Ta hi a ma ndo ndzam ta, aman wuɗi ta asaɓai.

⁷ A pats nlèyè, Jérusalem a hér civèɗ nengaʼa man a nzlak na auda a pa, skwi mèshèlè tèlèba man te va nasa a nʼngotso. Aman antanta ndohi nengaʼa ta kala a ri mayam ta, ndo ntakaha ta azɓai. Mayamhi tengaʼa ta pi dai, ta ngwèshè a géɗ man kokwar Jérusalem ngedas na.

⁸ Jérusalem a ngu mali kumba, gar haha a nʼngots hori a dai. Ta tèlèba man ta slubordo, te va nasa, ani ta dérdèʼa, a géɗ man ta rkaʼa nʼadai. Nengaʼa ba a kuɗai, a nʼngwoda ma na a civèɗ ngiɗè.

⁹ Derɗa ntotpa a maslaka na, a mhur nʼndikè-ma nengaʼa ɓai, a nkalahi a vata, ndo mbidèʼa azɓai. Ndo nzi pèc pècèk, wor matakwan ga, aman ndo mayam a fi va!

¹⁰ Ndo mayam a ntorko ri a va skwi mbelaʼa te Jérusalem tèlèba, Jérusalem a nrkaʼa ara man ndohi nte deɓa to do a gi nenga nkezlaʼa, man ka fa ta ma a gèɗ: do do a va mpi ndohi nengaʼa ɓai!

¹¹ Ndohi nenga tèlèba ta shèkètè, ta hesh skwi nʼndai. Skwi tengaʼa man ta ngotso ta preda ma a skwi nʼndai, ta woya a ta mbél nshèffè ta. Ndo nzi pèc pècèk, wora, ta kwolyè ma!

¹² Kin tèlèba man kin bizhè a pa, va-wora, va-pu dai! Skwi ndzi ngiɗè ara skwi man a dzayè, man Ndo nzi pèc pècèk a ngezyè a vna, a pats ndzoan nengaʼa, a zhi dè?

¹³ A nkoldkoy vogwa a gèɗ, a ndiyè kala hwaɗaʼa, a ngsay sak ga a hai a gadda, a nkaldyè a deɓa, a ngedassyè, a nkaldyè a matakwan.

¹⁴ Mali ga man a dzawamay rai, nkelawa te daʼai ara wof, a cèmay wuɗai. Bi Zhiklè a mviyè a ri a ndohi man i slaha a i fen ta ɓai.

¹⁵ Ngul ndohi tèlèba a sam ga, Ndo nzi pèc pècèk a nkwol ta, a mboho, aman ta vhè ma, a ta gédèshè golahi ga. Bi Zhiklè a nhanzaslda bidali, dem Juda, a klok.

¹⁶ I kuɗi a géɗ nengaʼa, kuɗa a pay a dai; aman ndo mbidyè, ndo ntaslyè, dra a sam ga. Wudahi ga ta gedas ta, aman ndo mayam a nfa nga a gèɗ.

Ntsi rai, nje ma malai

¹⁷ Sion a ntorko ri na, ndo mbidèʼa azɓai. Ndo nzi pèc pècèk a mbaha ta mayamhi na a géɗ Jacob. Jérusalem a ngu a skwi man a ndèr a ndo.

¹⁸ Ndo nzi pèc pècèk, nzuraʼa, Iyè, i gu mèdègèɗ a sam ma nengaʼa. Ndohi herkeda, va-tsenaʼa, kin tèlèba, va-rka skwi man a dzayè! Dalahi ga a golahi ga ta hel ta ma a ɓèlè.

¹⁹ I baha ta mandalahi ga; aman ta ngwodyè. Ndohi mvi skwi a Zhiklè, a ndohi ga nhalaʼa ta tiɗ ta te kokwar, ta woy skwi nʼndai, a ta ngatsa ɓai.

²⁰ Ndo nzi pèc pècèk, wora, ndav ga a lèyè, ndav ga a dzayè worworaʼa, a ngwodamay ndav, a géɗ man i gu mèdègèɗ. Wudahi ga, tsakwal a bèzlè tʼuda, mʼmetsi a bèzlè te gai.

²¹ Tsenaʼa, aman i shèkèt ga. Ndo mbidyè azɓai. Mayamhi ga tèlèba ta sun matakwan ga. Ta wuffè a géɗ skwi man ka gayè, a ka gu ara man ka goɗa, a géɗ mali ga tèlèba.

²² Wor shèwa tengaʼa tèlèba! Da ga a sam ta ara man a gayè! Ara man ka gayè, ga ta tengaʼa lèmèlèmè! Aman a dzayè a ndav, a sakatyè.